Talvsamband Føroya Faroechess
Vinstrumegin síggjast tveir av aðalstuðlum Havnar Telvingarfelags í drúgt áramál, Jóan P. Midjord innanfyri og Jákup Thomsen fremri í myndini. Mótstøðumenninir eru Gunnar Joensen og Hans Jacob Petersen.
1971-72
Minni spenningur enn árið fyri.
Havnin og Vestmanna vóru aftur fremst, men hesaferð var nakað á muni. At Havnin vann annan av innanhýsis dystunum heili 4-0 var helst avgerandi.
Manningarnar vóru yvirhøvur tær somu. Hjá Havnini høvdu Jóan Pætur Midjord og Henry Olsen nú býtt um á ovaru borðunum. Fasta HT-manningin var tí henda:
1. Jóan P. Midjord
2. Henry Olsen
3. Jákup Thomsen
4. Rubek Rubeksen
Hvørjir aðrir, ið møguliga hava loyst av í hendinga dystum, vita vit ikki, tí í miðlunum verða telvararnir á ymsu liðunum sjáldan nevndir. Sosialurin og 14. september skriva eitt sindur um kappingina, og útvarpið ber javnan úrslitini, men eingin veruligur talvteigur er enn komin.
Nú var telvað í tveimum deildum. Í A-deildini vóru fremstu fimm liðini frá árinum fyri, Eiðis Talvfelag varð flutt niður, og var tí í B-deildini saman við Havnini, Miðvági, Klaksvík, Kollafirði og Gøtu.
Klaksvík og Miðvágur eru nýggju feløgini hendan veturin.
Úrslitini frá A-deildini 1971/72 eru at finna her: A-deildin 1971/72
Seinasta yvirlitið yvir støðuna í B-deildini er hendan:
B-deildin
1. Havnin 25 stig (2 niðurløgd)
2. Miðvágur 23
3. Eiði 19½ (2 niðurløgd)
4. Kollafjørður 18½ (1 niðurlagt)
5. Klaksvík 18 (2 niðurløgd)
6. Gøta 9½ (3 niðurløgd)
