Úrslit frá FM fyri gentur

Tann 30. november var FM í talvi fyri gentur hildið í Kolshøll á Eiði. 5 umfør vóru telvað, og 6 gentur kappaðust um FM heitið, umframt úttøku til norðurlandameistaraskapið fyri gentur. NM verður í 2025 í Danmark.

Talvsamband Føroya hevur seinastu 2 árini sent 2 umboð til NM fyri gentur á hvørjum ári. NM er skipað í 3 aldursbólkum, U13, U16 og U20, og seinnu árini hava Føroyar bara haft luttakarar við í yngsta bólkinum. Tó eru vónir um at hava umboð í øllum bólkum í framtíðini. 

Aldursbólkarnir til NM eru hesir:

Bólkur A U20: Fødd í 2004-2007

Bólkur B U16: Fødd í 2008-2009

Bólkur C U14: Fødd í 2010- og yngri

 

Úrslit frá FM fyri gentur 2024:

Eins og í undanfarnu árunum vóru tað Lisa Xin og Natasja Mørkøre báðar, sum kvalifiseraðu seg til NM. Tær vórðu ávikavíst nummar 1 og 2 í FM kappingini. Lisa fekk fult stigatal, og Natasja misti bara 1, og tað var ímóti vinnaranum. Síðani varð Annika Lutzen nummar 3 við 3 út av 5 møguligum stigum. 

Men ongin fór tómhentur heim, tí sum gávu fyri 2 árum síðani, stuðlaði Klaksvíkar Kommuna føroyskari gentutelving við vøkrum hálsketum; hálsketur við silvurlittari frúgv hangandi í, til tær ið luttóku í FM í 2022. Nakrar av hesum hálsketunum lupu av tað árið, og komu til sín rætt í ár.

Við hesum vil TSF ynskja Lisu og Natasju enn einaferð hjartaliga tillukku við NM úttøkuni, og bestu eydnu til norðurlendsku kappingina.