Seinastu Tíðindini

19 ára gamli Casper Liu úr Danmark vann stóru Janus Open-talvkappingina á Eiði. Eingin føroyskur telvari røkk upp millum fremstu tríggjar telvararnar í kappingini.

Tað gjørdist eitt finalutalv burturav í seinasta umfari í dag millum oddamenninar Ádam Ómarsson úr Íslandi, sum vann fyrstu seks talvini í kappingini, og avbjóðaran, Casper Liu, sum var eitt hálvt stig aftari. 

Casper koppaði íslendska hvirluvindinum og tryggjaði sær einsamallur sigurin í kappingini.

Casper Liu er 19 ára gamal. Hann endaði nummar trý í DM-meistaraflokkinum í fjør, fyrsta árið, ið hann var skikkaður at telva um DM-heitið. Vit fara tí væntandi at hoyra meira um hann í komandi tíðum.

Sama kann ivaleyst sigast um tann bara 17 ára gamla Ádam Ómarsson úr Íslandi, sum var um reppið at vinna kappingina. Kanska verður hann nýggi stórtelvarin, sum íslendingar bíða eftir.

Favoritturin sveik

Føroysku úrslitini vóru í lakara lagi. Okkara OL-telvarar, Høgni, Luitjen og Rógvi, høvdu hægstu styrkitølini av øllum, men eingin teirra røkk fram millum teir fremstu tríggjar í røðini.

Stórfavoritturin Høgna Egilstoft Nielsen hevði heldur miseydnaða kapping. Hann tapti fyri tveimum íslendingum, Páll Gauti Jónsson og Símun Thorhallssyni, og reyk tí afturum í røðini. 

Rógvi Egilstoft var fyri somu lagnu, og endaði uttan fyri topp 10. Sum høvuðsfyriskipari hevur hann rímiligt ikki fingið hugsavnað seg til fulnar um sjálva telvingina.

Besta føroyska úrslitið fekk føroyameistarin Luitjen Akselsson Apol. Hann endaði nummar fýra, men spilti sær spælið við at tapa fyri tí unga Peturi Gardar Magnussen. Luitjen fekk ongantíð høvið til at møta teimum fremstu í kappingini, tó at hann vann hini seks talvini.

Til stuttleikar kann nevnast, at av feðgunum í Sandavági var pápin, Torkil Nielsen, bestur hesaferð. Hann legði báðar synirnar, Høgna og Rógva, aftur um seg. Torkil vann í síðsta umfari spælandi á Páll Gauta Jónssyni, sum koppaði Høgna tíðliga í kappingini.

Topp 10 í Janus Open gjørdist hesin:

1. Casper Liu (Danmark) 2251  6½ stig

2. Ádam Ómarsson (Ísland) 2026   6 stig

3. Símun Thorhallsson (Ísland) 2223  6 stig

4. Luitjen Akselsson Apol (Føroyar) 2305 6 stig

5. Mikkel Vinh Loftgaard (Danmark) 2235 5½ stig

6. Noah Krug Wahlgreen (Danmark) 2148 5½ stig

7. Torkil Nielsen (Føroyar) 2041 5½ stig

8. Høgni Egilstoft Nielsen (Føroyar) 2390  5 stig

9. Bjørn Holm Birkisson (Ísland) 2153  5 stig

10. Carles Melado (Spania) 1926  5 stig

Í alt 103 telvarar.

Rós til fyriskiparar

Tað er at frøast um, at skipast kann fyri so stórari talvstevnu í Føroyum um veturin, og at til ber at lokka so frægar útlendskar telvarar hendanvegin. 

Samstundis er tað ógvuliga gleðiligt, at føroyskir telvarar vóru fúsir at fara so mannsterkir til Eiðis at telva saman við øllum hinum í Kolshøll. Talan var sum nevnt um metstóra luttøku í einari talvkapping í Føroyum. 

Rógvi Egilstoft er høvuðsstigtakari og fyriskipari. Hann eigur stórt rós uppiborið fyri so stóra fyriskipan, men aftrat sær hevur hann havt dyggan stuðul bæði úr Talvsambandinum og lokalsamfelagnum kring talvfelagið Rók í Sundalagnum.

Hetta gjørdist ein prýðiligur og vakur kransur til heiðurs fyri eiðismannin Janus í Løðuni, sum var eldsál í talvfelagnum Róki, sjálvur gávuríkur og lovandi telvari sum smádrongur, barnaføroyameistari í harðari kapping við Flóvin Tór Næs í yngsta flokkinum í 1986 fyri teir, sum vóru 10 ár og yngri, men doyði í fjør, bara 46 ár. Honum var kappingin uppkallað eftir.

Vónandi var alt hetta eisini tekin um, at talváhugin er vaksandi millum føroyingar nú á døgum.

Rógvi Egilstoft er høvuðsfyriskipari av størstu talvstevnu í Føroyum higartil – Janus Open á Eiði hetta vikuskiftið.

Stúgvandi fult í Kolshøll á Eiði. Fleiri enn hundrað telvarar eru við í kappingini Janus Open.

Óvæntað hevur íslendingurin Ádam Ómarsson lagt seg einsamallan á odda í talvkappingini Janus Open á Eiði. 

Hann hevur sum hin einasti av øllum vunnið hvørt talv, nú fimm umfør eru avgreidd. Eftir styrkitølunum stóð Ómar sum hin fimtandi í røðini, so hann hevur tikið øll á bóli. 

Útlendsku telvararnir gera um seg í kappingini. Fremstu sjey telvararnir eru allir útlendingar. Høgni Egilstoft Nielsen, sum hevur hægsta styrkitalið í kappingini, er í løtuni nummar átta í røðini. Høgni hevur tapt eitt talv, móti øðrum íslendingi, Páll Gauti Jónsson.

Støðan í oddanum eftir fimm umfør:

1. Ádam Ómarsson 2026 (Ísland)) 5 stig

2-4. Páll Gauti Jónsson 2152 (Ísland) 4½

2-4. Mikkel Vinh Loftgaard 2235 (Danmark) 4½

2-4. Casper Liu (Danmark) 2251 (Danmark) 4½

5-14. Símun Tórhallsson 2223 (Ísland) 4

5-14. Bjørn Holm Birkisson 2153 (Ísland) 4

5-14. Noa Krug Wahlgreen 2148 (Danmark) 4

5-14. IM Høgni Egilstoft Nielsen 2390 (Føroyar) 4

5-14. Hans Kristian Simonsen 2146 (Føroyar) 4

5-14. Hallgerður Thorsteinsdóttir 2188 (Ísland) 4

5-14. Herluf Hansen 1995 (Føroyar) 4

5-14. Carles Melado 1926 (Spania) 4

5-14. Luitjen Akselsson Apol 2305 (Føroyar)

5-14. Ingi Ellingsgaard 1710 (Føroyar) 4 stig

Tvey umfør í dag

Kappingin endar í dag. Tvey umfør eru. Sætta umfar byrjar klokkan 13:30. Og sjeynda og seinasta umfar byrjar klokkan 17.00.

Í sætta umfarið verður telvað soleiðis á fremstu borðunum:

Páll Gauti Jónsson – Ádam Ómarsson

Casper Liu – Mikkel Vinh Loftgaard

Hans Kristian Simonsen – Høgni Egilstoft Nielsen

Luitjen Akselsson Apol – Herluf Hansen

Símun Tórhallsson – Hellgerður Thorsteinsdóttir

Íslendingar móti íslendingum, danir móti dønum og føroyingar móti føroyingum.

Telvað verður í Kolshøll á Eiði, og til ber at fylgja við leik fyri leik á fremru borðunum á netinum. Leinki sæst á heimasíðu Talvsambandsins: faroechess.com.

Talvsiðvenjan í Norðstreymoy

Sum áður nevnt er luttøkumet sett í hesari kappingini. Ongantíð eru so nógv komin saman at telva í Føroyum sum á Eiði hetta vikuskiftið. Í alt 103 telvarar eru við. Tað mesta higartil er 101, tað var, tá norðurlandameistarakappingin var í Føroyum í 1987.

27 eru úr norðurøkinum, sum Talvfelagið Rókur í Sundalagnum fevnir um.  Av hesum er á leið helvtin mestsum nýbyrjarar.

Á Eiði hevur einki talvfelag verið í nógv ár. Men Eiðis Talvfelag er elsta talvfelag í Eysturoynni. Tað var stovnað longu í 1956. Í 60-unum eru eiðismenn tríggjar ferðir við í sokallaðu Wood-kappingini, sum í 50-unum og 60-unum var tað, ið svaraði til eina landskapping í talvi fyri føroysk feløg. Eiðis Talvfelag er við í Wood-kappingini í 1964, 1966 og 1967.  

Eiðis Talvfelag er uppi í at stovna Talvsamband Føroya í 1970, og er millum tey seks feløgini, sum manna 1 deild – ella A-deildina, sum tað tá var rópt – tá landskappingin byrjaði veturin 1970/71.

Nógvir av telvarunum á Eiði itu Hans sum fyrra lið í tvífornavni. Hetta høvdu skemtararnir í V4-útvarpsundirhaldssendingini fingið við, tá ið teir sendu av Eiði eitt leygarkvøld tíðliga í 70-unum. Tá vóru allir tevararnir nevndir: Hans Egil, Hans Edvard, Hans Erland, Hans Jákup, Hans Julian, Hans Esbern – og kanska var onkur annar eisini.

Telvingin á Eiði fjarar burtur miðskeiðis í 70-unum. Tá kyknar upp annað felag á Oyri. Talvfelagið Rókur er stovnað í 1974. Har er beinanvegin futtur í, í 1978 verður Bergur Johannesen unglingaføroyameistari, og árið eftir skipar felagið fyri FM-einstaklingakappingini í nýggja Felagsskaúlanum á Oyrarbakka.

Og í 1979 verður talv nýggj grein hjá ítróttafelagnum Streymi í Hvalvík-Streymnesi. Har brestur av álvara fyri nev, og nógvir heilt góðir telvarar koma undan. Streymur vinnur FM í unglingadeildini longu í 1980 og aftur í 1982, og í 1986 gera teir bart í fremstu deildini og vinna føroyameistaraheitið í harðari kapping við Havnar Telvingarfelag. Á vinnandi liðnum eru Gunnar Joensen, Martin Brekká, Finnbjørn Zachariassen og Hanus Brekká.

Í dag er øll telving í Sundalagnum savnað í felagnum Róki. Felagið telvar sínar heimadystir eftir tørni á Oyrarbakka og á Eiði, viðhvørt við Margáir í Streymnesi. Felagið er á odda í 3 deild, so enn gongur ein løta til vit síggja teir í 1 deild.

Áhugin tykist vera stórur, Í løtuni er kanska mest gongd í á Eiði, men í liðkappingini eru fleiri telvarar, sum eru úr syðra parti av Sundalagnum.

Ratingfavoritturin Høgni Egilstoft Nielsen og Bergur Johannesen av Oyri – unglingaføroyameistari 1978.

Nógv ár eru millum tey yngstu og teir tilkomnu, sum telva á Eiði. Lítil smágenta bjóðar Peturi Páll Mikkelsen úr Gøtu Talvfelag av.

Toppdysturin millum Havnina og Sandavágur er júst byrjaður á Finsen. Á fremru borðunum síggjast teir fýra, sum telvaðu flestu dystirnar á OL-landsliðnum fyri sløkum hálvum ári síðani. Á 1 borði Helgi Dam Ziska (vm) og Rógvi Egilstoft (hm). Innanfyri Luitjen Akselsson Apol og Høgni Egilstoft Nielsen. Dysturin endaði javnur 2- 2. Havnarmenn varðveita tí tepru leiðsluna í oddastríðnum. Liðini møtast aftur í seinasta umfari í mars.

Mynd: Katrin Apol

Tað er stórur spenningur í 1 deild – bæði í toppi og botni. Tað er støðan eftir dystirnar í fimta umfari, sum í vórðu telvaðir í hølum Havnar Telvingarfelags á Finsen í dag.

Í oddanum syrgja havnarmenn og sandavágsmenn sum vant fyri undirhaldinum og hørðu FM-orrustuni, og í niðaru hálvu er óvanliga hørð kapping í ár.

Toppdysturin endaði 2 – 2. Á 1 borði var liðugt beinanvegin. Longu eftir sjey leikir beyð stórmeistarin remis. Rógvi, sum er heima úr Spania, tók av.

Á øðrum borði var afturímóti drúgvur og harður dystur millum teir báðar, sum í vár togaðust um FM-heitið í finaluumdysti. Føroyameistarin vann eina finnu í miðtalvinum, men Høgni gav honum dygt mótspæl. Luitjen býtti snildisliga tunga fólkið upp fyri at loysa spenningin í støðuni, men brátt sást, at meirfinnan veitti honum ongan fyrimun í endastalvinum. Tvørturímóti ráddi hjá báðum í allari tíðarneyðini um at hava tunguna mitt í munninum, tí telvast skuldi ógvuliga beint fyri at varðveita javnvágina. Eisini remis á øðrum borði.

Á 3 borði vann Havnin. Martin Poulsen trýsti spakuliga við svarta fólkinum Silas aftur í heldur kroysta støðu, og til endans var eingin vón hjá honum at bjarga støðuni. Rutinan hjá fleirfalda føroyameistaranum tóktist gera munin.

Á 4 borði javnaði Sandavágur. Tann ungi Jón í Horni Nielsen telvaði sera væl og sannførandi við svarta fólkinum, og spældi Sjúrð Thorsteinsson út av borðinum. Sjáldan at Sjúrður, ið vanliga er so tryggur og varin, fær slíka viðferð.

Úrslitini í hinum báðum dystunum lagaðu seg so, at rættiligur spenningur er kyknaður upp millum aftaru liðini. Bara eitt hálvt stig skilir tey trý liðini í hesum stríði.

A-liðið hjá Klaksvík vann tryggan 3-1 sigur á B-liðnum hjá Havnini. Ólavur Simonsen gekk undan sum gott fyridømi við flottum sigri á 1 borði.

Kollafirðingar fingu fyrsta sigurin í ár. Við einum vala liðavriki koppaði unga kollafjarðarmanningin B-liðnum hjá Klaksvík.

Meira kann síggjast – millum annað leikirnir í talvunum – á heimasíðu Talvsambandsins: faroechess.com.

1 deild – 5 umfar (12 januar)

Havnin – Sandavágur 2 – 2
Helgi Dam Ziska – Rógvi Egilstoft ½ – ½
Luitjen Akselsson Apol – Høgni Egilstoft Nielsen ½ – ½
Martin Poulsen – Silas Eyðsteinsson 1 – 0
Sjúrður Thorsteinsson – Jón í Horni Nielsen 0 – 1

Klaksvík – Havnin B  3 – 1
Ólavur Simonsen – Herluf Hansen 1 – 0
Rani Baldursson – Margar Berg 1 – 0
Heðin Gregersen – Elias Petersen ½ – ½
Terji Petersen – Suni Merkistein ½ – ½

Kollafjørður – Klaksvík B. 2½ – 1½
Árant Djurhuus – Wille Olsen ½ – ½
Rógvi Mørkøre – Ingolf Gaard ½ – ½
Karl M. Dahl – Rani Nolsøe 1 – 0
Markus Jacobsen – Tummas M. Sólsker ½ – ½

Støðan

Havnin 15½ stig
Sandavágur 14½
Klaksvík 11½
Klaksvík B. 6½
Kollafjørður 6
Havnin B. 6

Vágamenn kós móti 1 deild

Sandavágs Talvfelag ætlar sær aftur at hava tvey lið í bestu deildini. Teir eru í løtuni besta boðið upp á ein vinnara í 2. Deild. Í dag vunnu teir móti teimum í Runavík.

Toftamenn snávaðu í oddastríðnum. Heldur óvæntað noyddust teir at dvína fyri blaðungu manningini hjá Havnar Telvingarfelag.

2 deild – 5 umfar (12 januar)

Kongshavn (Runavík) – Sandavágur 1 – 3
Brandur Højgaard – Bernhard Augustinussen 0 – 1
Henrik W. Joensen – Jón Atlason 0 – 1
Meinhard Danielsen – Ingi Wiberg ½ – ½
Zaid Al-Jay – Jónfinn Thomsen ½ – ½

Klaksvík – Havnin 2½ – 1½
Einar Gregersen – Øssur Joensen ½ – ½
Rókur Davidsen – Poul Poulsen 1 – 0
Flóvin M.Tummasarson – Jaspur T. Gaard 0 – 1
Rógvi Heinason Olsen – Jón Andreasen 1 – 0

Havnin B. – Toftir 2½ – 1½
Súni Jacobsen – Andrias Danielsen 0 – 1
Petur G. Magnussen – Bogi Ziska ½ – ½
Brestir Samuelsen – Andreas Andreasen 1 – 0
Eyðun L. Staksberg – Sigurd Joensen 1 – 0

Støðan

Sandavágur 12½ stig
Klaksvík 11
Havnin B. 10½
Toftir 10
Havnin 8½
Kongshavn (Runavík) 7½

Hinar deildirnar

Veðrið darvaði aftur telvingini í dag, og ein dystur í 3 deild var útsettur. Í løtuni er ikki greitt, um allir dystir vórðu telvaðir í 4 deild.

3 deild – 5 umfar (12 januar)

Dysturin Vestmanna – Gøta útsettur til 23 januar.
Rókur – Kollafjørður 1 – 3
Havnin – Sandavágur 0 – 4
Úrslitini í 4 deild eru ikki komin enn.

Hálvleikur

Liðkappingin er nú komin í helvt. Farið verður undir seinnu leikhálvu um tvær vikur. Kappingin endar 22 mars. Telvað verður soleiðis í seinnu hálvu:

26. januar (6. umfar)
9. februar (7. umfar)
23. februar (8. umfar)

9. mars (9. umfar)

22. mars (10. umfar)

Í løtuni hava 81 telvarar boðað frá luttøku. Av hesum eru fleiri útlendingar; spaniólar, íslendingar og danir. Telvað verður í Kolshøll fríggjakvøldið, leygardagin og sunnudagin í komandi viku. Vinnarin fær 5.000 krónur, nummar tvey 3.000 krónur og nummar trý fær 2.000 krónur. Freistin at boða frá luttøku er úti hósdagin. 

Luttøkan er óvanliga stór. Mettalið á luttakarum til eina talvkapping í Føroyum er frá norðurlandameistarakappingini í 1987, sum var Norðurlandahúsinum. Tá vóru 101 telvarar við. Næstmesta luttøkutal var í FM-einstaklingakappingini í Havn í 2003. Tá vóru 95 telvarar við. At so nógvir telvarar eru við í kapping í Føroyum á hávetri er sjáldsamt. Tað boðar helst frá stórum talváhuga millum føroyingar, men uttan iva eigur ein onnur eldsál, fyriskiparin Rógvi Egilstoft, stóran heiður uppibornan fyri, at so væl hevur vignast higartil.