FM-finalan bíðar

Sandavágs Talvfelag og Havnar Telvingarfelag fara aftur í ár at avgera kappingina um FM-heitið í beinleiðis innanhýsis finaludysti í seinasta umfari í landskappingini annan leygardag. 

 

Vágamenn eru tvey stig fremri, men vinna havnarmenn dystin 3-1, hava teir í minsta lagi tryggjað sær umdyst um FM-heitið. Oddaliðini gjørdu bæði bart í níggjunda og næstseinasta umfari í gjár.

 

 

 

Sandavágs Talvfelag gjørdi ikki mætari enn at vinna 4-0 á Klaksvík B sunnukvøldið. Eitt stórfingið úrslit, sum undirstrikar kraftina, sum hevur eyðkent teir í vetur. Rógvi Egilstoft gekk undan sum gott fyridømi. Fyrr um dagin var hann sum málskjútti við at tryggja EB/Streymi sigurin í fótbólti, og eftir dystin gekk leiðin beinleiðis av Hólmanum á Eiði norður til Klaksvíkar at telva – og vinna.

 

Klaksvíksliðið er triðfremst í deildini, og Ingolf Gaard hevði helst sigurin í hendi á fjórða borði, men setti so rókin í deyða. Ungi mótstøðumaðurin, Jón í Horni Nielsen, hevur annars staðið seg sera væl hetta fyrsta árið sum fastur maður hjá sandavágsmonnum. Hann hevði dagin fyri – saman við Høgna Egilstoft Nielsen – vunnið við 07 Vestur á ÍF í bestu fótbóltsdeildini.

 

Tað eru alt heilhugaðir kappingarmenn, sum manna oddaliðið í talvi.

 

Føroyameistarnir úr Havnar Telvingarfelag vunnu eisini stórsigur sunnudagin. Mótstøðuliðið var Klaksvík A. Havnarmenn vunnu 3½-½ á heimavølli í Finsen. Helgi Dam Ziska, Martin Poulsen og Carl Eli Samuelsen vunnu, men á triðja borði mátti Olaf Berg kýta seg av øllum alvi fyri at bjarga sær remis móti Terja Petersen. Talvið gjørdist óvanliga drúgt. Terji stríddist at vinna endatalvið við kongi og róki móti kongi og riddara, men Olaf sýndi lýtaleysan teknikk og treiskni til at standa ímóti. Ikki fyrr enn 122 leikir vóru fluttir, sannaði Terji, at hann vann ikki talvið.

 

Triði dysturin millum botnliðini endaði javnur. Tað ber í sær, at vánirnar hjá kollfirðingum at lívbjarga sær í deildini tykjast smáar.

 

1. deild – 9. umfar

9. Umfar tann 2023/03/05 kl. 14:00
Bo.	5	Klaksvíkar Talvfelag 2	Rtg	–	6	Sandavágs Talvfelag 1	Rtg	0 : 4
1.1		Baldursson Rani	2012	–	FM	Egilstoft Rogvi	2274	0 – 1
1.2		Vang Finnbjorn	1994	–	FM	Nielsen Hogni Egilstoft	2394	0 – 1
1.3		Gregersen Hedin	1919	–		Nielsen Torkil	2091	0 – 1
1.4		Gaard Ingolf	1913	–		Nielsen Jon I Horni	2023	0 – 1
Bo.	4	Havnar Telvingarfelag 2	Rtg	–	1	Kollafjarðar Talvfelag 1	Rtg	2 : 2
2.1		Jogvansson Hjalti Toftum	2018	–		Djurhuus Arant	1791	0 – 1
2.2		Hansen Herluf	1994	–		Morkore Rogvi	1736	0 – 1
2.3		Berg Margar M.	1912	–		Joensen Hanus	1773	1 – 0
2.4		Ziska Andrias	1879	–		Jacobsen Markus	1398	1 – 0
Bo.	3	Havnar Telvingarfelag 1	Rtg	–	2	Klaksvíkar Talvfelag 1	Rtg	3½: ½
3.1	GM	Ziska Helgi Dam	2543	–		Simonsen Olavur	2189	1 – 0
3.2	FM	Poulsen Martin	2311	–		Nolsoe Rani	2081	1 – 0
3.3	FM	Berg Olaf	2204	–		Petersen Terji	2043	½ – ½
3.4	FM	Samuelsen Carl Eli Nolsoe	2171	–		Olsen Wille	2011	1 – 0

 

1. deild – støðan fyri síðsta umfar

Rk.	Lið	1a	1b	2a	2b	3a	3b	4a	4b	5a	5b	6a	6b	TB1	TB2
1	Sandavágs Talvfelag 1	*	*	2½		3½	4	3½	2½	3	3½	4	3½	30	18
2	Havnar Telvingarfelag 1	1½		*	*	2½	2½	3½	3½	2½	4	4	4	28	16
3	Klaksvíkar Talvfelag 2	½	0	1½	1½	*	*	2	2	4	3	1		15,5	6
4	Klaksvíkar Talvfelag 1	½	1½	½	½	2	2	*	*	1½		2½	4	15	6
5	Havnar Telvingarfelag 2	1	½	1½	0	0	1	2½		*	*	2½	2	11	5
6	Kollafjarðar Talvfelag 1	0	½	0	0	3		1½	0	1½	2	*	*	8,5	3

 

Sandavágur – Havnin (FM-finala)

Klaksvík A – Havnin B

Kollafjørður – Klaksvík B