Seinastu Tíðindini

Hans Kristian Simonsen – vann í stórum stíli í gjár. Mynd: jn.fo

Høgni Egilstoft Nielsen úr Sandavágs Talvfelag og Hans Kristian Simonsen úr Kollafjarðar Talvfelag eru einsamallir á odda við fullum stigatali eftir tvey umfør í FM-einstaklingakappingini í talvi vesturi á Giljanesi.

Favoritturin Høgni Egilstoft Nielsen vann aftur í gjár. Í drúgvum leiki vant hann spakuliga úr Martini Poulsen, ið annars stóð væl við hvíta fólkinum.

42 ára gamli fyrrverandi føroyameistarin frá 2002, Hans Kristian Simonsen, hevur somuleiðis fingið eina flúgvandi byrjan. Í gjár syfti hann Eliasi Petersen í stórum stíli. Kongaálop, rókaoffur, síðani varð kongurin rikin um alt borðið til hann at endanum varð settur skák og mát. Slíkt sæst sjáldan nú á døgum.

Jón í Horni Nielsen hevur hálvtannað stig á triðja plássi. Tað var um reppið, at hann aftur vann í gjár, men tað eydnaðist Peturi Gardar Magnussen at bjarga sær remis við ævigum skáki.

Í fjórða talvinum vann Luitjen Akselsson Apol trygt á Flóvini Matras Tummarson.

Støðan í Landsliðsbólkinum eftir tvey umfør:

1-2. Høgni Egilstoft Nielsen (ST) 2 stig

1-2. Hans Kristian Simonsen (KT) 2

3. Jón í Horni Nielsen (ST) 1½

4-5. Elias Petersen (HT) 1

4-5. Luitjen Akselsson Apol (HT) 1

6. Petur G. Magnussen (HT)1

7-8. Martin Poulsen (HT) 0

7-8. Flóvin M. Tummasarson (HT) 0

3. umfar, 30. mars

Høgni Egilstoft Nielsen – Elias Petersen

Hans Kristian Simonsen – Jón í Horni Nielsen

Luitjen Akselsson Apol – Martin Poulsen

Petur G. Magnussen – Flóvin M. Tummasarson

Hinir bólkarnir

Telvað verður eisini í øðrum bólkum. Í 1. bólki hevur Rókur Davidsen úr Klaksvíkar Talvfelag sum hin einasti fult stigatal eftir tvey umfør.

Sama er at siga um Boga á Kósini, eisini úr Klaksvíkar Talvfelag, sum er einsamallur á odda í almenna bólkinum.

Og í unglingabólkinum er Andrew Xin úr Havnar Telvingarfelag á odda við fullum stigatali.

Triðja umfar verður telvað í dag. Byrjað verður klokkan 14.00. Fylgjast kann við leik fyri leik á netinum. Higartil hevur tøknin verið heldur svikalig, tí báðar dagarnar er sambandið farið til toppborðið, har Høgni Egilstoft Nielsen er annar parturin.

Føroyameistarin Høgni Egilstoft Nielsen

FM-favoritturin Høgni Egilstoft Nielsen úr Sandavágs Talvfelag vann í fyrsta umfari í FM-kappingini í talvi fyri einstaklingar á fremsta avbjóðaranum, Luitjen Akselsson Apol úr Havnar Telvingarfelag.

Høgni vann við hvíta fólkinum í einum skørpum sisilianara, har hvørgin spardi krútið. Høgni tóktist kortini at hava tamarhald á støðuni allan vegin.

Var hetta í veruleikanum avgerðin í kappingini, munnu summi hugsa. Høgni er so mikið stórur favorittur, at tá ið hann longu í fyrsta umfari kveistraði dyggasta avbjóðaran til viks, er ilt at síggja, hvør ið so skal steðga honum.

Martin Poulsen, sum hevur triðhægsta styrkitalið í bólkinum, tapti fyri Hans Kristiani Simonsen. Tap var í hendi hjá Martini longu eftir tjúgu leikir. Vánaliga gongdin hjá trífalda føroyameistaranum stendur við.

Á hinum borðunum sótu fýra av teimum yngstu í FM-bólkinum – Luitjen undantikin. Her vunnu teir við hægri styrkitali.

Annað umfar í dag

Klokkan 14.00 í dag byrjar annað umfar í FM-talvkappingini á Giljanesi.

Høgni Egilstoft Nielsen og Martin Poulsen møtast – telvararnir við flest FM-heitum í beltinum. Annar dystur stendur millum Elias Petersen og Hans Kristian Simonsen, sum báðir vunnu í gjár.

Í alt 45 telvarar eru við í teimum ymisku bólkunum í kappingini. Telvað verður til og við langa fríggjadag, tá sjeynda og seinasta umfar verður.

Til ber at fylgja við leik fyri leik á netinum, meðan telvað verður. Leinki sæst á heimasíðu Talvsambandsins – faroechess.com.

Úrslitini í fyrsta umfari í Landsliðsbólkinum í gjár vóru hesi:

FM, Landsliðsbólkur, 1. umfar:

IM Høgni Egilstoft Nielsen, ST (2401) – Luitjen Akselsson Apol, HT (2299) 1 – 0

Hans Kristian Simonsen, KT (2110) – Martin Poulsen, HT (2189) 1 – 0

Jón í Horni Nielsen, ST (2080) – Flóvin M. Tummasarson, HT (1904) 1 – 0

Petur G. Magnussen, HT(1984) – Elias Petersen, HT (2096) 0 – 1 

2. umf sunnudagin 29. mars:

Martin Poulsen – Høgni Egilstoft Nielsen

Flóvin M. Tummasarson – Luitjen A. Apol

Jón í Horni Nielsen – Petur G. Magnussen

Elias Petersen – Hans Kristian Simonsen

Nú byrjar árliga FM-einstaklingakappingin í talvi. Sandavágs Talvfelag hýsir kappingini á Giljanesi. Í alt 45 telvarar eru við í ár.

Telvað verður í fimm bólkum. Átta kappast um FM-heitið í Landsliðsbólkinum. Tað eru teir, sum hava hægstu styrkitølini í kappingini. Síðani eru aðrir átta í 1. bólki. Harnæst er fjúrtan telvarar í almennabólkinum.  Í unglingabólkinum eru einans níggju telvarar. Tað eru færri enn vant. Haraftrat er ein veteranbólkur, í honum eru seks telvarar.

FM-favoritturin Høgni Egilstoft Nielsen úr Sandavágs Talvfelag. Mynd: Jn.fo

Leygardagin 28. mars klokkan 14.00 verða klokkurnar settar í gongd á Giljanesi. Og so er FM-kappingin í talvi fyri einstaklingar byrjað.

Annarhvør av telvarunum í Landsliðsbólkinum hava verið føroyameistarar. Teir eru Høgni Egilstoft Nielsen, Luitjen Akselsson Apol, Martin Poulsen og Hans Kristian Simonsen.

Hinir fýra í FM-bólkinum teljast millum okkara bestu og mest framfýsnu yngri telvarar.

Tað er ikki yvir at dylja, at Høgni Egilstoft Nielsen er favorittur. Kanska er hann stórfavorittur. Hann hevur lutfalsliga nógv hægri styrkital enn hinir, er altjóða meistari, er føroyameistari, og hevur havt sera góð úrslit í seinastuni.

Luitjen A. Apol er fremsti avbjóðarin. Fyrraárið eydnaðist honum at koppa Høgna, men annars hevur Høgni verið við yvirlutan.

Martin Poulsen plagdi at vera roknaður millum teir, sum kundu gera seg galdandi, men seinasta knappa árið hevur afturgongdin verið sjónlig.

Hans Kristian Simonsen hevur verið óstøðugur nú í fleiri ár. Hóast hann lítið og einki hevur telvað í liðkappingini í fleiri ár, er hann afturímóti fastur fúsur í FM-einstaklingakappingini um páskirnar. 

FM Landsliðsbólkurin 2026

1. IM Høgni Egilstoft Nielsen, ST 2401

2. Luitjen Akselsson Apol, HT 2299

3. Martin Poulsen, HT 2189

4. Hans Kristian Simonsen, KT 2110

5. Elias Petersen, HT 2096

6. Jón í Horni Nielsen, ST 2080

7. Petur G. Magnussen, HT 1984

8. Flóvin M. Tummasarson, HT 1904

Toppfundur í fyrsta umfari

Lutakastið hevur lagað tað soleiðis, at favorittarnir Høgni Egilstoft Nielsen og Luitjen Akselsson Apol møtast longu í fyrsta umfari. Høgni hevur hvíta fólkið. 

Telvað verður soleiðis í fyrsta umfari:

Høgni Egilstoft Nielsen – Luitjen Akselsson Apol

Hans Kristian Simonsen – Martin Poulsen

Jón í Horni Nielsen – Flóvin M. Tummasarson

Petur G. Magnussen – Elias Petersen

Telvað verður í eina viku á Giljanesi. Eitt umfør verður hvønn av døgunum. FM-kappingin endar  langa fríggjadag.

Á heimasíðu Talvsambandsins sæst ikki, um til ber at fara at síggja leikirnar so hvørt sum flutt verður.

Føroyameistarar seinastu fimtan árini

2011 Helgi Dam Ziska, HT

2012 Rógvi Egilstoft Nielsen, ST

2013 Olaf Berg, HT

2014 Høgni Egilstoft Nielsen, ST

2015 Rógvi Egilstoft Nielsen, ST

2016 Rógvi Egilstoft Nielsen, ST

2017 Helgi Dam Ziska, HT

2018 Helgi Dam Ziska, HT

2019 Helgi Dam Ziska, HT

2020 Høgni Egilstoft Nielsen, ST

2021 Høgni Egilstoft Nielsen, ST

2022 Høgni Egilstoft Nielsen, ST

2023 Helgi Dam Ziska, HT

2024 Luitjen Akselsson Apol, HT

2025 Høgni Egilstoft Nielsen, ST

Yvirlit yvir eldri úrslit fullført

Verkætlanin at leggja út eldri úrslit frá landskappingini í talvi á heimasíðu Talvsambandsins er í fyrsta umfari fullførd.

Úrslitini eftir aldaskiftið eru nú komin. 

Talan er um úrslit í 1. deild øll árini frá tí at byrjað var fyrst í 70-árunum og til og við 2007. Árini frá 2008 og fram eftir eru fevnd av talgildaða tíðarskeiðnum. Serliga eru 70-árini tó ófullfíggjað.

Í hagtalsyvirlitinum á svarta breddanum  í erva eru øll árini savnað.

Vágamenn gjørdu bart í landskappingini í talvi í vetur. Sandavágs Talvfelag gjørdi ikki mætari enn at vinna allar tíggju dystirnar í 1. deild. Í seinasta umfari í dag vunnu teir 3 – 1 á Havnini, sum hevur verið meistari seinastu tvey árini. Eitt suverent kappingarár hjá Sandavágs Talvfelag.

Les meira »

Klaksvíkar Talvfelag hevur vunnið FM-heitið 2010.  F.v.: Heini Olsen, Finnbjørn Vang, Eyðun Nolsøe, Terji Petersen og Esben Lund. Hetta er seinasti FM-sigurin hjá klaksvíkingum. Síðani 2010 hava bara tvey feløg vunnið FM – Sandavágs Talvfelag og Havnar Telvingarfelag.

Í morgin leygardagin verða dystirnir í tíggjunda og seinasta umfari í landskappingini í talvi spældir.

Sandavágs Talvfelag stendur til at vinna FM-heitið, sum Havnar Telvingarfelag hevur vunnið seinastu tvey árini.

Føroyingar hava so smátt vant seg við, at hesi bæði feløgini skiftast um at vinna føroyameistaraheitið. Hetta hevur verið lagið nú í fimtan ár. Vit skulu aftur til 2010 at finna annan føroyameistara. Tá vann Klaksvíkar Talvfelag sítt áttanda FM-heiti í 1. deild – og sítt higartil seinasta meistaraheiti.

Árið eftir vann Sandavágs Talvfelag sítt fyrsta FM-heiti. Vágamenn hava hesi fimtan árini síðani vunnið ikki færri enn átta FM-heiti. Havnar Telvingarfelag hevur vunnið sjey ferðir. Alt bendir á, at Sandavágur fer at vinna í ár – gera teir tað, hava teir yvirhálað Klaksvíkar Talvfelag við einum FM-heiti, og er tá felagið við næstflestum FM-sigrum.

Ivaleyst hevði tað verið gagnligt fyri føroyska telving, at onnur feløg spentu seg út og tóku kappingina upp við vágamenn og havnarmenn. Klaksvikar Talvfelag er framvegis besta boðið, men líkt er til, at har restar eitt sindur í aftrat.

Vit hava fyrr sæð Vestmanna Talvfelag og Kollafjarðar Talvfelag vinna við styrktum manningum. Vestmenningar høvdu umframt John Rødgaard eisini telvarar sum Torbjørn Thomsen, Martin Brekká og Carl Eli Samuelsen í sínum parti. Tá var lagamanni at vinna. Sama var, tá ið kollfirðingar seint í 90-unum styrktu seg við góðum norðurlendskum telvarum, bæði Tiger Hillarp-Persson, ið virkaði sum leikandi venjari eitt skifti, og Steffen Pedersen.

Seinnu árini hevur ikki sami eldhugi geisað í føroysku talvfeløgunum. 

Felagsumfar á Giljanesi

Allir dystir í øllum deildum í seinasta umfari í morgin verða telvaðir í skúlanum á Giljanesi. Byrjað verður klokkan 12.30.

Í 1. deild er líkt til, at Sandavágs Talvfelag fer at vinna. Havnar Telvingarfelag hevur ein møguleika enn, men tá skulu teir vinna ikki minni enn 3½-½ á vágamonnum í innanhýsis dystinum í morgin. 

Ein ávísur spenningur er í botnstríðnum. Dysturin millum B-liðini hjá Sandavági og Klaksvík kann fara at gerast heilt avgerandi, men B-liðið hjá Havnini er ikki heilt tryggjað heldur.

Støðan í 1. deild

Sandavágur 27 stig

Havnin 24½

Klaksvík 16½

Havnin (B) 15

Klaksvík (B) 13

Sandavágur (B) 12

Dystirnir í seinasta umfari í 1. deild eru hesir:

1. deild (10 umf – 14 mars)

Sandavágur (A) – Havnin (A)

Klaksvík (A) – Havnin (B)

Sandavágur (B) – Klaksvík (B)

Kollafjørður ella Toftir?

Stórur spenningur er um hvat av oddaliðunum í 2. deild flytur upp í 1. deild komandi ár.

Her stendur á jøvnum millum Kollafjørð og Toftir. Tað fær ikki verið nógv meira spennandi.

Støðan í 2. deild

Toftir 22 stig

Kollafjørður 22

Klaksvík 20

Havnin (B) 16½

Havnin (A) 15½

Rókur 12 

Dystirnir í seinasta umfari í 2. deild verða hesir:

2. deild (10 umf – 14 mars)

Kollafjørður – Klaksvík

Havnin (A) – Toftir

Havnin (B) – Rókur

Vestmenningar á odda

Alt bendir á, at Vestmanna Talvfelag flytur upp í næstbestu deildina. Teir hava lutfalsliga so greiða leiðslu, at tað átti at gingið.

Støðan í 3. deild

Vestmanna 22½

Sandavágur 19½

Kollafjørður 19½

Kongshavn 18½

Gøta 17½

Klaksvík 10½

Dystirnir í seinasta umfari í 3. deild verða hesir:

3. deild (10 umf – 14 mars)

Sandavágur – Vestmanna

Kollafjørður – Gøta

Klaksvík – Kongshavn

Flyta suðuroyingar upp?

Ikki minni spenningur er í 4. deild. fer tað at eydnast nýggja felagnum í Suðuroy at flyta upp í 3. deild? 

Sum er stendur á jøvnum millum suðringar og havnarmenn.

Støðan í 4. deild

Suðuroy 10

Havnin (B) 10

Rókur 8½

Havnin (A) 7½

Sandavágur (A) 6½

Sandavágur (B)  5½

4. deild (5 umf – 14 mars)

Suðuroy – Sandavágur (A)

Rókur – Havnin (B)

Sandavágur (B) – Havnin (A)

Støðan í 5. deild

Strendur 12½

Rókur 6

Toftir 5½

Kollafjørður 4

Gøta 4 

5. deild (5 umf – 14 mars)

Rókur – Gøta

Kollafjørður – Toftir

Sjey føroyameistarar í 55 ár

Niðanfyri sæst hvørji feløg hava vunnið FM í talvi. 

Í alt sjey feløg hava verið best í 1. deild – fyrstu trettan árini kallaðist tað A-deildin.

FM-lið 1. deild (1971 – 2025)

1971 HT

1972 HT

1973 KT

1974 HT

1975 HT

1976 VT

1977 HT

1978 HT

1979 HT

1980 HT

1981 HT

1982 HT

1983 HT

1984 HT

1985 VT

1986 TFS

1987 TT

1988 KTF

1989 HT

1990 HT

1991 KTF

1992 VT

1993 KT

1994 KT

1995 HT

1996 KTF

1997 KTF

1998 KT

1999 KTF

2000 HT

2001 HT

2002 VT

2003 HT

2004 KTF

2005 HT

2006 VT

2007 KTF

2008 VT

2009 HT

2010 KTF

2011 ST

2012 HT

2013 ST

2014 ST

2015 ST

2016 ST

2017 HT

2018 HT

2019 ST

2020 HT

2021 ST

2022 HT

2023 ST

2024 HT

2025 HT

FM-sigrar í alt (1971-2025)

HT 27 (Havnar Telvingarfelag)

ST 8 (Sandavágs Talvfelag)

KTF 8 (Klaksvíkar Talvfelag)

VT 6 (Vestmanna Talvfelag)

KT 4 (Kollafjarðar Talvfelag)

TT 1 (Tofta Talvfelag)

TFS 1 (Talvfelagið Streymur)