Tað er mangur leikur í longum talvi

Tað var spenningur og dramatikkur við lít, tá landskappingin í talvi endaði í gjár. Vanliga verður seinasta umfarið avgreitt sum stórt felagsumfar, men Korona-støðan bar í sær, at vent var aftur til vanligu mannagongdina, at heimaliðini skipaðu fyri sínum dystum.

 

Mesti spenningurin var á Giljanesi, har oddaliðini í 1. deild brustu saman í rættari FM-finalu. Havnarmenn tóku øll á bóli við einum knúsandi stórsigri á meistaraliðnum í Vágum. 3½-½ sigurin bar í sær, at steypið endaði aftur í Havn. 

Havnarliðið tóktist væl fyrireikað. Stórmeistarin Helgi Dam Ziska hevði havt allan leikhópin saman í vikuni, og har var løgd ein greið dystarætlan niður í smálutir fyri hvørt borð. Í samráð við hinar var avrátt, at hin einans 14 ára gamli Luitjen Akselsson Apol skuldi fáa uppgávuna at telva við svarta fólkinum móti toppskjúttanum hjá vágamonnum, Torkil Nielsen, á 4. borði. Ungi evnaríki telvarin lønti hinum álitið aftur við at vinna ógvuliga sannførandi, og geva útiliðnum eina flúgvandi byrjan í dystinum.

 

Til endans lá alt á herðunum á fleirfalda føroyameistaranum Martin Poulsen á 2. borði. Hóast hann hevði yvirav sær mótstøðumenn við hægri styrkitali, var hann kortini ósvikaligur tryggur og koppaði á øðrum sinni í landskappingini í vetur favorittinum Rógva Egilstoft Nielsen, og so var alt liðugt. Tá hevði Olaf Berg eisini vunnið á 3. borði, og Helgi Dam Ziska tikið remis á 1. borði móti Høgna Egilstoft Nielsen.

 

Havnarliðið er ósigrað í kappingini í vetur. Teir vunnu sjey dystir og spældu tríggjar javnar. Tað er hugvekjandi, at báðir dystirnir móti øðrum liði hjá Havnini endaðu javnir. Telvararnir á øðrum liði vóru tí um reppið at forkoma felagnum meistaraheitið. Hugvekjandi er tað eisini, at báðir toppdystirnir millum Havnina og Sandavág endaðu við stórsigri 3½-½ til føroyameistararnar.

 

Í hinum endanum í deildini var annar lykladystur. Kollfirðingar og vestmenningar telvaðu sínamillum um hvat av teimum liðunum fór at varðveita sætið í deildini. Dysturin endaði 2-2, og tað rakk hjá kollfirðingum. Vestmenningar gjørdust júst ov stuttir. Hitt einaferð so stolta talvfelagið í Vestmanna noyðist tí tungu gongdina niður í 2. deild eftir einans eitt ár í fremstu deildini.