Talvsamband Føroya Faroechess

Ivan Sokolov er nú byrjaður sum venjari hjá føroyska talvlandsliðnum. 1. desember hevði hann fyrstu venjingina við føroysku telvarunum. Fýra venjingar eru nú í desember. Vant verður aftur 9. desember, 15. desember og 22. desember. Hesar venjingar fara fram umvegis netið. Føroysku telvararnir sita heima við hús, og venjarin situr í Hollandi. Allir eru so knýttir saman umvegis Teams. Føroysku telvararnir lótu væl at fyrsta venjingarkvøldinum. Sama gjørdi venjarin. Eftir jól verður tikið samanum, og eru partarnir samdir um, at haldast skal fram við samstarvinum, verður nýggj venjingarætlan løgd fyri komandi ár. Tá kann roknast við, at Ivan Sokolov kemur til Føroyar at venja landsliðið.

Tað er at frøast um, at so nógvar barnakappingar eru á skránni í kappingarárinum 2022-2023. Tess verri verða vit noydd til at avlýsa kappingina komandi vikuskifti, 04.12.2022, av tí at tað hevur verið torðført at funnið ein vert. Men finalan í barnatalvkapping fyri lið skal nokk finna tíð og stað í komandi ári. Allar kappingarnar í 2023 eru skipaðar í samstarvi við talvfeløgini, so verður tað stuttligt at uppliva nógvar og fjølbroyttar kappingar kring landið. Meira kunning um hettar verður lýst seinni.

Finalan í NM úttøkukappingini verður telvað í kantinuni á Fiskavirkinum í Gøtu 10. desember kl. 10:00. Telvað verða 7 umfør í 5 ymiskum aldursbólkum. Undan hesari kapping hava 2 undankappingar verið, har ið upp til 8 finalistar í hvørjum aldursbólki eru funnir. Tey hava kvalifiserað seg til at telva um 2 pláss í hvørjum bólki, at sleppa at umboða Føroyar til Norðurlandameistaraskapið fyri ung í Norra, 2023.

Eftir dystirnar í fjórða umfari í landskappingini í talvi um viksuskiftið fekst sjón fyri søgn um, at einki av hinum liðunum stendur Sandavági og Havnini kurl í fremstu deildini.   Tey bæði liðini vinna stórsigrar á hinum kappingarneytunum, og nú verður bíðað eftir fyrra innanhýsis toppdystinum í fimta umfari. Men hann verður ikki fyrr enn eftir nýggjár.   

40 børn og ung luttóku í aðru undankapping til NM úttøku í Klaksvík í vikuskiftinum. Kappast var í 4 aldursbólkum, U10, U12, U14 og U16. 8 tey bestu í hvørjum bólki sleppa víðari í eina finalu, sum verður 10. desember í Gøtu. Í finaluni koma tey at kappast um NM luttøku; tí 2 tey bestu úr hvørjum aldursbólki sleppa at umboða Føroyar til Norðurlandameistaraskapið í Norra í februar / mars.

Ein spennandi talvkapping verður sunnudagin, 11. desember í skótahúsinum í Klaksvík. Hettar er fyrsta FM kapping fyri gentur í nýggjari tíð. Kappingin er býtt upp í 5 aldursbólkar, og umframt føroyameistaraheitið verður eisini kappast um at umboða Føroyar til Norðurlandameistaraskapið fyri gentur í 2023. Vinnararnir í hvørjum aldursbólki verða hepnu umboðini.

NM úttøkukapping verður aftur komandi leygardag, 26. november í Klaksvík. Kappingin verður í Skúlatrøð og byrjar kl. 10:00. Hettar er onnur út av tveimum undankappingum, har ið børn og ung kappast um pláss í eini finalu, sum verður 10. desember í Gøtu. Har verður telvað um 2 ovastu plássini í 5 ymiskum aldursbólkum, sum sleppa at umboða Føroyar til Norðurlandameistaraskapið í Norra í 2023.

35 børn luttóku í vikuskiftinum í fyrru úttøkukappingini til NM 2023. Tey telvaðu í 5 ymiskum aldursbólkum: U20, U16, U14, U12 og U10. Tey kappaðust um at vera í topp 8 í hvørjum bólki, sum sleppa í eini finalu at telva um at umboða Føroyar til Norðurlandameistaraskapið fyri børn og ung. 2 í hvørjum aldursbólki sleppa avstað, og í 2023 verður kappingin í Norra.

Hvørt ár sendir Talvsamband Føroya 10 børn og ung til Norðurlendska Meistaraskapið í talvi. Í 2023 verður NM kappingin í Norra, og plagar hon at vera í februar – mars mánaði. 2 føroyingar sleppa við í hvørjum bólki.