Seinastu Tíðindini

Í morgin leygardagin endar landskappingin í talvi við stórum felagsumfari í Kollafirði. Tá fellur avgerðin í øllum fýra deildum. Sum vant møtast Havnin og Sandavágur í avgerandi innanhýsis dysti í 1 deild.

Soleiðis er næstan á hvørjum ári: havnarmenn og vágamenn í harðari orrustu um FM-heitið í talvi.

Kollafjarðar Talvfelag er vertur fyri endabrestinum í landskappingini í talvi í morgin. Allir dystir í øllum fýra deildum vera undir somu lon. Fyrstu leikirnir í tíggjunda og seinasta umfari verða fluttir klokkan 11:30. Telvað verður í Kollafjarðar Skúla.

Havnar Telvingarfelag er á odda í fremstu deildini. Leiðslan er høglig; havnarmenn standa seg við eittans stigi í dystinum í morgin móti vágamonnum. 

Fyritreytirnar eru nett tær somu sum í 2017. Tá hildu havnarmenn væl til standa, men vágamenn tóku teir á bóli við greiðum sigri. Til alla lukku fyri Havnina, var Olaf Berg í toppformi tann dagin á 1 borði og vann á Rógva Egilstoft í stórum stíli. Tað bjargaði degnum, tí allir hinir taptu – vágamenn vunnu dystin 3-1, men FM-heitið endaði kortini við bit og slit í Havn.

Uppgávan kann tykjast vágamonnum møtimikil, men í korona-árinum 2020 eydnaðist havnarmonnum at yvirhála vágamenn við øgiligum endaspurti og ruddiligum 3½-½ sigri í avgerandi dystinum í síðsta umfari. Og tað er tað, sum krevst, skulu vágamenn taka FM-heitið av havnarmonnum. Hvussu er og ikki, so plagar næstan altíð at vera spenningur til síðsta leik.

Spenningur er eisini í botnstríðnum. Her stríðast kollfirðingar og B-liðið hjá Havnini um hvør av teimum skal lívbjarga sær í deildini.

Støðan 1 deild

Havnin 29 stig

Sandavágur 26½

Klaksvík 20½

Klaksvík B. 12

Havnin B. 10

Kollafjørður 10

10 umfar – 1 deild

Sandavágur – Havnin

Klaksvík – Havnin B.

Kollafjørður – Klaksvík B.

Duopol í fimtan ár

Í fimtan ár hevur FM-kappingin í talvi staðið millum Havnar Telvingarfelag og Sandavágs Talvfelag. Einki annað felag hevur vunnið hesi árini. 

Klaksvíkar Talvfelag vann í 2010. Sama ár doyði oddamaðurin Heini Olsen. Síðani hava klaksvíkingar ikki verið mentir at gera seg galdandi í FM-kappingini. Árið eftir vunnu vágamenn fyrsta FM-sigurin. Síðani hava hesi bæði feløgini togast um sigurin. Vágamenn hava vunnið oftast hesi árini. Síðani 2018 hava feløgini vunnið aðrahvørja ferð eftir tørni.

FM 2011 – 2024

2011 ST

2012 HT

2013 ST

2014 ST

2015 ST

2016 ST

2017 HT

2018 HT

2019 ST

2020 HT

2021 ST

2022 HT

2023 ST

2024 HT

Ikki færri enn tíggju hava mannað A-liðið hjá Havnini í vetur, vágamenninir eru helvtina færri. Her sæst úrtøkan hjá oddaliðunum báðum:

HT

Helgi Dam Ziska 5/6

Luitjen Akselsson Apol 6½/7

Martin Poulsen 3/3

Carl Eli Samuelsen 4/6

Olaf Berg ½/1

Sjúrður Thorsteinsson 3½/5

Hjalti Toftum Jógvanson 2/2

Herluf Hansen 3½/4

Elias Petersen ½/1

Heiðrikur Jacobsen ½/1

ST

Rógvi Egilstoft 1/2

Høgni Egilstoft Nielsen 8/9

Silas Eyðsteinsson 4½/9

Jón í Horni Nielsen 8½/9

Torkil Nielsen 4½/7

Sandavágur flytur upp

Í næstbestu deildini er avgerðin fallin. Sandavágs talvfelag flytur upp í 1 deild komandi kappingarár. Jón Atlason, Bernhard Augustinussen, Ingi Wiberg og Jónfinn Thomsen hava myndað kjarnuna á liðnum.

Nakað av spenningi er í niðara enda. Teir í Runavíkini og har um vegir stríðast fyri lívinum í deildini. Uppgávan er ikki tann lættasta í morgin, tí telvast skal móti oddaliðnum úr Sandavági.

Støðan 2 deild

Sandavágur 23½ stig

Klaksvík 19½

Toftir 19

Havnin B. 19

Havnin A. 14

Kongshavn 13½

10 umfar:

Sandavágur – Kongshavn

Havnin A. – Klaksvík

Toftir – Havnin B.

Sundalagið ella Gøta

Stórur spenningur valdar í 3 deild um hvat lið flytur upp í næstfremstu deildina. Kappingin er beinhørð millum Rók úr Sundalagnum og Gøtu Talvfelag. Bara eitt hálvt stig skilir partarnar. Í hølunum á teimum slota kollfirðingar eftir møguleikanum, skuldu fremru liðini snáva.

Oddaliðini hava bæði torførar dystir. Rókur og Kollafjørður møtast, og Gøta og Vestmanna. 

Støðan 3 deild

Rókur 22½ stig

Gøta 22

Kollafjørður 20½

Vestmanna 18

Sandavágur 14½

Havnin 10½

10 umfar

Kollafjørður – Rókur

Gøta – Vestmanna

Sandavágur – Havnin

Klaksvíkingar vinna 4 deild

Í fjórðu deild er eingin spenningur. Klaksvíkingar hava í roynd og veru longu vunnið.

Støðan 4 deild

Klaksvík 24½

Strendur A 20½

Sandavágur B. 19

Sandavágur A. 17

Rókur 17

Gøta 13

Suðuroy 12

Havnin 11

Strendur B. 11

Toftir 11 

9 umfar

Strendur A. – Sandavágur A.

Strendur B. – Havnin

Suðuroy – Toftir

Klaksvík – Gøta

Rókur – Sandavágur B.

FM-vinnarar 2024: Havnar Telvingarfelag. F.V.: Carl Eli Samuelsen, Helgi Dam Ziska, Luitjen Akselsson Apol, Sjúrður Thorsteinsson og Martin Poulsen.

FM-vinnarar 2023: Sandavágs Talvfelag. F.v.: Silas Eyðsteinsson, Høgni Egilstoft Nielsen, Rógvi Egilstoft og Jón í Horni Nielsen.

Tað var tann tíð, at bróðurparturin av føroysku talvelituni fjølgaðist í Danmark. Føroyska talvfelagið í Keypmannahavn hevði tá jóladagar. So væl lá fyri, at teir spældu seg heilt upp í fremstu deildina, og har hildu teir sær í nøkur ár. Í dag er føroyska talvfelagið í Keypmannahavn sovnað. Flestu av telvarunum fóru eftir loknan lestur heim aftur, og teir, sum eftir vóru, leitaðu sær upp í donsk feløg. Í dag eru ikki so nógvir virknir føroyskir telvarar í Danmark sum um aldamótið, tá alt kókaði.

Les meira »

Tríggir sterkastu talvunglingarnir í Norðurlondum. Føroyameistarin Luitjen Akselsson Apol høgrumegin.

19 ára gamli føroyameistarin í talvi, Luitjen Akselsson Apol, er millum fremstu unglingatelvarar í norðurlondum.

Í NM-kappingini í Íslandi í februar endaði føroyameistarin nummar tvey í elsta flokkinum. Hann fekk fimm stig, telvað vóru seks umfør í øllum bólkum. Hann vann fýra talv, tvey endaðu jøvn.

Luitjen kappaðist við báðar íslendsku telvararnar í bólkinum um sigurin. Favoritturin, Aleksandr Domalchuk-Jonasson, vann. Hann er longu altjóða meistari og táttar í 2400 í rating. Hann vann alt uttan talvið móti Luitjen, sum endaði remis.

Nummar trý var annar íslendski telvarin í bólkinum, Benedikt Briem, sum næstan hevur 2200 í rating. Til stuttleikar kann nevnast, at abbarnir hjá nummar tvey og trý í elsta NM-bólkinum hava telvað sínamillum í síni tíð. Tað var í fyrsta landsdystinum millum Ísland og Føroyar í Reykjavík í 1975. Tá vann táverandi føroyameistarin, Luitjen Apol – abbi núverandi føroyameistara við sama navni – á Stefan Briem, abba Benedikt Briem. Tað var eitt av fáu talvunum í dystinum yvir tíggju borð, sum føroyingar vunnu móti sterka íslendska liðnum.

Annars er at siga, at annað føroyska umboðið í hesum flokkinum var Rógvi Heinason Olsen – sonur fleirfalda føroyameistaran Heina Olsen. Rógvi stóð seg væl og fekk hálvtriðja stig á áttanda plássi. Rógvi var styrkismettur nummar tíggju. Rógvi vann óvæntað føroysku úttøkukappingina, og tað kostaði Jón í Horni Nielsen plássið í Íslandi.

Hetta er triðja ferðin, at Luitjen Akselsson Apol er næstfremstur í NM-kappingum í unglingatalvi. Tað var hann eisini í fjør, og í 2019, tá í lægri aldursbólki. Tvær ferðir hevur hann verið nummar trý – í 2021 og 2023. Enn hevur ikki eydnast honum at vinna, men hann hevur ein møguleika aftrat, tí um eitt ár kann hann kappast fyri seinastu ferð, áðrenn hann fellur fyri aldursmarkinum.

Luitjen – og so hini

Tað er ikki yvir at dylja, at føroyameistarin skarar framúr av okkara yngri telvarum. Hann er tann einasti, sum er mentur at gera seg galdandi í norðurlendsku kappingunum. Føroyar eru kortini umboðaðar í øllum aldursflokkum saman við hinum norðurlondunum, ið eisini hava tveir telvarar í hvørjum flokki.

Føroysku telvararnir avrikaðu yvirhøvur í góðum samsvari við styrkitalið og styrkismetingina. Í B-bólkinum endaðu føroysku umboðini á tíggjunda og ellinta plássi, sum teir eisini vórðu styrkismettar at enda. Í C-bólkinum høvdu okkara telvarar lægri styrkitøl enn hinir tíggju telvararnir, og teir endaðu á aftastu plássunum í bólkinum. Nakað tað sama gjørdi seg galdandi í D-bólkinum, har eydnaðist øðrum av føroysku telvarunum at troka ein við hægri styrkitali av. Soleiðis var eisini í yngsta flokkinum.

Í løtuni røkist tí lítið fyri, at føroyskir unglingatelvarar fara at vinna heiðursmerki í norðurlendsku kappingunum komandi árini uttan so, at onkur av teimum yngstu fer at taka seg nógv fram. Føroyar hava fyrr vunnið heiðursmerki í hesum kappingunum, nevnast kunnu Flóvin Tór Næs og Olaf Berg, og ikki at gloyma Helgi Dam Ziska, sum sigraði bæði í U-16 bólkinum og U-20 bólkinum fyri teir elstu.

Spennandi verður, um Luitjen ger honum kynstrið eftir um eitt ár. 

NM í ungdómstalvi 2025 í Íslandi

A-bólkurin – U-20

1. IM 2370 Aleksandr Domalchuk-Jonasson, Ísland 5½ stig

2. FM 2317 Luitjen Akselsson Apol, Føroyar 5

3. Benedikt Briem 2193, Ísland 4

8. Rógvi Heinason Olsen 1850, Føroyar 2½

12 telvarar í alt

B-bólkurin – U-17

1. Aku Salonen 2212, Finnland 5 stig

10. Rókur Davidsen, 1871 Føroyar 2½

11. Petur G. Magnussen, 1886 Føroyar 2

12 telvarar í alt

C-bólkurin – U-15

1. Evsuld Myagmarsuren 2296, Norra 5½ stig

11. Jamil Emil Jakobsen 1680, Føroyar 1½

12. Jamil Oskar Jakobsen 1523, Føroyar ½

12 telvarar í alt

D-bólkurin – U-13

1. Isai Sivaparan 1844, Norra

10. Dávid Lútzen, 1471 Føroyar, 1½

12. Djóni F. Jacobsen, Føroyar ½

12 telvarar í alt

E-bólkurin – U-11

1. Yiming Zhang 1922, Finnland 5½ stig

10. Lisa J. Xin 1549, Føroyar 1½

11. Baldur B. Jørgensen, Føroyar 1½

12 telvarar í alt