Talvsamband Føroya Faroechess
Føroyska talvlandsliðið fekk í kvøld eitt framúrskarandi úrslit á talvolympiaduni í Ungarn.
Seinastu Tíðindini
Vunnu á Luksemburg
Brøðurnir Rógvi (vm) og Høgni Egilstoft Nielsen (hm) úr Sandavági gjørdu bart á talvolympiaduni í gjár. Rógvi var sigursharrin í dystinum, og Høgni tryggjaði sær IM-heitið sum altjóða meistari.
Tað bleiv ein góður dagur hjá føroysku telvarunum í Budapest í gjár. Fyrst tryggjaði Høgni Egilstoft Nielsen sær sín triðja IM-norm, sum fer at vissa honum heitið sum altjóða meistari (IM). Og í øðrum lagi vunnu Føroyar dystin á Luksemburg. Remis á trimum borðum, og so vann Rógvi avgerandi talvið og harvið dystin.
Sigurin ber í sær, at Føroyar nú hava otað seg fram á 48 pláss í røðini av teimum 188 londunum í kappingini. Føroyar hava ellivu stig fyri fimm vunnar dystir, ein javnan og tríggjar taptar. At enda nummar 48 hevði verið sera flott úrslit, men tvey umfør eru eftir at telva.
Luksemburg (85) 1½ Føroyar (66) 2½
IM Michael Wiedenkeller (2406) Høgni Egilstoft Nielsen (2379) ½ – ½
WGM Elvira Berend (2219) Rógvi Egilstoft (2278) 0 – 1
Marc Mertens (2120) IM John Rødgaard (2273) ½ – ½
Pierre Gengler (2097) Luitjen Akselsson Apol (2219) ½ – ½
John Rødgaard lýsir dystin soleiðis:
Níggjunda umfar í OL gjørdist ein minniligur dagur í føroyskari telvving. Høgni Egilstoft Nielsen lýkur nú allar treytir fyri at verða tilnevndur altjóða meistari.
Talvið móti svenska-luksemburgska Wiedenkeller bleiv spennandi. Høgni telvaði Benoni, sum verður hildið at vera ivasamt, men okkara maður var væl fyrireikaður. Tá rókurin á b4 ikki slapp heim aftur, offraði Høgni hann fyri svarta bispin hjá hvítum. Og nú sást brátt, at Wiedenkeller hevði mist kraftina í virkna spælinum, og at býtismunurin, hann vann, var einki kvetti. Tá sviin legði upp til leikendurtøku, tók Høgni rímiligt av, tó at hann í veruleikanum hevði munin í støðuni. Instruktivt talv.
Rógvi hevði aftur eitt talv til lærubókina. 11. Bxd5! Svartur hevur nú tvinnar kostir; antin at átaka sær veika finnustøðu ella at lata Rógva virkið spæl. Tað bleiv tað fyrra. Rógvi styrkti nú stigvíst um støðu sína. Allir menn hjá hvítum søktu at veiku svørtu puntunum hjá svørtum, sum alt hitt svarta fólkið vardi. Hvat gert tú so? Tú laverar. Tað er, at tú melur í klingur, til mótstøðumaðurin villist. So líðandi møðist tú, fært tú ikki annað enn vart teg uttan at eiga nakran skapandi leik. Hey, nú sást ein leki har, so líðandi gekk mótstøðumaðurin til grundar.
Eg telvaði eina byrjan, sum eg í fyrireikingunum til OL hevði avrátt ikki at nýta. Men hvat, nú bar til og brátt hevði eg greiðan fyrimun. Eg hevði ymsar møguleikar at vinna, men fór so at ivast og himprast, og endin var, at eg valdi ein tryggan remis.
Luitjen spældi aftur eitt lívligt og margháttligt talv, ella rættari mótstøðumaðurin. Hann flutti í skundi fleiri leikir í einum frábrigdi, sum var móti eitt stutt skifti fyri útivið fjøruti árum síðani. Hví hetta frábrigdi fór av aftur móta, veit eg ikki, tí tað sær væl spælandi út. Luitjen hevði eitt baks av støðuni. Tað bylgdist báðar vegir, men tó eydnaðist honum at fáa í lag eitt hættisligt kongsálop. Mótstøðumaðurin mátti til endans offra frúnna fyri annan rókin, men afturfyri hevði hann tvær vandamiklar frífinnur. Tær kundu ikki steðgast, og tí mátti Luitjen skáka mótstøðumannin upp í saman, so at talvið endaði javnt.
Høgni – triði føroyski IM-arin
Endiliga lukkaðist tað.
27 ára gamli Høgni Egilstoft Nielsen úr Sandavágs Talvfelag er nú IM-ari í talvi. Formliga tilnevningin verður einaferð í næstum. Leingi hevur verið bíðað, men nú er málið rokkið. Føroyar hava fingið sín triðja altjóða meistara í talvi. Telja vit Helga Dam Ziska við, sum nú er stórmeistari, so verða tað fýra.
John Rødgaard gjørdist IM-ari í 1990. John Arni Nilssen var næstur í 2006, so kom Helgi Dam Ziska í 2007 – bara 17 ára gamal – og nú Høgni.
Tríggir sonevndir IM-normar eru kravdir til IM-heitið. Høgni vann fyrsta normin í stóru svensku kappingini Rilton Cup í 2017. Annar normurin kom árið eftir í stóru altjóða kappingini Faroes Open í Kollafirði. Men so máttu vit bíða í heili sjey ár eftir triðja norminum, og hann kom í dag.
So er eitt annað krav. Og tað er, at tú vinnur teg upp á 2400 í rating. Tann setningurin var rokkin í 2018, sama ár sum annar normurin kom. Hægsta styrkital hjá Høgna hevur verið 2416, tað hevði hann í desember 2019. Í august 2023 datt Høgni niður um aftur 2400, og enn er hann ikki sloppin upp aftur á 2400, men nú nærkast hann av álvara aftur.
Høgni hevur nú í fleiri ár verið næstbesti telvari í Føroyum. Hann var næstan eitt slag av føroyskum talvundurbarni. Hann telvaði 12 ára gamal í FM-landsliðsbólkinum í 2010 – og bleiv nummar trý! Í 2014 vann hann føroyameistaraheitið fyri einstaklingar 16 ára gamal – sum hin yngsti nakrantíð. Og tað var ikki við mýkindum – hann vann við fullum stigatali. Tað er eindømi síðan farið var í 1972 at telva um árliga FM-heitið í talvi.
Høgni og Rógvi eru synir Torkil Nielsen, ið sjálvur var av bestu telvarum í Føroyum í síni tíð.
Avstralia er næst
Nú føroyska liðið hevur strítt seg so langt fram í røðina, er greitt, at vit fáa dygga mótstøðu í næstsíðsta umfari leygardagin.
Vit møta Avstralia, sum er styrkismett nummar 37. Teir hava fýra stórmeistarar og ein altjóða meistara á liðnum. Miðalstyrkitalið er 2526.
Hetta verður okkara fimti dystur móti Avstralia. Vit hava tapt allar. Longu á fyrstu olympiaduni hjá Føroyum í 1970 høvdu vit fyrsta dystin. Vit taptu 4-0, men Henry Olsen kundi vunnið á 1 borði móti hinum seinni so kenda Walther Browne, ið fleiri ferðir umboðaði USA á talv-OL. Henry kundi vunnið talvið í einum leiki, men hvørgin varnaðist standin, og so endaði tað, sum øll væntaðu – 4-0 til Avstralia.
Annar dysturin var í Buenos Aires í 1978. Avstralia var sterkasta lið, sum vit møttu ta ferðina. Vit fingu eitt remis – Luitjen Apol telvaði javnt móti Max Fuller á øðrum borði. Sama var í Luzern í 1982, hesaferð var tað Súni Ziska, sum gav okkum hálva stigið á triðja borði. Súni snýtti til endans mótstøðumannin Darryl Johansen við einum rókaoffri og pattstøðu í sera drúgvum talvi.
Fjórði dysturin var í 2018. Tá var úrslitið 3-1. Helgi Dam Ziska remis á 1 borði móti Smirnov og Olaf Berg eisini remis á 3 borði.
OL-dystir móti Avstralia
1970 Føroyar – Avstralia 0 – 4
1978 Føroyar – Avstralia ½ – 3½
1982 Føroyar – Avstralia ½ – 3½
2018 Føroyar – Avstralia 1 – 3
India á gullkós
India telvaði í dag javnt 2 – 2 móti Usbekistan, sum vann OL seinast. Hetta er fyrsti dysturin, at India ikki vinnur. Teir eru tí einsamallir á odda, tvey stig undan trimum londum, sum eru næst í hølunum.
Í dag er stórdystur á skránni. Tá møttast toppliðini India og USA, sum eru styrkismett ovast. Vinnur USA verður øgilgur spenningur í síðsta umfari sunnudagin.
Norra tapti í dag 3 – 1 fyri Slovenia, og eru tí dragnaðir úr topp 10. Magnus Carlsen tapti óvæntað fyri russiska avhopparanum Fedoseev, sum Helgi Dam Ziska tapti fyri fyrradagin.
Oddaliðini eru hesi:
India 17 stig (dystarstig: 2 fyri vunnan dyst, 1 fyri javnleik).
USA 15
Usbekistan 15
Kina 15
Føroyar fingið nýggjan altjóða talvmeistara
Høgni Egilstoft Nielsen – endiliga IM-ari í talvi
Fyri løtu síðani endaði talvið millum Høgna Egilstoft Nielsen og Michael Wiedenkeller á 1 borði í dystinum millum Føroyar og Luksemburg í Budapest remis.
Tað ber í sær, at Høgni hevur rokkið sínum triðja og síðsta IM-normi. Hitt kravið – 2400 í rating – hevur hann langt síðan lokið.
Høgni er triði føroyski IM-arin. Hinir eru John Rødgaard og John Arni Nilssen.
Helgi Dam Ziska vann IM-heitið áðrenn hann gjørdist stórmeistari.
Sjálvur dysturin millum Føroyar og Luksemburg í níggjunda umfari á talvolympiaduni í Budapest er ikki liðugur enn. Telvararnir á 1 borði vóru teir fyrstu, sum gjørdu seg lidnar. Talvið vardi góðan hálvan triðja tíma.
2 – 2 móti Sveis
Hesir telvaðu móti Sveis í dag.F.v. Helgi Dam Ziska, Høgni Egilstoft Nielsen, Rógvi Egilstoft og Luitjen Akselsson Apol. John Rødgaard sæst standandi.
Vunnu á Suðurkorea
Hesir telvaðu í dag móti Suðurkorea. F.v. Luitjen Akselsson Apol, John Rødgaard, Høgni Egilstoft Nielsen og Helgi Dam Ziska.
Føroyska talvlandsliðið vann í kvøld 2½ – 1½ á Suðurkorea á talvolympiaduni í Ungarn. Roknað var við einum jøvnum og spennandi dysti, og so var.
Høgni Egilstoft Nielsen og Luitjen Akselsson Apol vunnu við hvíta fólkinum, og John Rødgaard telvaði javnt á triðja borði. Stórmeistarin Helgi Dam Ziska tapti við svarta fólkinum á 1 borði.
Føroyar standa í løtuni nummar 67 í røðini av teimum 188 londunum í kappingini.
John Rødgaard hevur í kvøld sent hesa frásøgnina frá dystinum:
Sterkasti suðurkoreanin spældi bæði væl og uppfinningarsamt við hvíta fólkinum í kongaindiskum. Men tá Helgi aftur hevði fingið tamarhald á støðuni, offraði mótstøðumaðurin mann fyri tríggjar finnur. Støðan er ring at meta um, men líkt er til, at javnvágin er í lagi kortini. Helgi offraði býtismun afturímóti, men tað var eitt mistak. Nú stóð mótstøðumaðurin væl, men loraði tó so mikið, at støðan var jøvn at kalla. Teir endaðu í einum fløkjtum rókaendatalvi, sum var ringt at spæla. Tekniskt var tað helst remis, men Helgi fann ikki røttu leikirnar, tá á stóð.
Mótstøðumaður Høgna telvaði ótradisjónelt. Høgni fekk ræðið á góðum puntum og hartil bispaparið. Tá ið hann setti trýst á miðjuna, gjørdi suðurkoreanin eitt grovt mistak. Høgni fekk nú avgerandi álop kongsmegin. So kom eitt rókaoffur og máthóttan, sum eingin verja var ímóti. Flott!
Eg spældi við svarta fólkinum eina uppsetan, sum eg leingi hava ætlað mær at royna. Men eg fór skeivur. Í staðin fyri góða støðu í endatalvi, sum eg hevði fyrigyklað mær, fekk mótstøðumaðurin góðan byr. Eg mundi mist alt á gólvið í tíðneyðini, men brádliga var mótstøðumaðurin óansin, og so fekk eg skákað hann uppísaman, og so var javnt.
Luitjen stóð væl eftir byrjanarspælið. Við eitt helt eg, at hann hevði mistikið seg, men tá átti hann ein rimmarleik, sum bjargaði øllum. Nú helmaði hann ikki, fyrr enn hann setti mótstøðumannin skák og mát eftir eitt rókaoffur.
Suður Korea (96) – Føroyar (66) 1½ – 2½
IM Junheyok Lee (2364) – GM Helgi Dam Ziska (2553) 1 – 0
IM Hongjin Ahn (2251) – Høgni Egilstoft Nielsen (2379) 0 – 1
Hungi Yun (2124) – IM John Rødgaard (2273) ½ – ½
Kyungseok Lee (2044) – Luitjen Akselsson Apol (2219) 0 – 1
Tveir fram, tríggir aftur
Nú eftir sjey umfør eru tveir føroyskir telvarar, ið ganga fram í rating. Hinir tríggir ganga aftur.
Størsta hálið higartil ger føroyameistarin Luitjen Akselsson Apol. Hann gongur góð 21 stig stig fram sum er. Høgni Egilstoft Nielsen stendur eisini til framgongd. Helgi Dam Ziska stendur til størstu afturgongdina, 11,8.
Úrtøkan hjá føroysku telvarunum eftir sjey umfør er henda:
Helgi Dam Ziska 2½/6 (- 11,8)
Høgni Egilstoft Nielsen 4/7 (+ 6,8)
Rógvi Egilstoft 2½/6 (- 2,2)
John Rødgaard 2/4 (- 11)
Luitjen Akselsson Apol 3/5 (+ 21,6)
Sveis í morgin
Í áttanda umfari í morgin møta vit Sveis. Teir eru styrkismettir nummar 38 og hava 2524 í miðalstyrkitali.
Føroyar hava ikki møtt Sveis nakrantíð í talv-OL, men í EM møttust londini í Reykjavík í 2016. Tá var úrslitið 3-1 til Sveis. Helgi Dam Ziska og John Rødgaard telvaðu javnt.
Føroyska liðið í morgin verður hetta: Helgi Dam Ziska, Høgni Egilstoft Nielsen, Rógvi Egilstoft og Luitjen Akselsson Apol.
India á odda
India vann í dag toppdystin móti Kina 2½ – 1½. India er einasta land, sum hevur vunnið allar dystir higartil. Kanska verður hetta olympiadan, har India vinnur á fyrsta sinni. Liðleiðari hjá India er Srinath Narayanan, sum fleiri ferðir hevur verið í Føroyum og telvað. Hann hevur enntá telvað við Kollafjarðar Talvfelag í føroysku landskappingini.
Oddastøðan eftir sjey umfør er henda:
India 14 stig
Iran 13
Usbekistan 12
Ungarn 12
Armenia 12
Serbia 12
USA 11
Kina 11
Vietnam 11
Georgia 11
Norra 11
Frakland 11
Rumenia 11
John hin drúgvi
John Rødgaard – vinstrumegin á myndini. Telvar sítt nítjanda OL í hesum døgum. Og tað er næstan met.
Veteranurin á føroyska talvlandsliðnum, John Rødgaard, er ikki sum aðrir telvarar.
Hann mettast ikki av talvolympiadunum. Hann hevur verið fastur fúsur á føroyska talvlandsliðnum í fjøruti ár. 45. talvolympiadan, sum í hesum døgum fer fram í ungarska høvuðsstaðnum Budapest, er hansara nítjanda í røðini.
Torført er at leita fram eftirfarandi hagtøl yvir telvarar á talvolympiadunum heilt frá byrjan í 1927 til í dag. Men til annað er prógvað, er okkara besta boð, at metið eigur stórmeistarin Eugenio Torre av Filipsoyggjum. Hann hevur 23 ferðir umboðað Filipsoyggjar á talvolympiadum. Aloftast á 1 borði. Fyrstu ferð í 1962, seinast í 2006. Hann er eisini við í ár, ikki sum telvari, men liðleiðari hjá Filipsoyggjum.
Og so er spurningurin, um John Rødgaard er næstur á hesum lista. Vit fáa tað til, at finski stórmeistarin Heikki Westerinen hevur 18 ferðir telvað olympiadu. Hjá honum eru fleiri ikki væntandi. Og so var ein annar, ið rann okkum til hugs; Bill Hook, sáli, sum seytjan ferðir umboðaði Bretsku Moyaoyggjarnar.
John – stóri kveikjarin
John Rødgaard hevur havt ovurstóran týdning fyri føroyska telving. Tá ið hann í 1976 kom til Føroyar sum 21 ára gamal var hann longu heilt sterkur telvari. Upprunaliga kom hann ikki higar fyri at telva, men at spæla fótbólt. Hann hevði spælt við barndómsfelagnum Esbjerg ØB í Jyllandsseriuni, ið svarar til 5 deild í Danmark. Og av berari tilvild fekk hann tilboð um at fara til Føroyar at spæla við TB.
Tað gekk upp á stás, tí TB vann føroyameistaraheitið bæði í 1976 og aftur í 1977 við John sum týðandi spælara – og eisini venjara. Føroyingar vistu ikki, at danski TB-arin var nógv fremri sum telvari enn fótbóltsspælari. Í 1978 fór hann aftur til Danmarkar, men hjartað lá eftir í Føroyum, og í 1984 var hann aftur í Føroyum og í TB.
Men nú kallaði telvingin á hann. Talvsamband Føroya vildi vita, um hann var fúsur at koma á føroyska landsliðið, sum skuldi fara til Grikkalands á talv-OL. John játtaði.
Og hvat var hetta so fyri telvari, sum Føroyar nú høvdu ognað sær. Nøkur av brøgdum hansara tá:
1973: danskur unglingameistari
1973: við í landsliðsbólkinum í árligu DM-kappingini
1975: DM-vinnari í snartalvi
1979: DM-vinnari í landskappingini fyri lið við Nordre
1979: við í landsliðsbólkinum í árligu DM-kappingini
1980: við í landsliðsbólkinum í árligu DM-kappingini
1980: DM-vinnari í landskappingini fyri lið við Nordre
1981: DM-vinnari í snartalvi
1981: DM-vinnari í landskappingini fyri lið við Nordre(14½ stig í 19 dystum á 2 borði).
Elddópur við lít
John Rødgaard gjørdi bart í sínum allarfyrsta dysti á føroyska landsliðnum. Føroyar telvaðu móti Fraklandi, sum hevði fyrrverandi heimsmeistaran Boris Spasski á fyrsta borði. Og talvið teirra millum endaði javnt.
Hetta var annar fyrrverandi heimsmeistarin, sum John Rødgaard telvaði javnt ímóti. Í Evropa Cup dysti fyri Nordre í 1980 telvaði John remis móti hollendinginum Max Euwe, sum var heimsmeistari eitt skifti í 30-árunum.
John krýndi sítt frálíka avrik á olympiaduni í Saloniki í 1984 við fyrsta IM-norminum.
Síðani hevur John verið fastur fúsur á føroyska talvlandsliðnum. Tey fyrstu nógvu árini var hann okkara suvereni oddamaður, men nettupp hjávera Rødgaards í føroyskari telving hevur ivaleyst verið ein kveikjan fyri aðrar yngri føroyingar, ið nú fóru at seta sær størri mál í talvi. Tað endaði so við, at við fingu góðar telvarar undan, ið seinni hava yvirhálað lærumeistaran. Tað er lívsins gongd.
Øll árini, ið John búði í Føroyum, telvaði hann dúgliga í føroysku landskappingini fyri lið, og seinni var hann eisini við í FM-kappingini fyri einstaklingar.
Met, ið seint verða tikin
Sum sagt er hetta nítjanda talvolympiadan hjá John Rødgaard. Komandi ár fyllir hann 70, men hann er framvegis íðin telvari, so hvør veit, um hann ikki eisini fær sítt tjúgunda OL um tvey ár. Um ikki yngri føroyskir telvarar tá hava skúgvað av trónuni veteranin, sum nú aftur hevur búsett seg í heimbýnum Esbjerg. Og í býarins felagi telvar hann á 1 borði í liðkappingini.
John hevur nógvar landsdystir á baki fyri Føroyar. Hann hevur umframt OL eisini telvað EM, 8-landakappingar, so eru tað kappingarnar fyri smátjóðir í Evropa og dystir móti Íslandi.
Landsdystarhagtøl John Rødgaards áðrenn OL í Ungarn vóru hesi:
305 landsdystir
Vunnið 105 talv
Remis 135 talv
Tapt 65 talv
Seinastu dystirnir
John hevur undir hesari OL-kappingini verið so beinasamur at senda okkum frásøgn frá dystunum. Um seinastu tveir dystirnar sigur hann soleiðis:
Føroyar – Irak 4 – 0
Móti Irak høvdu vit ein góðan dag. Helgi tók tann frídagin, sum hann fær í kappingini, so Høgni flutti fram á 1 borð.
Hansara talv er vælegnað sum læribókatilfar. Fá fólkið í spæl, finn tær tíni álopsmið, stilla siktið, loyp á, halt trýstið, slaka ikki ov tíðliga, fá fongin til høldar og gagnnýt tína yvirvág.
Rógvi var í ferð við at spæla mótstøðumannin niður posisjónelt, helt so í ósketni av kósini, mótparturin kundi nú fingið høvdið fyri seg, men drálaði, og so legði Rógvi aftur í vaðið. Frúgvaendtalv eru ikki tey lættastu at vinna, so tað tók sína tíð.
Sjálvur hevði eg svarta fólkið í einum sisilianara. Eg kom væl frá byrjan, og vann stríðið um opnu f-linjuna. Eftir tað var lætt at vinna.
Hjá Luitjeni breyt í bæði borð. Báðir vóru óneyvir og skiftust tí um fyrimunin, men eftir 34 leik hjá irakska telvaranum, sum var eitt mistak, var Luitjen eirindarleysur.
Føroyar – Slovenia ½ – 3½
Aftur ein serligur dagur.
Slovenia, við tveimum russiskum avhopparum á odda, var sjálvandi stórfavorittur.
Telvarin á 1 borði, Fedoseev, hevði 2733 sum ratinghámark. Talvið móti Helga bylgdist báðar vegir. Stundum var hesin við yvirlutan, so hin. Helgi freistaðist av opnu kongsstøðuni hjá mótpartinum, men tá ið honum ikki eydnaðist til fulnar at sleppa fram at konginum, sást, at honum tørvaði fólk í verjustøðu. Og brátt var tap í hendi.
Rógvi lorkaði longu í byrjanini. Eftir fjúrtan leikir var støðan so vánalig, at hann tað sama kundi lagt kongin, tó at hann treiskaði væl og leingi.
Sjálvur helt eg meg hava funnið upp á okkurt heilt snilt í byrjanini. Men viðhvørt hendir seg nú á døgum, at eg rokni ikki nóg væl tey ymsu frábrigdini, sum skulu terpast í høvdinum. Eg noyddist at tríva í ein plan B, men tá var tí verri longu rot komið í støðuna.
Tað var ikki stórvegis á vási hjá Høgna. Í 55. leiki misti hann í ósketni eina finnu. Tað gjørdist eitt endatalv við rók og riddara í part, og tvær finnur móti einari. Hartil var Høgni í herviligum tíðartroti. Soleiðis mólu teir í klingur í 55 leikir. Einastandandi at Høgni støðugt fann røttu leikirnar undir slíkum umstøðum. So býttu teir rók og finnu upp. Í prinsippinum er tað einfalt, men ikki, tá tú sjálvur situr við borðið. Ein stórmeistari við 2600 í rating kann eisini fara skeivur, hóast bara seks fólk eru eftir á borðinum at flyta við. Hann varnaðist ikki lagaligu løtuna, og eftir tað helt Høgni rimmarfast um javnleikin.
Talvið vardi einar sjey tímar, og tá ið vit skuldu til hús, var síðsti bussurin farin. Vit fingu fatur á bili at koyra okkum, men komnir á gistingarhúsið, var matsovan stongd. Sein kúgv…
Ná, hinir fýra fóru á Bermuda Party (veitslan fyri telvarunum). Høgni mundi mestur vera nakað moyrur. Hetta er annars fyrsta ferðin á øllum mínum olympiadum, at eg eri ikki við.
Høgni remis í maratontalvi
Høgni Egilstoft Nielsen stríddist tolin í heilar átta tímar í dag, áðrenn javnleikurin var tryggjaður.
Føroyar fingu harða mótstøðu á talvolympiaduni í Ungarn í dag. Vit telvaðu móti Slovenia, sum á sínum fremru borðum hevur tveir sterkar russiskar stórmeistarar, ið eru flýddir undan Putin.
Men í veruleikanum var tað har – á fremru borðunum – at dysturin stóð í dag. Á aftaru borðunum formáddu vit okkum minni. Rógvi og John komu báðir í ókyrran sjógv, og tíðliga sást, at tap var í hendi hjá teimum.
Helgi hevði aftur eitt gott talv á 1 borði. Í avgerandi stundini, tá ið tíðin var knøpp hjá báðum, og støðan ógvuliga spent og dynamisk, kundi Helgi vunnið sær fyrimunin og spælt fyri sigrinum, men hann himpraðist, tá ið á stóð, og tað bøtti hann fyri stutt eftir.
Høgni stríddist meginpartin av talvinum í dag við rygginum móti múrinum – aftur við svarta fólkinum (fyri fimtu ferð í seks dystum). At skula verja seg við heldur lakari støðu móti so sterkum telvara, krevur sín mann. Tú verður trýstur í botn á øllum parametrum. Talvið vardi heilar 146 leikir (tá hava báðir flutt 146 ferðir). Og tá høvdu teir sitið ikki færri enn átta tímar. Russiski stórmeistarin góðtók ikki remis fyrr enn bara kongarnir stóðu eftir á borðinum. Tá var eingin annar telvari eftir í øllum salinum. Ein frálíkt avrik hjá Høgna. Likamliga orkan, ið hann hevur sum royndur ítróttarmaður, mundi koma honum væl við í dag.
Føroyar (66) – Slovenia (26) ½ – 3½
GM Helgi Dam Ziska (2553) – GM Vladimir Fedoseev (2692) 0 – 1
Høgni Egilstoft Nielsen (2379) – GM Anton Demchenko (2597) ½ – ½
Rógvi Egilstoft (2278) – GM Matej Sebenik (2515) 0 – 1
IM John Rødgaard (2273) – Matic Lavrencic (2360) 0 – 1
Føroyar eru nú nummar 78 í røðini av teimum 187 londunum í kappingini.
India hevur nú sum einasta land fult stigatal. Favorittarnir USA tykjast heldur ikki at vera nóg skarpir hesaferð. Í gjár taptu fyri fyri Ukraina og í dag fingu teir einans javnleik móti Rumenia, sum Føroyar fingu tvey remis ímóti.
Í morgin er frídagur í Budapest – einasti hvílidagurin í kappingini. Mikudagin setast teir aftur við borðini í stóru leikhøllini, og so verður telvað dag um dag til liðugt er sunnudagin.
Í sjeynda umfari mikudagin telva Føroyar móti Suðurkorea. Tað verður fyrsti talvlandsdysturin landanna millum. Roknast kann við einum jøvnum dysti.
Vunnu 4-0 á Irak
Tað gekk upp á stás hjá førosku telvarunum í dag. 4 – 0 móti Irak – uttan stórmeistaran á liðnum. F.v. Rógvi Egilstoft, Luitjen Akselsson Apol, Høgni Egilstoft og John Rødgaard.
Føroyar vundu úr Irak í fimta umfari á talvolympiaduni í Budapest í dag.
Minniligi 4-0 sigurin á irakum í seinasta umfari á talvolympiaduni í Moskva fyri tretivu árum síðani, sum gav okkum besta endaúrslitið nakrantíð, varð endurtikin í dag.
At Føroyar – uttan stórmeistaran Helga Dam Ziska á liðnum – vinna heili 4-0 á liði, sum hevur yvir 2160 í miðalstyrkitali, mundi fáur væntað.
Men tað hefti ikki fyri á nøkrum borði; Høgni, Rógvi, John og Luitjen telvaðu allir væl og vunnu sannførandi.
Helgi hevði fingið sær frí í dag, so Høgni flutti fram á 1 borð. Tað bar í sær, at hann mátti telva við svarta fólkinum fyri fjórðu ferð í fimm dystum. Tað bleiv Fýra Riddaraspæl við Glek-frábrigdinum, men Høgni vísti munandi meira flair og fatan fyri støðuni, og varð skjótt omaná.
John telvaði sisilianskt við svørtum, hvítur valdi afturlatna frábrigdið. Hvítur royndi seg við álopi kongsmegin, men John dugir at verja seg, so hin fekk ikki glið á atsóknina. John telvaði seg upp frúgvarmegin og var brátt við yvirlutan.
Luitjen hevði eitt umleypandi talv á fjórða borði. Hann stóð væl, men var óneyvur, tað gagnnýtti hin við góðum leikum, og fekk fyrimunin í opnu og taktiskt løddu støðuni, men Luitjen kom hegnisliga afturíaftur, og snýtti mótstøðumannin við góðum spæli seinasta triðingin av talvinum.
Rógvi sat aftur í dag eftir sum tann síðsti av føroysku telvarunum, men honum eydnaðist at vinna endatalvið við frúgv móti frúgv og finnuyvirvág móti manni við sama navni sum víðgitin egyptiskur fótbóltsspælari.
4-0 til Føroyar móti Irak – frálíkt úrslit og tillukku.
Irak (105) – Føroyar (66) 0 – 4
IM Ali Hussein (2122) – Høgni Egilstoft Nielsen (2379) 0 – 1
Mohammed Salah (2180) – Rógvi Egilstoft (2278) 0 – 1
Ali Akar Salih (2174) – IM John Rødgaard (2273) 0 – 1
Ahmed Alothman (2161) – Luitjen Akselsson Apol (2219) 0 – 1
Slovenia verður stórur biti
Eftir fimta umfar eru Føroyar nummar 60 í røðini av teimum 187 londunum í kappingini. Og í sætta umfari í morgin mánadagin møta vit Slovenia. Hetta verður fyrsti dysturin í talvi landanna millum.
Slovenia er styrkismett nummar 26 og hevur miðalstyrkitalið 2576. Tveir heilt sterkir russiskir stórmeistarar, Vladimir Fedoseev og Anton Demchenko, manna fremstu borðini. Teir eru tveir av fleiri sterkum telvarum í Russlandi, sum eru flýddir vesturum sum mótmæli móti krígnum í Ukraina, og hava sett seg niður í øðrum londum, sum teir nú telva fyri. Vladimir Fedoseev hevur um 2700 í rating og er í topp 40 í heiminum.
Fýra lond eru fremst við fullum stigatali. India, Kina, Ungarn og Vietnam. Norra er nummar fimm. Norðmenn vunnu í dag 3-1 á Turkalandi, men Magnus Carlsen mátti á fyrsta borði sættast við javnleik móti Mustafa Yilmaz, sum Helgi Dam Ziska vann á, tá Føroyar telvaðu móti Turkalandi í øðrum umfari.
Føroyska liðið móti Slovenia verður hetta: 1. Helgi Dam Ziska 2. Høgni Egilstoft Nielsen 3. Rógvi Egilstoft 4. John Rødgaard.
Tvey remis móti Rumenia
Rumenska landsliðið er krútsterkt, so tveir javnleikir – báðir við hvíta fólkinum – er góðkent avrik. Helgi Dam Ziska og Rógvi Egilstoft telvaðu javnt, Høgni Egilstoft Nielsen og Luitjen Akselsson Apol taptu.
Knógvaðu Palestina
Føroyar vunnu tepran sigur á Palestina í triðja umfari á talvolympiaduni í Budapest í dag. Les meira »