Talvsamband Føroya Faroechess
Skipað verður fyri 2 kappingum á netinum um ársskiftið.
Seinastu Tíðindini
Talvkapping á netinum
Í kvøld kl. 19.00 verður talvkapping á netinum. Telvað verður 9 umfør við tíðini 3 min. + 2. sek.
Útsettu dystirnir telvaðir
Fleiri dystir í landskappingini í talvi komu upp í røkur av illveðrinum, sum var vikuskiftið 23.-24 november, tá fjórða umfar í liðkappingini var á skránni.
Nú hevur eydnast at avgreiða allar útsettu dystirnar í øllum deildunum.
JANUS OPEN
JANUS OPEN
17. januar 2025 – 19. januar 2025
Skipað verður fyri minningartalvkapping í Kolshøll á Eiði vikuskiftið 17. januar – 19. januar 2025. Janus í Løðuni var ein týðandi partur av talvfelagnum Róki, og vilja vit tí við hesi kapping minnast Janus, sum bleiv tikin frá okkum alt ov tíðliga. Janus andaðist 6. juli 2024, einast 46 ára gamal.
Stað
Kolshøll, Kolsvegur 8, 470 Eiði.
Skipan
Kappingin er partur av GP kappingini 2024/25 hjá TSF. Kappingin er opin fyri øllum telvarum, ið hava minni enn 2400 í rating. Telvað verður soleiðis:
1. – 3. umfar fríggjdagin 17. januar klokkan 18.00
4. umfar leygardagin 18. januar klokkan 10.00
5. umfar leygardagin 18. januar klokkan 14.00
6. umfar sunnudagin 19. januar klokkan 13.30
7. umfar sunnudagin 19. januar klokkan 17.00
Tíð
1. – 3. Umfar verður telvað við tíðini 10 min. + 5 sek. pr. leik
4. – 7. Umfar verður telvað við tíðini 60 min. + 30 sek. pr. leik
Vinningar
Samlaðu vinningarnir verða 25.000 kr.
Nr. 1: 5.000 kr.
Nr. 2: 3.000 kr.
Nr. 3: 2.000 kr.
2 x ratingsvirðislønir eru í hvørjum bólki á 1.000 kr. og 500 kr. Bólkarnir eru hesir:
undir 2200, undir 2000, undir 1800, undir 1600, einki ratingtal, besta kvinna, fødd eftir 2013 (u12), fødd eftir 2009 (u16), fødd áðrenn 1976, fødd áðrenn 1961.
Tilmelding
Tilmelding fer fram við at senda teldupost til kappingarleidarin@faroechess.com. Upplýsast skal fult navn og føðidato. Luttøkugjaldið er 100 kr. Pengarnir skulu flytast á kontonr. 6460-152.368.8. Seinasta freist at melda seg til er hósdagin 16. januar kl. 12.00.
Tilmelding higartil: Tilmeldingar
Fríumfar
Møguleiki er at biðja um upp til 3 frí umfør. Fyri hvørt frí umfar fær telvarin 0,5 stig. Um ynski er um frí umfar 1. umfar, skal hetta biðjast um skrivliga við at skriva til kappingarleidarin@faroechess.com. Hini umførini skal dómarin hava boðini skrivliga. Biðjast skal um frí umfar áðrenn parað verður. 7. umfar er ikki møguligt at biðja um frí umfar.
Vónandi verður stuðlað væl undir talvkappingini, soleiðis at vit verða fleiri, sum koma saman at minnast Janus.
Tilmeldingar higartil kunnu síggjast her.
Invitation til Janus Open – dansk
Invation to Janus Open – English
Innbjóðing á føroyskum – trýst her.
Við talvkvøðu
Talvfelagið Rókur
Úrslit frá FM fyri gentur
Tann 30. november var FM í talvi fyri gentur hildið í Kolshøll á Eiði. 5 umfør vóru telvað, og 6 gentur kappaðust um FM heitið, umframt úttøku til norðurlandameistaraskapið fyri gentur. NM verður í 2025 í Danmark. Les meira »
Føroyar nummar 74 av 203 londum
Telvararnir á OL-landsliðnum eru rímiligt væl umboðaðir á føroyska topp 5 styrkilistanum í desember-yvirlitinum hjá altjóða talvsamgonguni FIDE. F.v.: Luitjen Akselsson Apol, Høgni Egilstoft Nielsen, John Rødgaard, Helgi Dam Ziska og Rógvi Egilstoft.
Bara smærri broytingar eru at síggja á nýggjasta føroyska styrkilistanum í talvi, sum altjóða talvsambandið FIDE hevur kunngjørt.
Tveir kenningar eru komnir afturíaftur. Á desember-listanum eru John Arni Nilssen og Olaf Berg aftur at síggja. Tað merkir, at teir hava aftur sett seg við talvborðið eftir steðg í meira enn eitt ár. John Arni telvar í donsku landskappingini, og Olaf Berg var herfyri aftur á 1 liði hjá Havnar Telvingarfelag í útidysti móti Klaksvík.
Føroyar standa nummar 74 í røðini av teimum 203 londunum, sum eru limir í altjóða talvsambandinum. Grundarlagið undir hesum yvirliti er miðalstyrkitalið hjá fremstu tíggju telvarunum hjá øllum limalondunum. Á talvolympiaduni í Budapest í september endaðu Føroyar nummar 52 av 188 liðum. Tað er besta føroyska úrslit í talv-OL.
Tey ellivu feløgini, sum í vetur kappast í landskappingini, hava skrásett í alt 424 virknar telvarar í Føroyum.
Í topp 15 yvirlitinum niðanfyri eru fýra, sum dagliga telva í donskum feløgum. Teir eru John Arni Nielsen, John Rødgaard, Flóvin Tór Næs og Jóan Hendrik Andreasen. Á okkara yvirliti eru teir kortini skrásettir í sínum føroysku feløgum.
15 teir bestu (desember 2024)
1. GM Helgi Dam Ziska, HT 2545
2. IM Høgni Egilstoft Nielsen, ST 2390
3. IM John Arni Nilssen, ST 2330
4. Luitjen Akselsson Apol, HT 2305
5. Rógvi Egilstoft, ST 2287
6. Martin Poulsen, HT 2262
7. IM John Rødgaard, 2255
8. Ólavur Simonsen, KTF 2193
9. Carl Eli Samuelsen, HT 2190
10. Flóvin Tór Næs, HT 2187
11. Jóan Hendrik Andreasen, HT 2182
12. Bogi Ziska, TT 2178
13. Olaf Berg, HT 2172
14. Eyðun Nolsøe, KTF 2159
15. Sjúrður Thorsteinsson, HT 2155
Nummar tólv í norðurlondum
Á føroyska listanum skarar stórmeistarum Helgi Dam Ziska framúr. Kaga vit at desember-listunum í norðurlendsku grannalondunum, sæst, at Helgi stendur sum nummar tólv í øllum norðurlondum.
Norra við heimsins besta telvara á odda er rímiligt fremsta norðurland í talvi. Norra er nummar 17 í heiminum. Fimm norskir telvarar hava hægri styrkital enn føroyski stórmeistarin.
Í Danmark eru tríggir, sum hava meira enn 2550 í rating, í Svøríki tveir og í Finnlandi ein. Og hóast Ísland eigur trettan stórmeistarar, sum telva regluliga, er Helgi Dam Ziska fremri enn teir allir. Vignir Vatnar Stefansson er í løtuni sterkasti telvari í Íslandi. Styrkitalið er 2537.
Norra (17)
1. GM Magnus Carlsen 2831
2. GM Johan-Sebastian Christiansen 2661
3. GM Aryan Tari 2629
4. GM Jon Ludvig Hammer 2603
5. GM Simen Agdestein 2564
Danmark (33)
1. GM Jonas Buhl Bjerre 2642
2. GM Mads Andersen 2592
3. GM Jesper Søndergaard Thybo 2553
Svøríki (35)
1. GM Nils Grandelius 2641
2. GM Ferdinand Hellers 2585
Finnland (54)
1. GM Tomi Nyback (2587)
Og soleiðis sær topp 10 listin í øllum heiminum út í løtuni:
Topp 10 (desember 2024)
1. Carlsen (Norra) 2831
2. Caruana (USA) 2805
3. Nakamura (USA) 2802
4. Erigaisi (India) 2801
5. Gukesh (India) 2783
6. Abdusattorov (Usbekistan) 2777
7. Firouzja (Frakland) 2763
8. Nepomniachtchi (Russland) 2755
9. Wei (Kina) 2753
10. Anand (India) 2750
Á hægsta tindi
Áhugavert er at kanna, hvussu høg ratingtølini hava verið hjá okkara bestu telvarum. Nær toppaðu teir?
Vit hava funnið tólv, sum hava otað seg upp um 2300 í altjóða rating. Í løtuni eru fýra føroyskir telvarar, sum hava eitt styrkital omanfyri 2300.
Eitt lítið fyrivarni skal takast fyri, at tølini fyri aldamótið eru ikki almenn á heimasíðuni hjá altjóða talvsambandinum. Men okkum vitandi vóru styrkitølini ikki so høg tá sum nú. Tá var ofta heldur víst á føroysk tøl, í summum førum donsk tøl. Nú er alt altjóða ELO-tøl.
1. Helgi Dam Ziska 2555 (des. 2016)
2. John Arni Nilssen 2426 (okt. 2003 – apríl 2004)
3. Høgni Egilstoft Nielsen 2416 (des. 2019)
4. Rógvi Egilstoft 2387 (des. 2019)
5. John Rødgaard 2383 (juli-okt. 2008)
6. Heini Olsen 2382 (jan-apríl 2009)
7. Flóvin Tór Næs 2337 (okt. 2003)
8. Luitjen Akselsson Apol 2330 (okt. 2024)
9. Hans Kristian Simonsen 2330 (okt. 2005)
10. Martin Poulsen 2328 (juli 2007-apríl 2008)
11. Olaf Berg 2323 (nov. 2016)
12. Carl Eli Samuelsen 2311 (2008-2009)
Á hesum yvirliti er danin Leif Kristensen ikki íroknaður. Hann var virkin í føroyskari telving miðskeiðis í 80-unum, og telvaði á føroyska landsliðnum bæði í OL 1988 og í 8-landakappingini 1989. Ta ferðina hann vann á íslendinginum Jóhann Hjartarssyni, sum um somu tíð spældi seg í HM-fjórðingsfinaluna móti Anatolij Karpov. Leif Kristensen, sum er altjóða meistari, og eisini hevur telvað á danska landsliðnum, hevði 2385 í altjóða rating, tá hann hevði mest, og 2398 í danskari rating. John Rødgaard hevði í 1992 2410 í danskari rating.
Úttøka til NM fyri børn og ung
Sunnudagin 1. desember bleiv telvað um føroyameistaraheitið fyri børn og ung í Stranda skúla. Samstundis bleiv telvað um úttøku til NM, sum verður í Íslandi í februar 2025.
Eins og vanligt bleiv kappingin skipað í 5 bólkur. Talvsamband Føroyar sendir á hvørjum ári 10 børn og ung til NM kappingina. Tveir teir fremstu telvararnir i hvørjum bólki verða úttiknir. Í fleiri bólkur var stórur spenningur, og fleiri umdystir blivu telvaðir.
Stórsigur í útsettum dysti
Vágamenn leggja oddaliðið úr Havnar Telvingarfelag undir trýst.
Tað hefti ikki fyri hjá sandavágsmonnum í útsetta dystinum í 1 deild í landskappingini í talvi, sum var telvaður í Vágum í gjárkvøldið.
Úrslitið var 3½-½ til Sandavágs Talvfelag móti B-liðnum hjá Klaksvík. Sandavágur er tí bara eitt stig frá Havnini eftir at øll liðini í fremstu deildini hava telvað fýra dystir.
1 deild (4 umfar)
Sandavágur – Klaksvík (B) 3½ – ½
Høgni Egilstoft Nielsen – Haldur S. Johansen 1 – 0
Silas Eyðsteinsson – Wille Olsen ½ – ½
Jón í Horni Nielsen – Rani Nolsøe 1 – 0
Torkil Nielsen – Tummas M. Sólsker 1 – 0
Støðan í 1 deild
Havnin 13½ stig
Sandavágur 12½
Klaksvík 8½
Havnin (B) 5
Klaksvík (B) 5
Kollafjørður 3½
Kappingin liggur nú still til eftir nýggjár. Fimta umfar er 12 januar. Tá bresta oddaliðini Havnin og Sandavágur saman í fyrra sínamillum dystinum. Roknast kann við, at Rógvi Egilstoft verður við á liðnum hjá Sandavági til toppdystin í fimta umfari.
Fleiri dystir í hinum deildunum, sum vórðu útsettir fyri veður sunnudagin, eru framvegis ikki telvaðir.
Talvkalendarin 2024/2025 børn og ung
Innbjóðing: NM úttøku-finalan
Sunnudagin verður NM úttøku-finalurnar í ymsu aldursbólkunum telvaðar í skúlanum á Strondum. Byrjað verður klokkan 13.30