Talvsamband Føroya Faroechess
10. og seinasta umfar í liðkappingini verður telvað í skúlanum á Giljanesi í Sandavági. Umfarið byrjar klokkan 12.00.
Tíðindi
Tillagingar í altjóða ratinglistunum hjá Fide
Frá í dag at rokna, 1. marts 2024, hevur Fide gjørt tillagingar í ratinglistunum.
Størstu broytingarnar eru fyri telvarar, ið hava undir 2000 í rating.
Innbjóðing: Samskip Open 2024
Kongshavnar Talvfelag bjóðar til GP 9, Samskip Open, vikuskiftið 1.-3. mars 2024, og aftur í ár eru góðir vinningar at vinna.
Stað:
Í Skúlanum við Løkin
Telvað verður soleiðis:
Kappingin byrjar fríggjadagin, 1. mars kl. 19.00, tá ið 3 kvik talv verða telvað (10 min. + 5 sekund fyri hvønn leik).
Leygardag verða 4. og 5. umfar telvað, kl. 10.00 og kl. 15.00.
Sunnudag verða 6. og 7. umfar telvað, kl. 12.30 og kl. 16.30. Les meira »
Óvæntað úrslit
Hvørki av oddaliðunum í landskappingini í talvi vunnu í dag. Havnar Telvingarfelag styrkti um leiðsluna í oddastríðnum í næstsíðsta umfari í dag. Afturímóti harðnaði stríðið millum aftaru liðini, sum royna at lívbjarga sær í deildini. Stóri sigursharrin í 1. deild í dag var Klaksvíkar Talvfelag.
FM-spenningurin fánaði
Nú skal vilja illa til hjá havnarmonnum, vinna teir ikki FM-heitið í talvi um tvær vikur.
At hvørki havnarmenn ella sandavágsmenn fóru at vinna sínar dystir í dag, mundi fáur væntað.
Klaksvíkingar spiltu báðum spælið.
Annað lið hjá Klaksvíkar Talvfelag tók øll á bóli og vann á føroyameistaranum úr Sandavágs Talvfelag. FM-manningin úr Vágum var eitt sindur skerd í dag. Silas Eyðsteinsson hevði forfall, og Jón í Horni Nielsen var sjúkur, men tað er tað, sum kann henda.
Torkil Nielsen og Ingi Wiberg máttu tí av B-liðnum upp á A-liðið, men báðir taptu. Broytingin bøtti rímiligt heldur ikki um fyritreytirnar hjá øðrum liði hjá vágamonnum, sum var fyri dyggum ósigri í Havn.
Søti sigurin hjá klaksvíkingum á Sandavági er hin fyrsti hjá felagnum í fleiri ár. Heðin Gregersen og Ingolf Gaard vunnu á aftaru borðunum. Wille Olsen tryggjaði klaksvíkingum sigurin við at telva remis móti Høgna Egilstoft Nielsen.
Javnt millum Havnina og Klaksvík
Havnarmenn kundu gjørt bart í dag og vissað sær FM-heitið longu fyri seinasta umfar, men teir kendu heldur ikki sína vitjunartíð. Dysturin millum A-liðini hjá Havnini og Klaksvík á Finsen endaði javnur 2-2. Stórmeistarin legði havnarmenn á odda við at vinna á 1. borði skjótt og væl.
Á aftaru borðunum eydnaðist báðum Ranunum at halda tørn, og Terji Petersen gjørdist dagsins hetja á øðrum borði móti Martin Poulsen. Martin hevði evarska lítlan fyrimun og kýtti seg at vinna, men misti tráðin í tíðneyðini og endaði við at tapa.
B-liðið hjá Havnini vann stórsigur á B-liðnum hjá vágamonnum. Havnin 2 hevði styrkt seg við NM-silvurvinnaranum Luitjen Akselsson Apol á 1. borði. Úrslitini í 1. deild í dag bera í sær, at størri spenningur er í botnstríðnum enn í oddastríðnum fyri seinasta umfar.
Nú standa havnarmenn seg við eittans stigi í dystinum móti Sandavági í seinasta umfari. Vágamenn mugu vinna 3½-½, skulu teir endurvinna FM-heitið. Tað er ikki ómøguligt, men lítið trúligt.
1. deild – 9. umfar (25. februar)
Havnin (1) – Klaksvík (1) 2 – 2
Helgi Dam Ziska – Ólavur Simonsen 1 – 0
Martin Poulsen – Terji Petersen 0 – 1
Carl Eli Samuelsen – Rani Baldursson ½ – ½
Sjúrður Thorsteinsson – Rani Nolsøe ½ – ½
Klaksvík (2) – Sandavágur (1) 2½ – 1½
Haldur S. Johansen – Rógvi Egilstoft 0 – 1
Wille Olsen – Høgni Egilstoft Nielsen ½ – ½
Heðin Gregersen – Torkil Nielsen 1 – 0
Ingolf Gaard – Ingi Wiberg 1 – 0
Havnin (2) – Sandavágur (2) 3½ – ½
Luitjen Akselsson Apol – Jón Atlason 1 – 0
Herluf Hansen – Jónfinn Thomsen 1 – 0
Suni Merkistein – Johnny Petersen ½ – ½
Heiðrikur Jacobsen – Hjalti Petersen 1 – 0
Støðan í 1. deild (eftir 9 umfør):
Havnin (1) 29 stig
Sandavágur (1) 26½
Klaksvík (1) 17½
Klaksvík (2) 12½
Sandavágur (2) 11½
Havnin (2) 11
Úrslitini í hinum deildunum í dag eru ikki tøk enn. Meira verður at frætta seinni á heimasíðu Talvsambandsins: faroechess.com.
Landskappingin í talvi endar 9. mars. Í 1. deild verður telvað soleiðis:
1. deild – 10. umfar (9. mars)
Sandavágur (1) – Havnin (1)
Klaksvík (1) – Havnin (2)
Sandavágur (2) – Klaksvík (2)
Úrslit & myndir: BGP7 í Kollafirði
Kvik-talvkapping var fyri børn í Kollafjarða skúla í gjár, 25. februar. Hettar var 7. av 10 Barna Grand Prix kappingum, sum TSF í samstarvi við talvfeløgini kring landið skipa fyri. 28 børn tóku lut hesuferð í tveimum aldursbólkum. 4. fl. og yngri og 5. fl. og eldri. Kappingin vardi 6 umfør. Les meira »
Endaspurturin byrjar
Vágamenn og havnarmenn í avgerandi dysti um FM-heitið í talvi.
Í morgin sunnudagin verður farið undir dystirnar í níggjunda og næstsíðsta umfari í landskappingini í talvi fyri feløg.
Tvey stig eru á muni millum oddaliðini Havnar Telvingarfelag og Sandavágs Talvfelag, sum hittast í síðsta umfari um tvær vikur.
Í morgin fæst so greiði á, hvørjar fyritreytirnar fyri avgerandi innanhýsis dystin í síðsta umfari verða – verður núverandi munurin standandi óbroyttur, økist hann ella styttist hann?
Havnarmenn hava ivaleyst heldur torførari dyst enn sandavágsmenn í morgin. Báðir FM-biðlarnir hava klaksvíkingar ímóti sær; Havnin telvar móti 1. liði hjá Klaksvík, Sandavágur hevur dyst móti B-liði felagsins. Tað er tó at siga, at munurin á báðum klaksvíksliðunum í 1. deild er ikki eins stórur og munurin á báðum liðunum, sum Havnin og Sandavágur hvør hava í bestu deildini.
Telvað verður soleiðis í 1. deild í morgin:
1. deild – 9. umfar (25. februar 2024)
Havnin (1) – Klaksvík (1)
Klaksvík (2)- Sandavágur (1)
Havnin (2) – Sandavágur (2)
Støðan í 1. deild:
Havnin 27 stig
Sandavágur 25
Klaksvík 15½
Sandavágur (2) 11
Klaksvík (2) 10
Havnin (2) 7½
Suveren oddalið
Úrslitini tala. Oddaliðini bæði eru í flokki fyri seg.
Havnarmenn hava ásannað, at skulu teir taka meistaraheitið frá vágamonnum, krevst einki minni enn ein óvanliga góð úrtøka á hvørjum borði.
Við undantaki av fyrra innanhýsis dystinum millum Havnina og Sandavág, sum endaði javnur, hevur oddaliðið fingið ikki minni enn 3½ stig í hvørjum av hinum dystunum. Vágamenn hava vunnið sínar dystir 3-1 ella meira.
Havnarmenn hava bara tapt eitt av 32 talvum higartil, vágamenn tvey.
Innanhýsis úrtøkan hjá oddaliðunum báðum er henda:
Havnin
Helgi Dam Ziska 6½/7
Martin Poulsen 2/2
Carl Eli Samuelsen 5/7
Luitjen Akselsson Apol 5½/7
Sjúrður Thorsteinsson 7/8
Suni Merkistein 1/1
Sandavágur
Rógvi Egilstoft 6/7
Høgni Egilstoft Nielsen 7/8
Silas Eyðsteinsson 4½/7
Torkil Nielsen 2½/3
Jón í Horni Nielsen 5/7
Aðruhvørja ferð
Ikki síðani 2010 hevur annað felag enn tey í Sandavági og í Havn vunnið FM. Tá vann Klaksvíkar Talvfelag. Síðani hava vágamenn og havnarmenn verið einsamallir um oddastríðið.
Seinastu seks árini hava feløgini vunnið aðruhvørja ferð:
FM-vinnarar í talvi 1. deild 2018-2023
2018 HT
2019 ST
2020 HT
2021 ST
2022 HT
2023 ST
Hinar deildirnar
Í 2. deild er Kollafjarðar Talvfelag á odda. Runavíkingar eru teir einastu, sum hótta.
Í 3. deild eru toftamenn klárt á odda, og hava at kalla tryggjað sær uppflyting.
Í 4. deild hevur Havnar Telvingarfelag verið á odda allan vegin.
Mesti spenningurin er í unglingadeildini. Har kann alt henda.
2. deild (topp-3)
Kollafjørður 20 stig
Kongshavn 16½
Havnin 16
3. deild (topp-3)
Toftir 25½ stig
Sandavágur 17
Rókur 15½
4. deild (topp-3)
Havnin 24 stig
Klaksvík 20
Klaksvík/Strendur 19½
Unglingar
Gøta 16 stig
Sandavágur 15½
Havnin 15½
Innbjóðing til TT-Kvik 2024
7. GP-kapping í hesum kappingarári verður telvað í talvhølunum hjá Tofta Talvfelag komandi leygardag, 24. februar. Øll eru vælkomin at luttaka í kappingini.
Innbjóðing: BGP7 í Kollafirði
Komandi leygardag, 24. februar, verður kviktalvkapping fyri børn í Kollafjarðar Skúla. Talan er um 7. kapping út av 10, har ið børnini kunnu samla stig saman til eina samlaða Grand Prix kapping. Kappingin í Kollafirði byrjar kl. 10:00. 6 umfør verða í tveimum aldursbólkum (4 fl. og yngri og 5. fl. og eldri) við tíðini á klokkuni á 10min + 5 sek. Les meira »
Luitjen næstbestur í NM
18 ára gamli Luitjen Akselsson Apol úr Havnar Telvingarfelag var næstfremstur í sterkasta bólkinum í norðurlandameistarakappingini í talvi fyri unglingar, sum endaði í dag.
Hin føroyski telvarin í A-bólkinum, Jón í Horni Nielsen, úr Sandavágs Talvfelag, stóð seg eisini væl, og rakk einum fjórða plássi.
NM dagur 3
Í A bólkinum var einki at seta fingurin á í dag. Jón telvaði væl og fekk veruliga gongd á taktisku kombinatiónirnar og vann bæði talvini í dag ímóti sterkari mótstøðu.
Luitjen hevði medalju kjansir tá dagurin byrjaði og hesum fór hann eftir við heilum huga. Luitjen vann bæði talvini í dag og tryggjaði sær annaðplássi. Luitjen endar nr. 2 við 4,5 stigum og Jón nr. 4 við 3,5.
Í B bólkinum fekk Rókur ein sigur uttan talv í morgun og Elias hevði eitt flott talv, men misti tíverri á stokkinum.
Seinnapartin telvaðu teir báðir javnt sínamillum og endaðu á 1,5 í part.
Í C bólkinum tapti Emil tíverri bæði talvini í dag og endar við 0,5 stigum
Petur fekk remis í morgun og stríddist fyri at halda tí seinna javnt, men mátti tíverri lúta. Petur endar á 1,5 stigum.
Í D bólkinum riggaði einki í dag. Bæði Oskar og Andrias telvaðu væl og høvdu fínar støður. Tíverri var mótstøðan ov sterk og taptu báðir bæði talvini. Teir enda á 0,5 stigum í part.
Í E bólkinum var hetta dagurin har flest møguleikar fóru fyri skeyti. Bæði Baldur og Lisa telvaðu neyvt og høvdu løtur við yvirvág í talvunum. Tíverri taptu tey eisini bæði talvini.
Lisa endar á 2 stigum og Baldur 1,5.
Samlaða úrtøkan hjá føroyingum gjørdist 17,5 stig.
