Helgi endurvann FM

Helgi Dam Ziska úr Havnar Telvingarfelag er framvegis føroyameistari í snartalvi og kviktalvi. 

 

Stórmeistarin endurvann um vikuskiftið bæði heitini í árligu FM-kappingini norðuri á Eiði. 

 

Áhugin var stórur fyri kappingini. Í snarkappingini leygardagin vóru 46 telvarar, og í kvikkappingini í dag sunnudagin vóru 48 telvarar við.

Í gjár var sum sagt snartelvað. Tá hava telvarar bara tríggjar minuttir hvør umframt tvey sekund fyri leikin. Her kom at standa á jøvnum millum Helga og Rógva Egilstoft úr Sandavágs Talvfelag. Báðir fingu 9½ stig eftir ellivu umfør. 

 

Rógvi vann á Helga, men tapti fyri Silas Eyðsteinsnson, og telvaði remis móti bróðrinum Høgna. Helgi hevði eitt remis móti Luitjen Akselsson Apol.

 

So var umdystur um FM-heitið í snartalvi millum Helga og Rógva, og tá gjørdi stórmeistarin bart og vann 2-0.

 

Teir fremstu vóru hesir:

 

 

1. Helgi Dam Ziska, HT 9½

2. Rógvi Egilstoft, ST 9½

3. Høgni Egilstoft Nielsen, ST 8½

4. Silas Eyðsteinsson, ST 8½

5. Olaf Berg, HT 7½

6. Sjúrður Thorsteinsson, HT 7

7. Jón í Horni Nielsen, ST 7

8. Luitjen Akselsson Apol, HT 6½

9. Hjalti Toftum Jógvansson, HT 6½

10. Andrias Ziska, HT 6½

 

Finalu-umdystur: Helgi Dam Ziska – Rógvi Egilstoft 2-0

 

46 telvarar í alt.

 

 

 

Í dag var kvikkappingin á skránni. Nú høvdu telvarar tíggju minuttir hvør til hvørt talvið, umframt fimm sekund fyri leikin. Níggju umfør vóru í alt.

 

Helgi var aftur bestur, men hesaferð var Høgni Egilstoft Nielsen í hølunum á honum. Helgi vann talvið teirra millum, og tað kom at vera avgerandi. Høgni vann øll hini talvi, Helgi telvaði remis móti Rógva Egilstoft. 

 

Tíggju teir fremstu vóru hesir:

 

 

 

1. Helgi Dam Ziska, HT 8½

2. Høgni Egilstoft Nielsen, ST 8

3. Rógvi Egilstoft, ST 6½

4. Eyðun Nolsøe, KTF 6½

5. Olaf Berg, HT 6

6. Luitjen Akselsson Apol, HT 6

7. Silas Eyðsteinsson, ST 6

8. Margar Berg, HT 6

9. Tummas Martin Sólsker, KTF 5½

10. Carl Eli N. Samuelsen, HT 5½

 

Í alt 48 telvarar.

 

 

 

Líta vit at yvirlitinum yvir FM-vinnarar í snar- og kviktalvi, sæst beinanvegin, at ein telvari skarar framúr, og tað er 32 ára gamli Helgi Dam Ziska, sum er í flokki fyri seg í føroyskari telving.

 

FM-heitið í snartalvi hevur hann nú vunnið seytjan ferðir. Hann vann á fyrsta sinni bara 13 ára gamal í 2004. Helgi hevur vunnið øll árini síðani uttan tvær ferðir; tá var hann ikki við.

 

Nýggjaru kvikkappingina hevur hann vunnið tríggjar ferðir, men fyrsta árið mátti hann lúta fyri Høgna Egilstoft Nielsen.

 

 

FM í snartalvi 1980-2022