Remis í toppdysti

Støðan er óbroytt í oddanum í kappingini um meistaraheitið í einstaklingatelving fyri smátjóðir í Evropa. Allir tríggir oddamenninir telvaðu javnt í fjórða umfari í dag.

Helgi Dam Ziska hevði svarta fólkið móti hinum stórmeistaranum í kappingini, Igor Efimov, sum umboðar Monako. Javnvágin varð ongantíð skakað í hesum dysti; tað var, sum høvdu báðir remis í huganum frá byrjan av. Sínamillum virðingin var so mikið stór, at hvørgin dittaði sær at leggja doyin á at vinna. Remis eftir 22 leikir.

Her var nú eitt gylt høvi hjá triðja oddamanninum, Michael Wiedenkeller, at gagnnýta møguleikan til at leggja seg einsamallan á odda, men hann mátti sættast við remis móti Jake Darmanin.

Hjá hinum føroyska telvaraum í kappingini, Luitjen A. Apol, bragdaði umsíðir. Í einum torførum dysti stríddi hann seg til remis móti kýpriska telvaranum Pavlos Constantinou, sum hevur hægri styrkital enn blaðungi føroyingurin.

Í fimta umfari mikudagin møtast aftur tveir av oddamonnunum – Wiedenkeller móti Efimov. Í dag umboða teir Luksemburg og Monako, men teir hava verið meistarar í ávikavist Svøríki og Italia í síni tíð; Wiedenkeller var svenskur meistari í 1990 og Efimov var italskur meistari í 1998 og 1999.

Helgi Dam Ziska telvaði remis í toppdystinum í fjórða umfari. Mynd: Arild Rimestad. 

 

Støðan í kappingini eftir 4. umfør:

1.-3. GM Helgi Dam Ziska 2539 (FØR) 3½ stig

1.-3. IM Michael Wiedenkeller 2445 (Luksemburg) 3½ stig

1.-3. GM Igor Efimov 2416 (Monako) 3½ stig

4. Jake Darmanin 2106 (Malta) 2½ stig

5.-6. IM Fred Berend 2323 (Luksemburg) 2 stig

5.-6. Luke Brezmes 2043 (Andorra) 2 stig

7. Pavlos Constantinou 2120 (Kyprós) 1½ stig

8. Ezio Righi 1915 (San Marino) 1 stig

9. Luitjen A Apol 2103 (FØR) ½ stig

10. Paul Carpenter 1982 (Jersey) 0 stig

 

5. umfar (21. apríl) kl. 17:00

Helgi Dam Ziska – Ezio Righi

Luitjen A. Apol – Luke Brezmes

Michael Wiedenkeller – Igor Efimov

Fred Berend – Jake Darmanin

Paul Carpenter – Pavlos Constantinou