Talvsamband Føroya Faroechess

10. mars og 17. mars vóru 2 Barna Grand Prix kappingar, BGP8 og 9, ávikavíst í Vestmanna og Havn. Hettar vóru trið- og næstseinastu barnatalvkappingarnar í ár. Tann seinasta Barna Grand Prix kappingin og finalan verður komandi sunnudag í skótahúsunum í Klaksvík. Sí innbjóðing her.

Fyri fyrstu ferð síðani 2013 eitur føroyameistarin í talvi annað enn Høgni, Rógvi ella Helgi.  Nú eitur føroyameistarin - júst sum miðskeiðis í 70-unum - Luitjen Apol. Men nú er tað ein annar Luitjen. 18 ára gamli abbasonur gamla føroyameistaran - sonur Katrina og Aksel V. Johannesen - ber nú arvin víðari.

Teir eru komnir hálvan veg í FM-umdystinum í kviktalvi á Giljanesi. Allir tríggir hava nú telvað eina ferð hvør móti øðrum. Nú taka teir eitt tørn aftrat við øvugtum litum.

Tríggir endaðu javnir í Landsliðsbólkinum, tá árliga FM-kappingin í talvi var liðug í gjár. Neyðugt verður tí við umdysti í dag millum teir tríggjar. Tað áseta reglurnar. Tað er bara komið fyri tvær ferðir, at tríggir eru endaðir í einum FM-umdysti í talvi. Telvað verður í skúlanum á Giljanesi, og byrjað verður klokkan 14.00.

Tað var stórt drama á síðsta leikdegi í FM-kappingini í talvi í dag. Endin var, at tríggir gjørdust javnir í oddanum í Landsliðsbólkinum, og teir fara í morgin at telva umdyst um FM-heitið. Tað vera brøðurnir Rógvi og Høgni Egilstoft Nielsen og Luitjen Akselsson Apol, sum fara undir avgerandi FM-tríumdyst í morgin leygardagin.

Í hesum døgum verður kappast um árliga føroyameistaraheitið í talvi. FM-einstaklingakappingin hevur verið á hvørjum ári síðani 1972 kring páskirnar, men søgan er longri enn so.

Høgni Egilstoft Nielsen vann í dag avgerandi talvið móti bróðrinum Rógva Egilstoft í sætta og næstsíðsta umfari í FM-einstaklingakappingini í talvi á Giljanesi.

Oddamenninir í FM-kappingini í talvi bresta saman í dag í sætta og næstsíðsta umfari í føroyameistarakappingini fyri einstaklingar. Tað stendur á jøvnum millum brøðurnar báðar. Teir hava 4½ stig eftir fimm umfør. Alt bendir á, at annar teirra verður føroyameistari í ár.

    Talvsamband Føroya, saman við eldhugaðum foreldrum, skipar í døgunum 6. til 7. apríl fyri venjingartalvlegu fyri børn og ung í Skótahúsunum í Klaksvík. Á skránni er venjing, hugni og felagsskapur; matur, spæl og yvirnátting. Vant verður í 2 styrkisbólkum. Venjarar á hesi legu eru Rani Nolsøe og GM Helgi Dam Ziska.