Vágamenn økja

Tumma fyri tumma økja sandavágsmenn um leiðsluna í kappingini við havnarmenn í landskappingini í talvi. Í dag otaðu vágamenn seg uppaftur hálvt stig aftrat frá fremsta avbjóðaranum, soleiðis at teir nú eru tvey stig undan í oddanum.

Dystirnir í sjeynda umfari í FM-kappingini í talvi fyri lið vóru í dag. Í 1. deild vunnu sandavágsmenn stórsigur 3½-½ á B-liðnum hjá Havnini. A-liðið hjá Havnini vann 3-1 á Vestmanna Talvfelag. Í triðja dystinum í 1. deild vunnu klaksvíkingar 3-1 á kollfirðingum.

 

Høgni Egilstoft Nielsen, Rógvi Egilstoft Nielsen og Torkil Nielsen – faðir og synir – vóru eirindaleysir og vunnu á ávikavist á Rógva Mortensen, Herluf Hansen og Margar Berg. Sigurin kundi tað sama verið 4-0, tí á triðja borði sat Silas Eyðsteinsson til endans við vunnari støðu, men so snávaði hann og mátti sættast við remis móti Suna Merkistein.

 

 

 

Havnin A var stórfavorittur móti vestmenningum, men á tveimum borðum endaði tað javnt. Mest óvæntaða úrslitið var, at Jákup á Rógvi Andreasen telvaði remis á fyrsta borði móti stórmeistaranum Helga Dam Ziska. Jákup telvaði sum ein brandur og hevði munin í støðuni, tá ið teir samdust um remis. 

 

Á øðrum borði hjá vestmenningum sat hvalvíkingurin Martin Brekká, føroyskur topptelvari í nógv ár, men óvirkin seinnu árini – kortini var hann ikki meira rustaður enn so, enn at hann fekk ein tryggan remis móti Olaf Berg. Havnarmenn vunnu dystin á aftaru borðunum. Carl Eli Samuelsen og Luitjen Apol yngri vunnu á ávikavist Alfred Olsen og Kára Durhuus.

 

Klaksvíkingar vunnu 3-1 á kollfirðingum. Ólavur Simonsen, Rani Nolsøe og Wille Olsen vunnu á ávikavist Hans Kristiani Simonsen, Hanus Joensen og Rógva Mørkøre, stigið hjá kollfirðingum fekk Bernhard Thomsen móti Steintór Rasmussen. 

 

Úrslit í 7. umfari í dag og støðan í 1. deild:

 

Havnin B – Sandavágur ½-3½

Havnin – Vestmanna 3-1

Klaksvík – Kollafjørður 3-1

 

Sandavágur 22 stig

Havnin 20

Klaksvík 16½

Havnin B 9½

Kollafjørður 8½

Vestmanna 7½

 

 

Í 2.deild eru Klaksvík og Havnin fremstu liðini. Tey møttust í dag, og her vunnu klaksvíkingar ógvuliga sannførandi. Liðið hjá klaksvíkingum mannaðu Terji Petersen, Rani Baldursson, Tummas Martin Sólsker og Janus Skaale. Úrslitini í dag og støðan í 2. deild:

 

Havnin-Klaksvík ½-3½

Runavík-Kollafjørður 1-3

Sandavágur-Gøta 2-2

 

Klaksvík 19 stig

Havnin 17

Kollafjørður 15½

Runavík 12½

Sandavágur 12

Gøta 8

 

Í 3. deild eru toftamenn stinnastir. Teir vunnu í dag í toppdysti móti Havnar Telvingarfelag. Á fremstu borðunum á toftaliðnum sita Andrias Danielsen og fyrrverandi føroyameistarin Jens Chr. Hansen, og teir skara framúr við fullum stigatali. Úrslit í dag og støðan í toppinum í 3. deild:

 

Havnin-Toftir 1½-2½

Rókur-Runavík 2½-1½

Havnin B-Sandavágur 0-4

 

Toftir 22 stig

Klaksvík 19

Havnin 18½

 

Í alt ellivu lið.

 

Trý umfør eru nú eftir í landskappingini. Telvað verður aftur 23. februar. Næstsíðsta umfar er 1. mars, og tíggjunda og seinasta umfar verður 21. mars.