Talvsamband Føroya Faroechess
Havnin vann í dag í stórum stíli FM-finaluna í landskappingini móti meistaraliðnum hjá Sandavágs Talvfelag.
Havnarmenn høvdu knívin á barkanum fyri dystin í seinasta umfari á Giljanesi í dag, tí treytin var, at teir vunnu í minsta lagi 3-1, skuldu teir taka meistaraheitið frá vágamonnum. Úrslitið gjørdist 3½-½ til havnarmenn.
Liðskiparin Helgi Dam Ziska tók helst eina djarva, men gløgga avgerð, tá ið hann beitti tann einans fjúrtan ára gamla Luitjen Akselsson Apol á toppskjúttan Torkil Nielsen á 4. borði í finaluni í dag. Royndin eydnaðist til fulnar, tí tann gávuríki unglingin vann ógvuliga sannførandi við svarta fólkinum, og legði havnarliðið á odda 1-0.
Olaf Berg knógvaði líka sannførandi Silas Eyðsteinsson á triðja borði, og so var 2-0 til Havnina – og háspenningur í luftini. Á fremru borðunum gekk meira javnt á. Við góðari telving á 2. borði fekk Martin Poulsen við svarta fólkinum so líðandi bygt upp ein lítlan fyrimun móti Rógva Egilstoft Nielsen.
Á 1. borði tóktist Helgi Dam Ziska eisini at hava munin í støðuni, men Høgni Egilstoft Nielsen vardi seg væl, tó at hann var kroystur av tíðartroti. Fyrimunurin hjá Helga svann, og so beyð stórmeistarin Høgna remis. Høgni var kanska í so bráður at taka av, tí nú tóktist avgerðin í dystinum at vera fallin. Martin Poulsen stóð nú so væl á 2. borði, at øllum var greitt, at hann fór ikki at tapa talvið. Ógvuliga tryggur telvaði hann seg og Havnar Telvingarfelag til sigurs í dystinum.
Sandavágur – Havnin ½ – 3½
Høgni Egilstoft Nielsen – Helgi Dam Ziska ½-½
Rógvi Egilstoft Nielsen – Martin Poulsen 0-1
Silas Eyðsteinsson – Olaf Berg 0-1
Torkil Nielsen – Luitjen Akselsson Apol 0-1
Hinir dystirnir í 1. deild í dag:
Klaksvík – Havnin B 2-2
Kollafjørður – Vestmanna 2-2
Endaliga støðan í 1. deild:
Havnin 30 stig
Sandavágur 28½
Klaksvík 22
Havnin B 17
Kollafjørður 11½
Vestmanna 11
Størri frásøgn um seinasta umfar í landskappingini í talvi fyri feløg verður í morgin.
FM-manningin hjá Havnar Telvingarfelag 2020. F.v.: Carl Eli Samuelsen, Luitjen Akselsson Apol, Helgi Dam Ziska, Olaf Berg, Martin Poulsen og Sjúrður Thorsteinsson.
