Talvsamband Føroya Faroechess
1975/76
So vunnu vestmenningar.
Spenningur var til síðsta leik. Havnarmenn vóru í hølunum á vestmenningum, men gjørdust eitt hálvt stig ov stuttir.
Kappingin var umskipað. Liðini telvaðu nú bara ein dyst hvør móti øðrum, ikki úti- og heimadystir sínamillum, sum hini árini. Hetta var galdandi fyri allar deildir. Men hóast kappingin soleiðis var munandi stytt, so stóð kortini á at fáa allar dystirnar í summum av hinum deildunum avgreiddar.
Liðini í A-deildini vóru framvegis fimm, og dystirnir tí einans fýra í alt fyri hvørt av liðunum. Hetta er tí nógv hin stytsta FM-kappingin.
Avgerandi innanhýsis dysturin millum Havnina og Vestmanna endaði javnur. Í seinasta umfari hevði Havnin fyri neyðini at vinna 4-0 í Miðvági fyri at leggja upp á síðuna á vestmenningum, men eitt hálvt stig restaði í, tá avhasað var.
John Jacobsen avgerandi
Hans Petersen, Niels Durhuus, Olaf Durhuus og John Jacobsen mannaðu liðið hjá Vestmanna Talvfelag í nevndu røð í øllum dystum. Tann ungi John Jacobsen var toppskjútti við fullum stigatali. Um somu tíð herjaði hann eisini í Woodkappingini, so her sóust tekin til, at Vestmanna hevði fingið ein nýggjan stórtelvara. Tvey ár seinni var hann føroyameistari og á 1. borði á landsliðnum í OL.
Flest øll borðúrslitini eru tøk, tó vita vit ikki, hvør telvaði remis í dystunum millum Gøtu og Vestmanna og millum Miðvág og Havnina.
Vaksandi áhugi
Nøkur nýggj talvfeløg síggjast á fyrsta sinni í landskappingini. Fleiri eru úr Sundalagnum og í Norðstreymoy.
Rókur, sum hevur heimstað á Oyri, hevur lið bæði í C-deildini og unglingadeildini. Annað nýtt felag í C-deildini er Kaldbaks Talvfelag. Í unglingadeildini finna vit eisini Hvalvíkar Talvfelag, ið seinni nevndist Talvfelagið Streymur, og Hósvíkar Talvfelag.
Kappingin í C- og unglingadeildini var nú skipað í tveir bólkar, men líkt er til, at eingin finala fekst í lag í nakrari deild.
Eiðis Talvfelag og Sandavágs Talvfelag, sum vinna hvør sín bólk í C-deildini, flyta bæði upp í B-deildina. Sandavágur flutti upp bæði úr C- og B-deildini. Eingin flutti úr A-deildini, afturímóti kemur eitt lið upp aftrat. Veturin 1975/76 eru liðini í A-deildini bara fimm, árið eftir seks. Tí hava bæði Eiði og Sandavágur mestur kunnað flutt upp í B-deildina.
Hví eingin finala fekst í lag í unglingadeildini er óvist, men fleiri dystir standa at síggja til í hálvgum gekki.
Tað ber tí í sær, at eingin vinnari er hvørki í C-deildini ella unglingadeildini.
Úrslitini frá A-deildini eru at finna her: A-deildin 1975/76
B-deildin
Klaksvík 11
Sandavágur 8½
Havnin 7 (ein dystur restar)
Kollafjørður 4½
Vestmanna 2 (ein dystur restar)
C-deildin (1)
Eiði 10 (eitt niðurlagt talv)
Strendur 9
Toftir 7½
Gøta 6 (eitt niðurlagt talv)
Rókur 4
C-deildin (2)
Sandavágur 10
Havnin 9½
Kollafjørður 6½ (ein dystur restar)
Miðvágur 5½ (ein dystur restar)
Kaldbak 4½
Unglingar (1)
Toftir 11½
Gøta 8½ (ein dystur restar)
Eiði 8½ (ein dystur restar)
Strendur 7½
Rókur 7½ (ein dystur restar)
Hósvík 5 (ein dystur restar)
Unglingar (2)
Sandavágur 12½
Havnin 10 (ein dystur restar)
Vestmanna 6½ (tveir dystir resta)
Hvalvík 4 (tríggir dystir resta)
Kollafjørður 3½ (tveir dystir resta)
Miðvágur 3½ (tveir dystir resta)
