Talvsamband Føroya Faroechess
Sunnudagin 10. november verður triðja liðkapping fyri børn telvað í Vestmanna.
Liðkappingin byrjar sunnudagin kl. 14.00 í Miðnám í Vestmanna. Liðkappingin fyri børn verður telvað, samstundis sum felagumfar í liðkappingini fyri vaksin verður telvað í Vestmanna. Hetta hevur við sær, at rættuliga nógvir føroyskir telvarar verða samlaðir undir sama taki sunnudagin. Allarheslt hava ongantíð sitið so nógvir føroyskir telvarar við talvborðið samstundis.
Kappingin verður skipað eins og kappingarnar í Havn og á Eiði fyrr í ár. 4 børn telva á hvørjum liði, og kunnu liðini hava upp til 2 útskiftarar við. 5 umfør verða telvað. Talan er um kvik-talv, har ið børnini brúka klokku. Tíðin er 10 minuttir í part til talvið, harafturat verða 5 sekund løgd afturat fyri hvønn leik.
Tiltakið er eitt gott høvi hjá minni royndum og nýliga byrjaðum telvarum at royna seg. Telvararnir læra at brúka klokkuna, koma at kenna talvumhvørvið og møta øðrum ungum talvspírum.
Kappingin er býtt upp í tveir aldursbólkar: 4. flokkur og yngri og 5. flokkur og eldri. 3 tey bestu liðini í hvørjum aldursbólki vinna heiðursmerkir. Tað verða tríggjar kappingar av hesum slag í 2024. Fyrsta kappingin varð í Havn 6. oktober og síðsta kapping verður 10. november.
Øll eru vælkomin at melda lið til: skúlar, talvfeløg og onnur áhugað. Skrivið til kappingarleiðaran á kappingarleidarin@faroechess.com. Tit upplýsa navn á liðinum, nøvn á telvarunum, bygd/bý/skúla/talvfelag og aldursbólk. Freistin at melda til er fríggjadkvøldið 8. november kl. 20.00.
