Stavn um stavn

Sandavágsmenn koppaðu oddaliðnum úr Havn í toppdystinum í fimta umfari í landskappingini í talvi í dag.

 

Nú stendur á jøvnum millum vágamenn og havnarmenn í fremstu deildini. Bæði liðini hava 15 stig hvør, og eru fýra stig undan triðja liðnum í røðini. 

 

Kanska fáa vit aftur eina beinleiðis FM-finalu, tá oddaliðini hittast aftur í seinasta umfari 26.mars.

 

 

Tað var føroyameistarin, Høgni Egilstoft Nielsen, sum tryggjaði Sandavágs Talvfelag sigurin í dag. Høgni vann á Carl Eli Samuelsen á øðrum borði. Á hinum borðunum endaði javnt. 

 

Aldursmunurin var størstur á fjórða borði. Har togaðust 15 ára gamli Luitjen Akselsson Apol og 57 ára gamli Torkil Nielsen. Luitjen royndi við hvíta fólkinum, men talvið endaði javnt. Sjúrður Thorsteinsson stríddist at vinna á triðja borði, eftir at teir vóru lidnir á hinum borðunum, men hóast Silas Eyðsteinsson var eitt sindur kroystur, eydnaðist honum at varðveita javnvágina, og fáa talvið javnt.

 

 

 

Sandavágsmenn eru drúgvir. Hóast havnarmenn høvdu hægri styrkital á trimum av fýra borðum, vóru teir kortini ikki mentir at vinna nakað talv í dag. At allir á sandavágsliðnum eru ítróttarmenn og spæla fótbólt í fremstu røð – tann elsti spældi sum kunnugt, tá hann var yngri – ger kanska, at teir hava hesa serligu kappingaríleguna, sum fær teir at spenna seg út og avrika á høgum stigi, tá ið á stendur.

 

Annað dømi um góða kappingarmoralin hjá vágamonnum er teirra støðufesti. Hóast teir fáast við elituítrótt, er tað rárasta hending, at teir ikki eru fullmannaðir. Havnarmenn hava seks telvarar í alt, sum skiftast. Í dag vóru hvørki Martin Poulsen ella Olaf Berg tøkir. Annar situr í sóttarhaldi og hin hevði forfall av arbeiðsávum. Teir eru annað og triðja borð hjá Havnini, men fimm av teimum seks í 1. liðshópinum hjá Havnar Telvingarfelag eru toluliga javnsterkir – Helgi Dam Ziska er tann ókrýndi kongurin. 

 

 

 

Útlitini til at Klaksvíkar Talvfelag í vetur fór at leggja seg út í kappingina við oddaliðini seinastu árini – Sandavágur og Havnin – eru fánaðar nú í seinastuni. Moldosvki stórmeistarin, Vladimir Hamitevici, hevur ikki verið við í seinastu tveimum dystunum, og tað merkist.

 

Í løtuni stendur kappingin um triðja plássið millum Klaksvík og annað lið hjá Havnini. Teir møttust í dag, og úrslitið var javnleikur 2-2. Her hendi tað, at Hjalti Toftum Jógvansson heldur óvæntað vann á Ólavi Simonsen á 1. borði.

 

Í triðja dystinum vann Klaksvík B tepran sigur á Vestmanna.

 

 

5. Umfar tann 2021/11/20 kl. 10:00
Bo.	3	Havnar Telvingarfelag 1	Rtg	–	6	Sandavágs Talvfelag 1	Rtg	1½:2½
1.1	GM	Ziska, Helgi Dam	2544	–	FM	Egilstoft, Rogvi	2369	½ – ½
1.2	FM	Samuelsen, Carl Eli Nolsoe	2171	–	FM	Nielsen, Hogni Egilstoft	2401	0 – 1
1.3		Thorsteinsson, Sjurdur	2128	–		Eydsteinsson, Silas	2046	½ – ½
1.4		Apol, Luitjen Akselsson	2174	–		Nielsen, Torkil	2151	½ – ½
Bo.	4	Havnar Telvingarfelag 2	Rtg	–	2	Klaksvíkar Talvfelag 1	Rtg	2 : 2
2.1		Jogvansson, Hjalti Toftum	1988	–		Simonsen, Olavur	2217	1 – 0
2.2		Hansen, Herluf	1985	–		Nolsoe, Rani	2055	0 – 1
2.3		Berg, Margar M.	1975	–		Petersen, Terji	2030	0 – 1
2.4		Ziska, Andrias	1871	–		Eliassen Hansen, Bogi	0	1 – 0
Bo.	5	Klaksvíkar Talvfelag 2	Rtg	–	1	Vestmanna Talvfelag 1	Rtg	2½:1½
3.1		Baldursson, Rani	1990	–		Andreasen, Jakup A.R.	1999	½ – ½
3.2		Vang, Finnbjorn	2000	–		Hojgaard, Samson	1969	1 – 0
3.3		Gaard, Ingolf	1912	–		Brekka, Martin	0	0 – 1
3.4		Kalso, Steffan	0	–		Debes, Ingolf	1659	1 – 0

 

 

1	Sandavágs Talvfelag 1	*	*	2½		2½		2½		4		3½		15,0	10
2	Havnar Telvingarfelag 1	1½		*	*	2½		3½		3½		4		15,0	8
3	Havnar Telvingarfelag 2	1½		1½		*	*	2		3		3		11,0	5
4	Klaksvíkar Talvfelag 1	1½		½		2		*	*	3		3½		10,5	5
5	Klaksvíkar Talvfelag 2	0		½		1		1		*	*	2½		5,0	2
6	Vestmanna Talvfelag 1	½		0		1		½		1½		*	*	3,5	0

Í hinum deildunum eru ikki allir dystir telvaðir sum ætlað, og nøkur úrslit eru ikki greið enn. Meira er at síggja á heimasíðu Talvsambandsins – faroechess.com.

 

Um tvær vikur verður sjøtil settur á seinnu leikhálvu í landskappingini. Dystirnir í sætta umfari verða sunnudagin 23. januar.