Tíðindi

Luitjen Akselsson Apol hevur nú fingið glið á í EM-kappingini í Georgia. Í dag vann hann annan dagin á rað.

Vertstjóðin Georgia hevur heili fýra lið við í EM-stevnuni í Batumi. Talv hevur djúpar røtur í landinum. Har yðjur í telvarum. Hóast íbúgvaratalið einans liggur um slakar fýra milliónir, so duga flest øll í landinum at telva. Nógvir góðir telvarar eru haðani. Í nógv ár dugdu eingi konufólk so væl at telva sum tær bestu í Georgia. Nona Gaprindashvili var best í heiminum í drúgt áramál, hon sigst vera fyrimynd til kvinnutalvúrmælingin í filminum “Queens gambit”, sum nógv hava sæð á Netflix. Og henni á baki kom Maja Chiburdanidze. Í 2018 hýsti Georgia talvolympiaduni, og í ár skipa teir fyri EM-stevnuni. Georgia, sum í síni tíð var partur av sovjetiska talvskúlanum, er rættilig talvtjóð.

Georgia hevur sum nevnt fýra lið í almennu røðini í EM. A-liðið tapti í dag 3-1 fyri Onglandi, B-liðið spældi 2-2 móti Danmark, C-liðið vann 2½-1½ á Føroyum, og D-liðið spældi 2-2 móti Kosovo.

Glæman á føroyska liðnum í dag var Luitjen Akselsson Apol. Hann telvaði væl og vann sannførandi annan dagin á rað við hvíta fólkinum. Rógvi telvaði remis. Høgni noyddist tíverri at dvína á 1.borði, og Martin tapti annan dagin á rað. Martin hevði annars fína støðu, og átti uttan iva at vunnið, men var ikki mentur at loysa gátuna. Hjá siglandi manni sum Martini trýtur kanska neyðuga dystarvenjingin til so krevjandi kapping sum hesa.

Georgia (3) – Føroyar 2½ – 1½

Luka Kiladze 2370 – IM Høgni Egilstoft Nielsen 2389 1 – 0

Daviti Nemadze 2348 – Luitjen A. Apol 2318 0 – 1

Akaki Qalichava 2333 – Rógvi Egilstoft 2304 ½ – ½

Nikolozi Shamatava 2296 – Martin Poulsen 2276 1 – 0

Ísland sunnudagin

Í morgin leygardagin er frídagur í EM-kappingini. Trý umfør eru eftir. Telvað verður sunnudagin, mánadagin og týsdagin.

Av tí at Írland og Skotland telvaðu 2-2 í dag, fór Írland framum okkum. Vit hava tí bara Skotland aftanfyri okkum. Skulu vit fáa nakað annað lið afturum okkum, mugu vit fáa okkurt dystarstig aftrat – t.v.s. antin spæla javnt ella vinna onkran av teimum trimum dystunum, sum eftir eru. Við øðrum orðum mugu vit fáa í minsta lagi tvey stig í einum av írestandi dystunum.

Sunnudagin er tað Ísland. Tað verður ikki lætt, men uppgávan er tó ikki heilt ómøgulig. Í OL í Tromsø í 2014 fingu vit 2-2 móti Íslandi. Olaf Berg vann tá í fløktum talvi á triðja borði, tí endaði dysturin javnur. Annars hava vit altíð tapt fyri íslendingum í EM ella OL. Vit kunnu harmast um, at okkara stórmeistari ikki er við, tí Helgi Dam Ziska hevur hægri styrkital enn allir telvarar í Íslandi.

Ukraina er enn á sigurskós í EM. Í dag vunnu teir tepran sigur á Fraklandi. Í øðrum toppdysti vann Holland á Serbia. Fremstu fimm liðini í løtuni eru Ukraina, Holland, Aserbadsjan, Rumenia og Ongland.

Føroyska talvlandsliðið fekk ein søtan EM-sigur í Georgia í fimta umfari í gjár hósdagin.

Tað eydnaðist við bit og slit at vinna lykladystin móti Skotlandi. Luitjen Akselsson Apol og Rógvi Egilstoft vunnu, Høgni Egilstoft Nielsen telvaði remis, og Martin Poulsen tapti. 

Sigurin ber í sær, at Føroyar hava lagt Skotland og Írland afturum seg.

Les meira »

Føroyska talvlandsliðið tapti í dag 3-1 fyri Finnlandi í fjórða umfari í EM-stevnuni í Georgia. Brøðurnir Høgni og Rógvi telvaðu báðir remis við hvíta fólkinum, men vóru teir eitt sindur stinnari, vunnu báðir. 

Finnland var favorittur at vinna dystin. Á øllum borðum høvdu teir altjóða meistarar við hægri styrkitølum enn okkara mótstøðumenn. 3-1 til Finnland kemur tí ikki av ongum, kortini kunnu vit harmast, at byrurin ikki var okkum blíðari. 

Høgni fekk hættisligt álop á finska kongin, men misti tráðin, tá ið á stóð, kanska var ov knøpp tíð at finna avgerandi álopsleikirnar. Ein av ónollunum hjá føroysku telvarunum er, at teir hugsa ov leingi um hvønn einstakan leik, og enda tí aloftast í svárari tíðarneyð. Tað kemur ofta aftur um brekkur.

Rógvi kom væl frá sínum talvi og hevði vunnið rókaendatalv, men tíverri var hann ikki nóg neyvur – knappa tíðin órógvaði helst eisini – og so endaði tað heldur snópisliga við remis.

Luitjen og Martin taptu. Luitjen misti tíðliga eina finnu, sum einki endurgjald fekst fyri, og so var mótbrekka. Martin spældi hollendskan Stonewall við svørtum, eina løtu var líkt til, at hann stóð væl, men finnlendingurin var kringari í miðtalvinum, og tá kom vend í.

Sum heild var føroyska avrikið aftur í linara lagi í dag. Botnstøðið tykist vera heldur lágt, og neyvleikin svíkur ov ofta.  

Brøðurnir Rógvi og Høgni Egilstoft Nielsen telvaðu báðir remis móti Finnlandi  í dag. Báðir høvdu eitt skifti greiðan fyrimun.

Føroyar – Finnland 1 – 3

IM Høgni Egilstoft Nielsen 2389 – IM Toivu Keinanen 2503 ½ – ½

Luitjen A. Apol 2318 – IM Vilka Sipila 2487 0 – 1

Rógvi Egilstoft 2304 – IM Dmitry Sklarov 2428 ½ – ½

Martin Poulsen 2276 – IM Tapani Sammalvou 2376 0 – 1

Lykladystur í morgin

Føroyar og Skotland eru nú aftast í kappingini við ongum dystarstigi. Vit hava tó munin í borðstigum. Og tað verður nettupp Skotlandi, sum vit møta í morgin.

Øllum man vera greitt, hvønn týdning hesin dystur hevur. Vit eru styrkismettir fremri, men munurin er ikki størri enn so, enn at vit kunnu eisini tapa fyri teimum.

Dysturin byrjar á middegi.

Serbia vann í dag toppdystin móti Grikkalandi og er tí einsamalt á odda við fullum stigatali. Toppdysturin í morgin verður millum Serbia og Ukraina. Serbia hevur átta stig, Ukraina sjey. Síðani eru sjey lond jøvn á triðja plássi við seks stigum, tey eru Grikkaland, Holland, Aserbadsjan, Frakland, Spania, Ongland og Slovenia.

Eftir dystirnar í sætta umfari leygardagin er frídagur sunnudagin. Kappingin endar 14. oktober.

Les meira »

Føroyar taptu eisini annan dagin í EM-kappingini í talvi 3½-½. Hesaferð móti Litava. Úrslitið kennist heldur snópisligt, tí møguleikar vóru fyri frægari úrtøku, tó at litavar høvdu sterkari telvarar á øllum borðum.

Tað var føroyameistarin Høgni Egilstoft Nielsen, sum bjargaði okkum hálva stignum í sera drúgvum talvi á 1. borði. Ikki færri enn 141 leikir vórðu fluttir, og góðir seks tímar gingnir, áðrenn javnleikurin var veruleiki. Tað er sjáldan, at talv gerast so drúgv. Litavski stórmeistarin treiskaðist so morðgírigur í endatalvinum, ið leingi tóktist vera javnt, at tað kendist vera á markinum fyri tí, sum er ítróttarliga sømiligt. Hóast Høgni hevði sera knappa tíð, ofta minni enn ein minutt til hvønn av seinastu hálvthundrað leikunum, var hann kortini mentur at varðveita hugsavningina og orkuna, ið kravdist til at fóta sær í drúgva talvinum. Flott, Høgni.

Verri gekst hinum trimum, tó at tað eina løtu luktaði av remis á báðum aftaru borðunum. Í stuttum kann sigast, at føroyska avrikið var ikki nóg gott í dag.

Høgni Egilstoft Nielsen avmyndaður í Batumi í dag. Maratontalvið móti Litava er júst byrjað. Tíbetur knógvaði føroyameistarin okkum eitt hálvt stig. Mynd: Ingvar Thor Johannesson.

Føroyar – Litava ½ – 3½

IM Høgni Egilstoft Nielsen 2389 – GM Valery Kazakouski 2581 ½ – ½

Luitjen A. Apol 2318 – GM Titas Stremavicius 2531 0 – 1

Rógvi Egilstoft 2304 – GM Paulius Pultinevicius 2532 0 – 1

Martin Poulsen 2276 – Gustas Morkunas 2324 0 – 1

Rógvi Egilstoft hevur sent hesa frásøgn frá dystinum í øðrum umfari:

Høgni kom tíðliga at standa verri. Mótstøðumaðurin offraði finnu fyri rúmari ræsum. Tað endaði við, at Høgni mátti lata báðar bisparnar fyri rók. Leingi var tap í hendi, men mótstøðumaðurin fann ikki røttu ætlanina, og Høgni fekk til endans strítt seg til ein javnleik eftir góðar 6 tímar við talvborðið.

Luitjen kom at síggja til væl burturúr byrjanini, men tá mótstøðumaðurin breyt ígjøgnum á frúgvasíðuni í miðtalvinum, føldi Luitjen seg noyddan at lata eina finnu. Mótstøðumaðurin býtti so við og við fólkið upp. Tað endaði við, at teir høvdu frúgv og finnur á borðinum. Finnan, ið varð mist í miðtalvinum, avgjørdi til endans talvið.

Mín mótstøðumaður var óansin í miðtalvinum. Eg fekk eina finnu og átti í minsta lagi at fingið talvið javnt. Men telvingin var einki at reypa av eftir hetta. Eg misti finnuna aftur, og bleiv trýstur so mikið, at tíðin til endans fór. Men tá var støðan á borðinum eisini tapt.

Martin var undir trýsti stóran partin av talvinum. Mótstøðumaðurin fekk eitt álop í lag á frúgvasíðuni, men Martin vardi seg væl í tíðarneyðini. Tá teir fjøruti leikirnir vórðu fluttir, og telvararnir fingu tillutaða nýggja tíð, hevði Martin fingið fram eina javna støðu á borðinum. Men best sum hann helt væl til standa, var hann tíverri so óansin, at hann misti mann, og so var ikki annað at gera enn at leggja kongin.

Írland í triðja umfari

Í morgin týsdagin møta Føroyar Írlandi. Her er kjansurin at vinna. Írland er eitt av trimum liðum, sum eru styrkismett niðari enn Føroyar í EM, so nú ræður um at fáa alt at sita sum tað skal í morgin.

Rumenia hevur óvæntað lagt seg á odda eftir tvey umfør. Rumenskur landsliðsvenjari er Ivan Sokolov, sum í 2022 púra óvæntað leiddi Usbekistan til sigurs á talvolympiaduni. Ivan var fleiri ferðir í Føroyum í 90-árunum sum eitt slag av venjara og ráðgeva hjá Havnar Telvingarfelag. Bosniski stórtelvarin skuldi herfyri ætlandi standa á odda fyri føroyska talvlandsliðnum, men onkursvegna datt ætlanin niðurfyri fyri einum trimum árum síðani.

Fimm lond hava higartil fult stigatal í EM; umframt Rumenia eru tey Grikkaland, Slovenia, Serbia og Frakland. Menn enn eru ikki allar súður syftar.

Dystirnir í triðja umfari í morgin byrja allir á middegi. Fleiri leinki eru til stroymingina frá dystunum – eitt er lichess.org.

Mótstøðan verður aftur hørð í dag í EM-stevnuni fyri landslið í talvi í Georgia.

Føroyar møta í øðrum umfari Litava. Baltiska liðið, sum er styrkismett nummar 26, hevur á fremstu trimum borðunum stórmeistarar við einum miðalstyrkitali, ið liggur um 2550.

Litava var í gjár fyri teprum 1½-2½ ósigri móti sterka armenska liðnum, sum er styrkismett nummar seks. Armenia hevur fyrr vunnið talvolympisku leikirnar.

Føroyar taptu 3½-½ fyri Kroatia.

Dystirnir í øðrum umfari í dag byrja á middegi. Til ber at fylgja við leik fyri leik á netinum.

Føroysku telvararnir sita við somu litum sum í gjár. Brøðurnir Høgni og Rógvi hava hvíta fólkið, og Luitjen og Martin svarta fólkið. 

Manningarnar eru hesar:

Føroyar – Litava

IM Høgni Egilstoft Nielsen 2389 – GM Valery Kazakouski 2581

Luitjen A. Apol 2318 – GM Titas Stremavicius 2531

Rógvi Egilstoft 2304 – GM Paulius Pultinevicius 2532

Martin Poulsen 2276 – Gustas Morkunas 2324

Rógvi um Kroatia-dystin

Rógvi Egilstoft hevur sent hesa frásøgn um dystin í fyrsta umfari í gjár:

Móti Kroatia var ongantíð veruligur spenningur í dystinum. 

Høgni fekk heldur verri støðu, kortini var ikki so lætt hjá mótstøðumanninum at telva. Høgni misti ella læt honum fyrst eina finnu og so eina afturat, men fekk afturfyri eitt ávíst trýst á svarta kongin. Avgerandi løtuna fann Høgni ikki røttu álopsleikirnar, og tá hann so misti mann var talvið liðugt.

Lutijen kom í eitt miðspæl, har hann kendi seg noyddan at flyta finnuna fram á g6, bæði fyri at steðga hvíttrandaða bispinum hjá mótstøðumanninum og soleiðis verja fyri, at riddarin ikki slapp fram á f5. Men hetta hevði so við sær, at svørtu puntarnir kongsmegin ongan góðan áttu. Mótstøðumaðurin trýsti væl, bæði á borðinum og á klokkuni. Luitjen vardi seg eftir førimuni, og hevði onkran møguleika at koma innaftur í talvið, tí álopið hjá mótstøðumanninum var ov sterkt.

Eg sjálvur kom heldur illa frá byrjan, og føldi meg noyddan at geva rók fyri riddara og finnu. Helt sjálvur við talvborðið, at eg hevði møguleikar at pressa mótstøðumannin á kongsssíðuni, men hann var snildari. Kroatiski stórmeistarin kláraði at fáa frúgvarnar av borðinum, og sostatt greiðan fyrimun. Eg kundi tvær ferðir komið afturíaftur, men tíðin pressaði meg somikið, at eg var ov óneyvur í avgerandi løtunum. 

Martin telvaði væl og kom ongantíð veruliga undir trýst við svarta fólkinum. Mótstøðumaðurin kundi fingið okkurt lítið álop í lag kongsmegin, men telvaði heldur linliga. Hann mundi ikki vitað, at sleppur Martin at damma aftur og fram, so verður hann ikki tikin. Sambært telduni hjá chess.com, so telvaði Martin við 98,8% neyvleika.

Føroyar móti Kroatia í fyrsta umfari í EM í Georgia. Fremst vinstrumegin sæst Martin Poulsen við svarta fólkinum. Innanfyri síggjast Rógvi Egilstoft, Luitjen Akselsson Apol og Høgni Egilstoft Nielsen. Mynd: Gunnar Bjørnsson.

Martin Poulsen bjargaði Føroyum undan 4-0 tapi í dystinum móti Kroatia í fyrsta umfari í EM-kappingini fyri talvlandslið.

Við svarta fólkinum á fjórða borði eydnaðist Martini at telva seg til javnleik eftir 33 leikir. Martin tóktist hava tamarhald á talvinum allan vegin. Byrjanin var fronsk, eitt skifti hevði kroatiski stórmeistarin lítlan fyrimun, men tjúgundi leikur hjá honum var í linara lagi; Martin fekk tí javnað støðuna, og eftir tað vikaðist javnvágin ikki.

Hinir á føroyska liðnum vóru ikki mentir at standa ímóti harða trýstinum, og máttu til endans dvína. Úrslitið er nakað soleiðis, sum væntandi var. Kroatia er styrkismett nummar sekstan, Føroyar nummar 36 av teimum 40 liðunum.

Føroyar – Kroatia ½ – 3½

IM Høgni Egilstoft Nielsen 2389 – GM Ante Brkic 2578 0 – 1

Luitjen A. Apol 2318 – GM Leon Livaic 2551 0 – 1

Rógvi Egilstoft 2304 – GM Sasa Martinovic 2553 0 – 1

Martin Poulsen 2276 – GM Hrovje Stevic 2522 ½ – ½

Danir gjørdu bart

Ivaleyst mest óvæntaða úrslit í fyrsta umfari var, at Danmark koppaði Týsklandi, sum er styrkismett nummar eitt. Danir eru seedaðir nummar 21. Danir vunnu dystin 2½-1½.

Mads Andersen gjørdist sigursharri á triðja borði. Remis var á hinum trimum borðunum. Á 1. borði eydnaðist 21 ára gamla danska stórmeistaranum Jonas Buhl Bjerre at fáa remis móti Vincent Keymer, sum er nummar níggju í heiminum. Á týska liðnum eru brøðurnir Rasmus og Frederik Svane, sum hava danskan pápa. 

Ungarn, sum er styrkismett nummar trý, tapti eisini í fyrsta umfari. Ungarn tapti fyri heimaliðnum Georgia. Norðurlond taptu øll uttan Danmark. Svøríki tapti 2½-1½ fyri Onglandi, Ísland tapti fyri sterka pólska liðnum, sum er styrkismett nummar trettan. Íslendingar fingu kortini hálvtannað stig fyri trý remis, men á fyrsta borði var Vignir Vatnar Stefansson við undirlutan. Finnland tapti 3-1 fyri Slovenia. Norra og Magnus Carlsen eru ikki við. Tey brynja seg í staðin til OL um eitt ár, verður sagt.

Annað umfar í EM í Batumi verður í morgin. Enn er ikki greitt hvørjum Føroyar tá møta. Níggju umfør eru, telvað verður til týsdagin 14 oktober. Einasti frídagurin er leygardagin 11 oktober.