Havnin føroyameistari

Tað reið um snarið!

Sandavágsmenn mundu gjørt bart og tikið øll á bóli í avgerandi dystinum um FM-heitið í seinasta umfari í landskappingini í talvi í dag. Neyvan nakar hevði grunað, at Sandavágs Talvfelag fór at leggja oddaliðið hjá Havnar Telvingarfelag afturum seg í endaspurtinum, tí til tess kravdist ein ógvuliga ruddiligur sigur í sinámillum finaludystinum, men tað mundi lukkast.

Sandavágur vann 3-1 og veitti liðnum hjá Havnini fyrsta ósigurin í allari kappingini. Havnarmenn høvdu eitt stig fyri neyðini í dag, skuldu teir taka FM-heitið úr Vágum til Havnar, og tað stigið eydnaðist teimum við bit og slit at fáa. Á 2.-, 3.-, og 4. borði vóru vágamenn náðileysir. Høgni Egilstoft Nielsen vann á Martin Poulsen, Torkil Nielsen vann á Carl Eli Samuelsen og Silas Eyðsteinsson vann á Sjúrði Thorsteinssyni.

Olaf sigursharri

Hetjan hjá havnarmonnum var Olaf Berg á 1. borði. Við hvíta fólkinum koppaði hann føroyameistaranum Rógva Egilstoft Nielsen.

Hetta var fyrsta talvið í dystinum, sum var liðugt, og tí kom helst ein ávísur friður á hinar tríggjar á havnarliðnum. Kanska gjørdust teir í so friðarligir, tí endin var, at allir taptu. Men tað skal einki takast frá vágamonnum, sum vístu fyrimyndarligan stríðsvilja og gott spæl.

Stórmeistarin Helgi Dam Ziska var ikki við á havnarliðnum í dag, tí hann er burturstaddur.

FM-liðið hjá Havnar Telvingarfelag í vetur hava hesir seks mannað: 1. Helgi Dam Ziska 2. Olaf Berg 3. Martin Poulsen 4. Carl Eli Samuelsen 5. Sjúrður Thorsteinsson  6. Herluf Hansen.

Gøta upp og Klaksvík niður

Nýtt lið í fremstu deildini komandi kappingarár verður Gøtu Talvfelag. Teir vunnu í dag á vestmenningum, og tryggjaðu sær sostatt 1. plássið og uppflyting til 1. deild. Har hava teir ikki verið í eini tjúgu ár.

Klaksvíkar Talvfelag hevur í fleiri ár havt tvey lið í fremstu deildini, men ikki komandi kappingarár. Annað lið hjá teimum gjørdist ov stutt í ár og flytur niður í 2. deild.

Í 3. deild vann Havnar Telvingarfelag.

 

1. deild

Sandavágur – Havnin 3-1

Klaksvík 2 – Havnin 2 1-3

Kollafjørður – Klaksvík 1 2½-1½

Endaliga støðan

1. Havnin 30½

2. Sandavágur 29½

3. Klaksvík 1  22½

4. Havnin 2  14½

5. Kollafjørður 13

6. Klaksvík 2 10

 

2. deild – endaliga oddastøðan

1. Gøta 23½

2. Sandavágur 22

3. Vestmanna 20

 

3. deild – endaliga oddastøðan

1. Havnin 22½

2. Runavík 18½

3. Klaksvík 18

 

Skiftandi vinnarar

Hyggja vit at gongdini seinastu tíggju árini, eru fýra feløg, sum hava vunnið fremstu deildina í landskappingini í talvi.

Seinnu árini hevur Sandavágs Talvfelag sitið tungt á trónuni, men nú raknaði aldursforsetin við aftur.