Talvsamband Føroya Faroechess
Tølini frá Lichess.org vísa, at nógv fólk fylgdu við í stroymingini í FM, ið var á páskum.
Hyggjaratølini vóru:
- Landsliðsbólkurin: 16.000
- Almenni bólkurin: 4.600
- Unglingabólkurin: 4.000
Tíðindi
Innbjóðing til steypakapping 2024
Steypakappingin verður telvað leygardagin 13. apríl á Strondum.
Umframt kappingina er endamálið at draga samanum farna kappingarárið 2023/24 – og við Gallaveitsluni – ikki minst, at øll sum vara av telvingini fáa eina hugnaliga løtu saman.
Innbjóðing: Barna Grand Prix finalan í Klaksvík
Komandi sunnudag, 7. apríl, verður kviktalvkapping fyri børn í Skótahúsunum í Klaksvík (Gerðagøta 11). Talan er um seinastu kapping út av 10 av hesum slag, har ið børnini kunnu samla stig saman til eina samlaða Grand Prix kapping. Kappingin í Klaksvík byrjar kl. 13:00. 6 umfør verða telvað í tveimum aldursbólkum (4 fl. og yngri og 5. fl. og eldri) við tíðini á klokkuni á 10min + 5 sek Les meira »
Úrslit og myndir frá BGP8 og 9
10. mars og 17. mars vóru 2 Barna Grand Prix kappingar, BGP8 og 9, ávikavíst í Vestmanna og Havn. Hettar vóru trið- og næstseinastu barnatalvkappingarnar í ár. Tann seinasta Barna Grand Prix kappingin og finalan verður komandi sunnudag í skótahúsunum í Klaksvík. Sí innbjóðing her. Les meira »
Luitjen er føroyameistari
Nøkur sekund eftir, at FM-umdysturin var liðugur um sjeytíðina í kvøld. F.v. Luitjen Akselsson Apol og Høgni Egilstoft Nielsen. Triði FM-finalisturin, Rógvi Egilstoft, sæst standandi mitt fyri. Vinstrumegin hómast ein fegin Katrin Apol, mamma at nýggja føroyameistarnum.
Myndatøka: Jóannes Guttesen
Fyri fyrstu ferð síðani 2013 eitur føroyameistarin í talvi annað enn Høgni, Rógvi ella Helgi.
Nú eitur føroyameistarin – júst sum miðskeiðis í 70-unum – Luitjen Apol. Men nú er tað ein annar Luitjen. 18 ára gamli abbasonur gamla føroyameistaran – sonur Katrina og Aksel V. Johannesen – ber nú arvin víðari.
Luitjen var flúgvandi í umdystinum í dag. Hann vann bæði talvini móti Høgna, og móti Rógva vann hann annað og telvaði hitt javnt. Bæði í avgerandi talvinum móti Høgna í gjár og aftur í umdystinum í dag telvaði Luitjen sum ein brandur. Aftrat góða álopstevinum og evnunum at síggja og rokna væl í fløktum støðum, sást nú eisini ein fastleiki og tryggleiki í spælinum hjá honum, sum gjørdi munin.
Tað hevur verið bíðað eftir hesum í nøkur ár. Longu í 2020 var Luitjen í FM-umdysti – bara 14 ára gamal – men tapti. Evnini vóru sjónlig, og neyvan hevur nakar annar føroyskur telvari verið so íðin og miðvísur seinnu árini sum Luitjen. Ungum telvarum so líkt hava sveiggini stundum verið í størra lagi, men nú bragdaði av álvara. Hesin sigurin er honum væl untur og væl uppiborin.
Tillukku Luitjen!
FM-umdysturin 2024 – kviktalv
Rógvi Egilstoft – Luitjen Akselsson Apol ½ – ½
Høgni Egilstoft Nielsen – Rógvi Egilstoft ½ – ½
Luitjen Akselsson Apol – Høgni Egilstoft Nielsen 1 – 0
Luitjen Akselsson Apol – Rógvi Egilstoft 1 – 0
Rógvi Egilstoft – Høgni Egilstoft Nielsen 0 – 1
Høgni Egilstoft Nielsen – Luitjen Akselsson Apol 0 – 1
Endaliga støðan í FM-umdystinum:
1. Luitjen Akselsson Apol, Havnar Telvingarfelag, 3½ stig
2. Høgni Egilstoft Nielsen, Sandavágs Talvfelag 1½
3. Rógvi Egilstoft, Sandavágs Talvfelag 1 stig
Føroyameistarar seinastu 25 árini
2000 Flóvin Tór Næs, HT
2001 John Rødgaard, VT
2002 Hans Kristian Simonsen, KT
2003 Martin Poulsen, HT
2004 Martin Poulsen, HT
2005 Carl Eli N. Samuelsen, VT
2006 Martin Poulsen, HT
2007 John Rødgaard, VT
2008 Helgi Dam Ziska, HT
2009 Martin Poulsen, HT
2010 Olaf Berg, ST
2011 Helgi Dam Ziska, HT
2012 Rógvi Egilstoft Nielsen, ST
2013 Olaf Berg, HT
2014 Høgni Egilstoft Nielsen, ST
2015 Rógvi Egilstoft Nielsen, ST
2016 Rógvi Egilstoft Nielsen, ST
2017 Helgi Dam Ziska, HT
2018 Helgi Dam Ziska, HT
2019 Helgi Dam Ziska, HT
2020 Høgni Egilstoft Nielsen, ST
2021 Høgni Egilstoft Nielsen, ST
2022 Høgni Egilstoft Nielsen, ST
2023 Helgi Dam Ziska, HT
2024 Luitjen Akselsson Apol, HT
FM-finalistarnir við steypum eftir spennandi finaludag á Giljanesi í dag. F.v. Høgni Egilstoft Nielsen, nýggi føroyameistarin Luitjen Akselsson Apol og Rógvi Egilstoft.
Myndatøka: Jóannes Guttesen
Hálvleikur í umdysti – Luitjen á odda
Høgni Egilstoft Nielsen og Luitjen Akselsson Apol í víggi. Luitjen hevur aftur vunnið á Høgna, og tikið leiðsluna í umdystinum. Men tað er mangur leikur í longum talvi.
Myndamaður: Jóanis Albert Nielsen.
Teir eru komnir hálvan veg í FM-umdystinum í kviktalvi á Giljanesi. Allir tríggir hava nú telvað eina ferð hvør móti øðrum. Nú taka teir eitt tørn aftrat við øvugtum litum.
Higartil hava úrslitini verið:
Rógvi Egilstoft – Luitjen Akselsson Apol ½ – ½
Høgni Egilstoft Nielsen – Rógvi Egilstoft ½ – ½
Luitjen Akselsson Apol – Høgni Egilstoft 1 – 0
Støðan:
Luitjen 1½
Rógvi 1
Høgni ½
Nú verður hildið fram í hesari røð:
Luitjen – Rógvi
Rógvi – Høgni
Høgni – Luitjen
Stendur á jøvnum eftir hetta millum tveir ella tríggjar, verður hildið fram við snartelving.
Rimmar FM-umdystur
Hesir tríggir fara í dag undir umdyst um FM-heitið í talvi á Giljanesi. F.v. Rógvi Egilstoft ST, Luitjen Akselsson Apol HT, og Høgni Egilstoft Nielsen, ST. Høgrumegin sæst John Rødgaard. Her standa teir klárir til landsdyst í talv-OL í India í 2022.
Tríggir endaðu javnir í Landsliðsbólkinum, tá árliga FM-kappingin í talvi var liðug í gjár. Neyðugt verður tí við umdysti í dag millum teir tríggjar. Tað áseta reglurnar.
Tað er bara komið fyri tvær ferðir, at tríggir eru endaðir í einum FM-umdysti í talvi. Telvað verður í skúlanum á Giljanesi, og byrjað verður klokkan 14.00.
Reglur fyri umdystin
Umdysturin verður skipaður soleiðis, at allir telva móti hvørjum øðrum bæði við hvítum og svørtum. T.v.s. 6 talv tilsamans. Telvað verður við tíðini 15 minuttir + 10 sekund fyri hvønn leik.
Um framvegis stendur á jøvnum, verður telvað við tíðini 3 minuttir + 2 sekund.
Fylgjast kann við beinleiðis her: https://live.faroechess.com
Hvør vinnur?
Tað er helst vónleyst at spáa um, hvør favorittur er í slíkum umdysti. Men Høgni Egilstoft Nielsen hevur tvær ferðir verið í FM-umdysti eftir hesum leisti, og báðar ferðir vunnið. Fyrru ferðina vann hann á Luitjeni.
Brøðurnir úr Sandavági eru tiltiknir kringir, tá ið flytast skal í skundi, og alt stendur í einum eldi. Eingin ampi sæst á teimum, tá harðast leikar á, teir dusa sær fimir og hugagóðir, tá ið brýtur í bæði borð.
Men Luitjen kláraði við svarta fólkinum at fella Høgna í góðum talvi í gjár, so sjálvsálitið eigur at verða kvinkað rætta vegin hjá honum.
Trettan FM-umdystir
Síðani farið var undir árligu FM-kappingarnar í talvi fyri einstaklingar í 1972, er tólv ferðir komið fyri, at tað hevur staðið á jøvnum í oddanum millum tveir ella fleiri telvarar.
Í ár er trettanda ferðin, at neyðugt er við umdysti. Aloftast hevur talan verið um tveir, sum eru endaðir javnir, men í ár er tað triðja ferðin, at tríggir eru í umdystinum.
Reglurnar fyri kappinginga hava øll árini verið, at umdystur krevst, um javnstøða er í toppinum. Fínteljingin, sokallaðu mótstøðustigini, eru ikki galdandi fyri javnstøðu í Landsliðsbólkinum og unglingabólkinum.
Fyrstu árini var umdysturin skipaður við vanligari leiktíð, fýra talv í alt, tvær ferðir hvíta fólkið og tvær ferðir svarta fólkið, men seinnu árini – síðan aldaskiftið, ella í 2003 – hevur kviktelving verið ásett til FM-umdystir.
Niðanfyri sæst, hvussu gingist hevur í undanfarnu tólv FM-umdystunum:
1976 – Luitjen Apol
Luitjen Apol, HT ½ ½ ½ 1 2½
Petur Eli Mikkelsen, GT ½ ½ ½ 0 1½
1978 – John Jacobsen
John Jacobsen, VT ½ 1 1 – 2½
Símun Absalonsen, KTF ½ 0 0 – ½
1979 – Jens Chr. Hansen
Jens Chr. Hansen, TT 1 0 1 1 3
J. P. Midjord, HT 0 1 0 0 1
1988 – Torkil Nielsen
Torkil Nielsen, ST 0 0 1 1 2 (FM)
Jens Chr. Hansen, TT 1 1 0 0 2
Torkil vann við javnleiki, tí hann hevði hægri mótstøðustig í sjálvari FM-kappingini.
1996 – Rógvi W. Rasmussen
Rógvi W. Rasmussen, HT 1 ½ ½ – 2
Torkil Nielsen, ST 0 ½ ½ – 1
Tað sama her – Rógvi hevði munin í mótstøðustigum, og tí gjørdist ikki neyðugt við einum fjórða talvi.
1998 – John Rødgaard
John Rødgaard, VT ½ ½ ½ ½ 2 (FM)
Heini Olsen, KTF ½ ½ ½ ½ 2
John Rødgaard hevði fyrimunin av betri mótstøðustigum í FM-kappingini, og stóð seg tí við javnleiki.
2000 – Flóvin Tór Næs
Flóvin Tór Næs, HT x 1 ½ 1½
Torbjørn Thomsen, KT 0 x 1 1
John Rødgaard, VT ½ 0 x ½
Her fingu vit fyrsta umdystin millum tríggjar telvarar. Kappast var upp á gamlan máta við vanligari leiktíð. Eitt talv um dagin. Umdysturin var á hvítusunnu á Hotel Hafnia. Óvæntað endaði favoritturin John Rødgaard aftast.
2003 – Martin Poulsen
Martin Poulsen, HT x 1 1 2
Ólavur Simonsen, KTF 0 x – 0
Flóvin Tór Næs, HT 0 – x 0
Annar umdysturin millum tríggjar telvarar. Hesaferð var FM-finalan avgjørd í kviktelving. Hetta árið vóru fleiri góðir útlendskir telvarar við í einum víðkaðum meistarabólki við sekstan telvarum. Reglan var tann, at besti føroyingurin vann FM.
Danin Kim Pilgård vann, skotin John Shaw var nummar tvey og norðmaðurin Eirik Gullaksen nummar trý – allir altjóða meistarar. Síðani vóru fýra telvarar javnir; íslendingurin Sævar Bjarnason og teir tríggir føroyingarnir, ið so máttu út í umdyst.
Hvør hevði 25 minuttir í part til talvið. Aftrat vórðu tíggju sekund løgd fyri hvønn leikin. Martin Poulsen og Flóvin Tór Næs telvaðu fyrst. Martin vann – næmingurin vann á lærumeistaranum. Síðani áttu Martin og Ólavur tørn. Fyritreytirnar vóru ikki sørt margháttligar, tí Ólavur kundi vinna FM-heitið, vann hann hetta talvið, tí hann hevði best mótstøðustig av teimum trimum frá høvuðskappingini. Men 18 ára gamli Martin Poulsen vann í sera dramatiskum talvi, ið endaði sum rættilig snartelving.
2005 – Carl Eli Samuelsen
Carl Eli N. Samuelsen, VT 0 1 / 1 2
Martin Poulsen, HT 1 0 / 0 1
Tvey kviktalv vórðu ásett til henda umdystin – 25 minuttir í part pluss tíggju sekund fyri leikin. Tað endaði 1 – 1. FM-heitið skuldi nú avgerast í einum sonevndum sudden-death talvi. Hvítur hevur tá seks minuttir og svartur fimm, endar tað javnt, vinnur svartur. Martin vann lutakastið og slapp at velja, hann valdi svarta fólkið, men tapti hetta avgerandi talvið.
2007 – John Rødgaard
John Rødgaard, VT ½ 1 1½
Martin Poulsen, HT ½ 0 ½
Aftur tvey kviktalv eftir somu reglum sum árini fyri.
2020 – Høgni Egilstoft Nielsen
Høgni Egilstoft Nielsen, ST 0 1 / 1 1 3
Luitjen Akselsson Apol, HT 1 0 / 0 0 1
Fyrst tvey kviktalv, tað endaði javnt, síðani tvey snartalv, tá vann Høgni.
2021 – Høgni Egilstoft Nielsen
Høgni Egilstoft Nielsen, ST 1 0 / ½ 1 2½
Martin Poulsen, HT 0 1 / ½ 0 1½
Og sama uppskrift sum árið fyri; javnt í kvikdystinum, men Høgni ger bart í snardystinum.
Umdystur í morgin
18 ára gamli Luitjen Akselsson Apol koppaði favorittinum Høgna Egilstoft Nielsen í síðsta umfari á Giljanesi í dag. Nú verður umdystur millum Luitjen, Høgna og Rógva í morgin.
Tað var stórt drama á síðsta leikdegi í FM-kappingini í talvi í dag. Endin var, at tríggir gjørdust javnir í oddanum í Landsliðsbólkinum, og teir fara í morgin at telva umdyst um FM-heitið.
Tað vera brøðurnir Rógvi og Høgni Egilstoft Nielsen og Luitjen Akselsson Apol, sum fara undir avgerandi FM-tríumdyst í morgin leygardagin.
Við svarta fólkinum eydnaðist Luitjeni í longum talvi, sum vardi útivið fimm tímar, at basa Høgna Egilstoft Nielsen. Rógvi Egilstoft vann á Terja Petersen, og so endaðu allir tríggir javnir.
Í FM-umdystinum í morgin telva allir tvær ferðir hvør móti øðrum í kviktalvi, tað merkir, at hvør hevur eitt korter í part til talvið. Byrjað verður klokkan 14.
Landsliðsbólkurin (síðsta umfar):
Høgni – Luitjen 0 – 1
Terji – Rógvi 0 – 1
Ingi – Hans Kristian 0 – 1
Einar – Torkil 1 – 0
Endaliga støðan (landsliðsbólkurin)
Luitjen Akselsson Apol, HT 5½ stig
Høgni Egilstoft Nielsen, ST 5½
Rógvi Egilstoft, ST5½
Ingi Wiberg, ST 3
Torkil Nielsen, ST 2½
Terji Petersen, KTF 2
Einar Gregersen, KTF 1½
Almenni bólkurin
Vinnari í almenna bólkinum gjørdist Elias Petersen úr Havnar Telvingarfelag. Við góðum spurti yvirhálaði hann Rók Davidsen úr Klaksvíkar Talvfelag, sum fekk eina flúgvandi byrjan. teir endaðu javnir, men Elias vinnur við betri mótstøðustigum. Í almenna bólkinum er ikki umdystur, um tað stendur á jøvnum í oddanum.
Topp 3
1. Elias Petersen, HT 6
2. Rókur Davidsen, KTF
3. Eyðun Lamhauge, Kongshavnar Talvfelag 4½
Í alt 17 telvarar
Søguligur sigur
Í unglingabólkinum vann 9 ára gamla Lisa J. Xin úr Havnar Telvingarfelag. Hon var einsamøll genta í flokkinum, og vann.
Hon er samstundis yngsti FM-vinnari í unglingabólkinum.
Olaf Berg var 12 ára gamal, tá hann vann unglingameistaraheitið í 1999.
9 ára gamla Lisa J. Xin úr Havnar Telvingarfelag. Yngsti unglingaføroyameistari í talvi nakrantíð.
Unglingar – topp 3
1. Lisa J. Xin, HT 6 stig
2. Hanus á Lógv, KTF 5
3. Bogi á Kósini, KTF 5
Í alt 16 telvarar.
Veteranar
Kappingina fyri veteranar vann Henrik W. Joensen úr Kongshavnar Talvfelag. Hann fekk 5½ stig. Nummar tvey var Sigurð B. Justinussen úr Havnar Telvingarfelag við 5 stigum, og nummar trý var Jónfinn Thomsen úr Sandavágs Talvfelaf við 4½ stigi.
Talváhugað fara ivaleyst at fylgja við aftur í morgin, tá umdystirnir koma fyri. Fylgjast kann við leik fyri leik á heimasíðu Talvsambandsins: faroechess.com.
Umdystur í FM í talvi
FM í talvi hevur verið telvað seinasta vikuna. Eftir 7. og seinasta umfar endaðu Luitjen A. Apol, Rógvi Egilstoft og Høgni Egilstoft Nielsen javnir við 5,5 stigum hvør, og tí skal umdystur til, fyri at finna føroyameistaran 2024.
Umdystur verður telvaður í skúlanum á Giljanesi klokkan 14. leygardagin 30. marts. Umdysturin verður skipaður soleiðis, at allir telva móti hvørjum øðrum bæði við hvítum og svørtum. T.v.s. 6 talv tilsamans. Telvað verður við tíðini 15 minuttir + 10 sekund fyri hvønn leik.
Um framvegis stendur á jøvnum, verður telvað við tíðini 3 minuttir + 2 sekund.
Fylgjast kann við beinleiðis her: https://live.faroechess.com
Stóri FM-talvkongurin
Palli Henriksen (1902-1980). Hevur metið við níggju FM-sigrum í einstaklingstelving.
Í hesum døgum verður kappast um árliga føroyameistaraheitið í talvi. FM-einstaklingakappingin hevur verið á hvørjum ári síðani 1972 kring páskirnar, men søgan er longri enn so.
Fyrstu FM-kappingarnar vóru longu fyri seinna heimsbardaga. Tá var bara eitt veruligt talvfelag í landinum og einki Talvsamband. FM-kappingarnar frá 1938 til 1956 vórðu tí í høvuðsheitum ein kapping millum havnarmenn um hvør av teimum var bestur.
Avbygdamonnum stóð kortini frítt at vera við, tí her var talan um almenna FM-kapping. Og nakrir bitu á.
Í 1948 var vágbingurin Thorstein Vilhelm við, í 1953 miðvingurin Hans Arni Ellefsen, og í 1956 tvørámaðurin Mervyn Dimon. Allir tríggir vóru góðir telvarar, men teir høvdu rímiligt ikki somu royndirnar sum hinir.
Hví hesar FM-kappingarnar hildu uppat í 1956, er eitt sindur óvist. Hetta var annars tíðin, tá ið talvfeløg verða stovnað víða hvar um landið. Um somu tíð harðnar kappingin um Woodborðið, sum feløgini høvdu sum eitt slag av landskapping sínamillum í 50-unum og 60-unum. Men FM-einstaklingakappingin sovnar, og kemur ikki afturíaftur fyrr enn Talvsamband Føroya verður stovnað í 1970. Byrjað var sum nevnt í 1972, og síðani hevur ikki verið helmað í.
Palli skaraði framúr
Ein telvari skarar framúr millum allar FM-kongarnar hesi árini. Og tað er Palli Henriksen.
Hann var frá fyrsta stovningardegi Havnar Telvingarfelags í 1923 hin besti telvarin í felagnum. Í 40-árunum fekk hann veruligar javnlíkar at kappast ímóti, fyrst og fremst Olav Andreasen og Tórarinn Evensen, men tey árini, ið hann var mest virkin, var hann hin veruligi talvkongurin í Havn og í øllum Føroyum við. Í 50-unum tóktist tað, sum at Tórarinn Evensen, sum var hin yngsti av teimum trimum FM-vinnarunum tey árini, yvirhálaði gamla meistaran.
Palli Henriksen var eisini politikari og býráðsformaður í Havn í 40- og 50-árunum, hetta var um somu tíð, sum hann var føroyameistari. Hann sat sum borgarstjóri í tveimum skeiðum, fyrst frá 1944 til 1948, og síðani aftur frá 1952 til 1957.
Palli Henriksen búði úti á Reyni. Sonurin, Jákup Henriksen, var eisini av bestu telvarum í Føroyum, men vann ongantíð FM-heitið.
Palli Henriksen vann FM-heitið í alt níggju ferðir. Enn ganga nøkur ár til nakar fær hann aftur. Helgi Dam Ziska hevur higartil vunnið FM-heitið seks ferðir, og Høgni Egilstoft Nielsen kann í dag vinna sítt fimta FM-heiti, tá seinasta umfar í ársins FM-kapping verður vesturi á Giljanesi.
Kanska verður tað annar av teimum, sum einaferð tekur metið hjá gamla talvkonginum. Palli doyði í 1980, 78 ára gamal.
FM-vinnarar í talvi (1938-2023)
1938 Palli Henriksen, HT
1939 Palli Henriksen, HT
1940 Olav Andreasen, HT
1941 Olav Andreasen, HT
1943 Olav Andreasen, HT
1945 Palli Henriksen, HT
1946 Palli Henriksen, HT
1947 Tórarinn Evensen, HT
1948 Palli Henriksen, HT
1949 Palli Henriksen, HT
1950 Palli Henriksen, HT
1951 Palli Henriksen, HT
1952 Palli Henriksen, HT
1953 Tórarinn Evensen, HT
1955 Tórarinn Evensen, HT
1956 Tórarinn Evensen, HT
1972 Hans Petersen, VT
1973 Súni Ziska, HT
1974 Luitjen Apol, HT
1975 Luitjen Apol, HT
1976 Luitjen Apol, HT
1977 Hanus Joensen, KT
1978 John Jacobsen, VT
1979 Jens Chr. Hansen, TT
1980 Súni Ziska, HT
1981 Jens Chr. Hansen, TT
1982 Jens Chr. Hansen, TT
1983 Andrias Ziska, HT
1984 Torkil Nielsen, ST
1985 Jens Chr. Hansen, TT
1986 Torkil Nielsen, ST
1987 Bogi Ziska, STF
1988 Torkil Nielsen, ST
1989 Heini Olsen, KTF
1990 Steintór Rasmussen, KTF
1991 Heini Olsen, KTF
1992 Heini Olsen, KTF
1993 Heini Olsen, KTF
1994 Torbjørn Thomsen, KT
1995 Eyðun Nolsøe, KTF
1996 Rógvi W. Rasmussen, HT
1997 Rani Nolsøe, KTF
1998 John Rødgaard, VT
1999 Heini Olsen, KTF
2000 Flóvin Tór Næs, HT
2001 John Rødgaard, VT
2002 Hans Kristian Simonsen, KT
2003 Martin Poulsen, HT
2004 Martin Poulsen, HT
2005 Carl Eli N. Samuelsen, VT
2006 Martin Poulsen, HT
2007 John Rødgaard, VT
2008 Helgi Dam Ziska, HT
2009 Martin Poulsen, HT
2010 Olaf Berg, ST
2011 Helgi Dam Ziska, HT
2012 Rógvi Egilstoft Nielsen, ST
2013 Olaf Berg, HT
2014 Høgni Egilstoft Nielsen, ST
2015 Rógvi Egilstoft Nielsen, ST
2016 Rógvi Egilstoft Nielsen, ST
2017 Helgi Dam Ziska, HT
2018 Helgi Dam Ziska, HT
2019 Helgi Dam Ziska, HT
2020 Høgni Egilstoft Nielsen, ST
2021 Høgni Egilstoft Nielsen, ST
2022 Høgni Egilstoft Nielsen, ST
2023 Helgi Dam Ziska, HT
FM-toppurin
Teir, sum hava verið føroyameistarar tríggjar ferðir ella oftari, eru hesir:
Palli Henriksen, HT 9
Helgi Dam Ziska, HT 6
Heini Olsen, KTF 5
Høgni Egilstoft Nielsen, ST 4
Martin Poulsen, HT 4
Jens Chr. Hansen, TT 4
Tórarinn Evensen, HT 4
Rógvi Egilstoft Nielsen, ST 3
Torkil Nielsen, ST 3
John Rødgaard, VT 3
Luitjen Apol, HT 3
Olav Andreasen, HT 3