Sandavágsmenn økja

Oddaliðið í landskappingini í talvi, Sandavágs Talvfelag, økti um leiðsluna við knúsandi 4-0 sigri á Klaksvíkar Talvfelag í triðja umfari sunnudagin.

Liðið hjá sandavágsmonnum hevur fingið 11 av 12 møguligum stigum eftir fyrstu trý umførini í kappingini. Teir, ið manna oddaliðið úr Vágum eru Høgni Egilstoft Nielsen, Rógvi Egilstoft Nielsen, Silas Eyðsteinsson og Torkil Nielsen. Sandavágs Talvfelag er nú hálvttriðja stig frammanfyri meistaraliðið úr Havnar Telvingarfelag.

Havnarmenn vunnu 3½-½ á Kollafjarðar Talvfelag, sum er aftast í deildini. Á fyrsta borði endaði javnt millum Carl Eli Samuelsen og Torbjørn Thomsen, á hinum borðunum vunnu Sjúrður Thorsteinsson, Rógvi Mortensen og Herluf Hansen.

Teir tríggir OL-telvararnir, Helgi Dam Ziska, Olaf Berg og Martin Poulsen, vóru heldur ikki við hesaferð, og hava enn einki stig vunnið fyri Havnar Telvingarfelag í liðkappingini.

Triði dysturin í 1. deild stóð millum B-manningarnar hjá Havnini og Klaksvík, og her vunnu klaksvíkingar 2½-1½.

 

Úrslitini í 1. deild – 3. umfar

Klaksvík – Sandavágur 0-4

Havnin – Kollafjørður 3½-½

Havnin 2 – Klaksvík 2 1½-2½

 

Støðan – 1. deild

Sandavágur 11 stig

Havnin 8½

Klaksvík 6

Klaksvík B 5½

Havnin B 4

Kollafjørður 1

 

Í 2. deild er Vestmanna Talvfelag á odda og í 3. deild er Sandavágs Talvfelag fremst.

 

Lykladystir í januar

Dystirnir hetta vikuskiftið vóru teir seinastu í landskappingini fyri jól. Telvað verður ikki aftur fyrr enn 19. januar.

Tá er avgerandi dupultumfar á skránni. Tá møtast oddaliðini úr Sandavági og Havn í tí fyrra av tveimum avgerandi sínamillum toppdystum í vetur.

Tíggjunda og seinasta umfar í landskappinginini verður 6. apríl.

Meira er um landskappingina á heimasíðu Talvsambandsins: faroechess.com.