Talvsamband Føroya Faroechess
Sandavágs Talvfelag styrkti í dag um leiðsluna í landskappingini í 1. deild. Við skerdum liði vunnu vágamenn 3-1 í toppdysti móti klaksvíkingum.
Rógvi Egilstoft Nielsen var ikki við hjá sandavágsmonnum í dag vegna fótbólt, men Høgni Egilstoft Nielsen vann á 1. borði á Ólavi Simonsen. Á øðrum borði telvaðu Torkil Nielsen og Eyðun Nolsøe remis. Hetta man vera fyrsti dysturin hjá Eyðuni í meira enn eitt ár. Á triðja borði vann Bernhard Augustinussen á Terja Petersen. Bernhard hevur fulla úrtøku sum avloysari fyri Silas Eyðsteinsson, sum eisini var upptikin av fótbólti. Á fjórða borði var remis millum Inga Wiberg og Boga Eliasen.
Klaksvíkingar hava at síggja til tvey jøvnsterk lið í 1. deild. B-liðið, sum flutti upp farna kappingarár, vann í dag 3-1 á B-liðnum hjá Havnar Telvingarfelag. Finnbjørn Wang mátti lúta á 1. borði fyri Luitjeni Akselsyni Apol, men á hinum borðunum vunnu Rani Baldursson, Haldur Suni Johansen og Ingolf Gaard á Margar Berg, Heiðrik Jacobsen og Óla Joensen.
Meistaralið í fríum falli
FM-liðið hjá Havnar Telvingarfelag var heldur ikki ment at vinna í dag. Dysturin móti Kollafjarðar Talvfelag endaði javnur 2-2.
Havnarmenn vunnu á ovaru borðunum. Carl Eli N. Samuelsen vann á 1. borði á Hans Kristiani Simonsen, og Sjúrður Thorsteinsson á 2. borði á Kára Petersen. Á aftaru borðunum taptu Herluf Hansen og Andrias Ziska fyri Kaj Olsen og Rógva Mørkøre. Tað er bit í yngru monnunum á kollafjarðarliðnum, tí havnarmenn høvdu á aftaru borðunum eini 300 ratingstig fleiri hvør enn mótstøðumenninir.
Eingin av teimum fýra, sum vunnu avgerandi FM-dystin móti Sandavági fyrr í vár, vóru við á havnarliðnum í dag – Helgi Dam Ziska, Martin Poulsen, Olaf Berg og Luitjen Apol.
3. umfar:
Klaksvík-Sandavágur 1-3
Havnin-Kollafjørður 2-2
Havnin B-Klaksvík B 1-3
Støðan í 1. deild
1 Sandavágur 9½
2 Klaksvík A 6
3 Klaksvík B 6
4 Havnin A 5½
5 Kollafjørður 5
6 Havnin 4
Vestmenningar á odda
Í 2. deild er Vestmanna Talvfelag klárt á odda. Alt bendir longu á, at teir hava beina kós móti uppflyting, tó at kappingin er ikki komin hálvan veg enn. Vestmenningar vunnu í dag 3-1 á sandavágsmonnum. Vestmannaliðið mannaðu Samson Højgaard, Jákup á Rógvu Andreasen, John Jacobsen og Hanus Ingi Hansen.
3. umfar
Vestmanna-Sandavágur 3-1
Kollafjørður-Havnin 3-1
Runavík-Klaksvík 2-2
Støðan í 2. deild
Vestmanna 9½
Kollafjørður 6½
Havnin 6
Klaksvík 5½
Runavík 4½
Sandavágur 4
3. deild
Tey tólv liðini í 3. deild eru flokkað í tveir bólkar. Í toppinum er støðan hendan:
Bólkur 1
Gøta 10
Sandavágur 8
Rókur 7½
Bólkur 2
Vestmanna 8½
Rókur 8
Toftir 5
Ein unglingadeild er sett á stovn í ár, men har er kappingin ikki byrjað enn.
Meira kann lesast um liðkappingina á heimasíðu Talvsambandsins – faroechess.com.
Telvað verður aftur 8. november. Dystirnir í fjórða umfari í 1. deild eru hesir: Sandavágur-Klaksvík B, Klaksvík-Havnin og Kollafjørður-Havnin B. Í alt eru tíggju umfør. Kappingin endar 13. mars 2021.
