Móti Balkalondum

Klokkan eitt í dag verður farið undir fimta umfar í EM-kappingini í talvi á Kreta.

Í gjár telvaðu okkara menn móti Makedonia, eisini nevnt FYROM, í dag er Montenegro á skránni. Bæði vóru partur av gamla Jugoslavia, sum datt sundur um aldamótið. Talvsiðvenjan er ógvuliga sterk í Balkalondum. Jugoslavia var tiltikið talvland. Tað segðist, at ongastaðni í heiminum var talváhugin so stórur, og telvararnir so góðir, sum í Sovjetsamveldinum og Jugoslavia – og Íslandi.

Vit taptu 3-1 fyri Makedonia í gjár. Helgi Dam Ziska og Rógvi Egilstoft Nielsen telvaðu remis á fyrsta og triðja borði. Høgni Egilstoft Nielsen og John Rødgård taptu.

Montenegro er mannað við trimum stórmeistarum og einum altjóða meistara. Á trimum borðum hava teir hægri styrkitøl – í miðal útivið hálvtannaðhundrað stig hægri. Helgi Dam Ziska hevur kortini hægri styrkital enn mótstøðumaður hansara á fyrsta borði. Montenegro er styrkismett nummar 30, vit 35. Føroyska liðið er í løtuni nummar 38 av teimum 40 liðunum í kappingini.

Á okkara liði í dag telva Helgi Dam Ziska, Høgni Egilstoft Nielsen, Rógvi Egilstoft Nielsen og John Arni Nilssen. John Rødgård er ikki við í dag.

35	Faroe Islands		–	30	Montenegro
	GM	Ziska, Helgi Dam	2545	–	GM	Djukic, Nikola	2519
	FM	Nielsen, Hogni Egilstoft	2352	–	GM	Blagojevic, Dragisa	2488
	FM	Nielsen, Rogvi Egilstoft	2338	–	GM	Kosic, Dragan	2493
	IM	Nilssen, John Arni	2326	–	IM	Draskovic, Luka	2450