Talvsamband Føroya Faroechess

Tveir skaraðu framúr í árligu FM-kappingini í snartalvi í dag. Okkara bestu tveir telvarar, stórmeistarin Helgi og altjóða meistarin Høgni, vóru í flokki fyri seg.  Innanhýsis talvið teirra millum í fimta umfari kom at vera avgerandi. Helgi vann hesa finaluna. Høgni vann øll hini tíggju talvini, Helgi hevði eitt remis móti Heiðriki Jacobsen, hini tíggju talvini vann hann. Føroyameistarin í standardtalvi, Luitjen Akselsson Apol, endaði nummar trý.

Hetta vikuskiftið telva teir um árliga FM-heitið í ávikavist snar- og kviktalvi. Tað eru sprintarateinarnir í talvi.  Telvað verður á Toftum. Snarkappingin er í dag, kviktelvingin í morgin. 28 verða við í snarkappingini, og 36 í kvikkappingini í morgin. Favorittar eru Helgi Dam Ziska, Høgni Egilstoft Nielsen og føroyameistarin Luitjen Akselsson Apol. Rógvi Egilstoft er ikki við í ár.

Sunnudagin var Vestmanna Talvfelag vertur fyri stórum felagsumfari í landskappingini í talvi. Allir dystir í triðja umfari í øllum deildum vórðu telvaðir í Vestmanna.   Toppliðini vóru nú betur mannað enn í fyrstu umførunum. Helgi Dam Ziska sat á 1 borði hjá Havnar Telvingarfelag, og Rógvi Egilstoft var komin heim úr Spania at telva við sandavágsmonnum.

Stutt er millum havnarmenn, vágamenn og klaksvíkingar eftir fyrstu tvey umførini í landskappingini í talvi. Bara eitt hálvt stig skilir tey trý oddaliðini. Dystirnir í øðrum umfari vóru sunnudagin.