Havnarmenn vunnu stórsigur

Havnar Telvingarfelag vann ein knúsandi sigur í toppdystinum móti føroyameistarunum úr Sandavágs Talvfelag í fimta umfari í dag. Úrslitið var 3½-½. Sigurin ber í sær, at rættur spenningur nú er kyknaður upp millum oddaliðini í 1. deild um meistaraheitið.

Stórmeistarin Helgi Dam Ziska fekk revansju móti Høgna Egilstoft Nielsen á 1. borði. Í gjár telvaðu teir finaluumdyst í FM í kviktalvi, og eitt sindur óvæntað vann Høgni. Men í dag telvaði Helgi ógvuliga sannførandi og vann við rættari stórmeistaratelving. Hetta man vera fyrsti ósigurin hjá Høgna Egilstoft Nielsen í landskappingini í nøkur ár.

 

Martin Poulsen var ógvuliga væl upplagdur og vann í stórum stíli á Rógva Egilstoft Nielsen á 2. borði. Á triðja borði kom tað til eitt drúgt og rokmikið talv millum Olaf Berg og Silas Eyðsteinsson. Silas stóð væl, helst betur, men Olaf var kringur í miðspælinum og serliga í endaspælinum, og kláraði við fínum teknikki undir lemjandi tíðartrýsti at navigera seg sigrandi á mál.

 

Tann einasti, sum stóð royndina hjá føroyameistarunum í dag, var veteranurin Torkil Nielsen. Sjúrður Thorsteinsson hevði fyrimunin í endatalvinum, men Torkil vardi seg væl og manniliga og fekk talvið javnt.

 

Vágamenn hava verið heilt suverenir higartil í ár, og høvdu vunnið seg hálvtfjórða stig framum argasta kappingarneytan fyri tann fyrra av teimum báðum innanhýsis dystunum millum favorittarnar í dag. Eftir dagsins toppdyst er munurin tódnaður niður í eitt hálvt stig. 

 

Helgi Dam Ziska 2533 – Høgni Egilstoft Nielsen 2413 1 – 0

Martin Poulsen 2266 – Rógvi Egilstoft Nielsen 2382 1 – 0

Olaf Berg 2225 – Silas Eyðsteinsson 2040 1 – 0

Sjúrður Thorsteinsson 2131 – Torkil Nielsen 2145 ½ – ½

 

 

 

Eins og undanfarnu árini tykist FM-kappingin fyri lið aftur í ár at vera ein dystur millum Sandavág og Havnina. Einki av hinum feløgunum er ment at standa vágamonnum og havnarmonnum kurl.

 

Klaksvíkar Talvfelag er eins og undanfarin ár aftur á triðja plássi. Í dag vunnu klaksvíkingar 3-1 á B-liðnum hjá Havnini. Steintór Rasmussen og Terji Petersen vunnu á ávikavist Rógva Mortensen og Herluf Hansen á 2.- og 3 borði. Millum Ólav Simonsen og Luitjen Akselson Apol á 1. borði og Rana Baldursson og Suna Merkistein á 4. borði endaði tað javnt.

 

 

 

Triði dysturin í 1. deild í dag millum vestmenningar og kollfirðingar endaði javnur 2-2. Á 1. borði vann kollfirðingurin Hans Kristian Simonsen á Jákup á Rógvu Andreasen. Á øðrum borði var øvugt; har vann vestmenningurin Samson Højgaard á Kára Petersen. 

 

Á aftaru borðunum var remis. Vestmenningurin John Jacobsen var á 3. borði móti Heiðriki Jacobsen, sum er farin úr Havnar Telvingarfelag til Kollafjarðar Talvfelag, og á 4. borði telvaðu Hanus Joensen og Rói Holgarson eisini remis. 

 

Tríggir fyrrverandi føroyameistarar vóru í hesum dystinum – Hanus Joensen (1977), John Jacobsen (1978) og Hans Kristian Simonsen (2002).

 

 

 

Í hinum deildunum gongur eisini lívliga fyri seg. Har vóru dystirnir í fimta umfari eisini telvaðir í dag. 

 

Í 2. deild er Havnar Telvingarfelag á odda. Havnarliðið við Andrias Ziska (føroyameistari 1983) á odda gjørdi bart í dag við 4-0 sigri á kollfirðingum. Sama gjørdu klaksvíkingar móti runavíkingum. Havnin og Klaksvík eru fremst í 2. deild.

 

Í 3. deild eru toftamenn stinnastir. Oddamaður hjá teimum er fleirfaldi føroyameistarin Jens Chr. Hansen. Vert er eisini at nevna, at superveteranurin Jústines Hansen, sum man tátta í tey níti, hevur eisini verið uppi í hjá toftamonnum í vetur – og vunnið!

 

 

Úrslitini í fimta umfari í dag:

 

Havnin-Sandavágur 3½-½

Vestmanna-Kollafjørður 2-2

Havnin B-Klaksvík 1-3

 

Sandavágur 15½

Havnin 15

Klaksvík 10½

Havnin B 7

Kollafjørður 4½

Vestmanna 3½

 

 

Havnin-Kollafjørður 4-0

Klaksvík-Gøta 4-0

Runavík-Sandavágur 2-2

 

Havnin 14

Klaksvík 12½

Runavík 10

Kollafjørður 9½

Sandavágur 9

Gøta 5

 

 

Vestmanna-Toftir 0-4

Sandavágur-Havnin 1½-2½

Runavík-Klaksvík 0-4

Rókur-Havnin B 3½-½

Sandavágur B-Kollafjørður 3½-½

 

Toftir 17½

Klaksvík 13

Havnin 12

Kollafjørður 10½

Sandavágur 10

Rókur 9½

Runavík 8

Sandavágur B 7

Kollafjørður B 5½

Vestmanna 5

Havnin B 2

 

 

Landskappingin í talvi er nú hálvrunnin. Sætta umfar verður eftir nýggjár. Kappingin endar 21. mars, tá tíggjunda og seinasta umfar er í øllum deildum.

 

—

 

 

 

 

 

 

 

 

 

Torkil Nielsen.