Talvsamband Føroya Faroechess

Stórtalentið, 23 ára gamli Olaf Berg, úr Tórshavn, vísti av álvara FM-format í endaspurtinum og varð – tá samanumkom – greiður vinnari, tá seinastu leikirnir vóru fluttir í FM í talvi fyri einstaklingar á Giljanesi leygardag seinnapart.

Terji Petersen má ivaleyst ásanna, at FM-heitið smýgur sær millum fingrarnar, eftir enn eitt tap í næstseinasta umfarinum í FM í talvi á Giljanesi.

Samstundis hevur Olaf Berg beina kós ímóti fyrsta FM-gullinum nakrantíð.

Her kom av álvara vend í.

Kravið var ein sigur til Olaf Berg í toppdystinum ímóti Terja Petersen, Skírisdag, í 7. umfari í FM í talvi fyri einstaklingar, sum verður telvað á Giljanesi. Onki annað kundi nýtast í oddastríðnum um FM-heitið. Og tað eydnaðist. Eftir 12 leikir valdi Olaf at lata frúnna fyri riddara og rók. Sálarliga vísti tað seg vera rætta valið, men ivaleyst verður kannað dúliga, um hetta yvirhøvur kann vera rætt telvað. Terji misti líkasum stevið eftir átakið frá Olafi, men tá samanumkom restaði í veruleikanum ikki nógv í, at í minsta lagi javnleikur kom til høldar. Ein satt oddabrak !

Terji Petersen, úr Klaksvík, vardi leiðsluna uppá 1½ stig í Landsliðsbólkinum í 6. umfari í FM í talvi fyri einstaklingar, sum verður telvað á Giljanesi. Eftir sera drúgvt talv ímóti Torkil Nielsen seinnapartin, eydnaðist, við tógvið stríð, at hála sigurin heim. Ein sannur arbeiðssigur á fyrrverandi FM-vinnaranum úr Sandavági og enn eitt týðandi fet ímóti at enda ovastur, tá seinasti leikur er fluttur leygardagin.

Nú 5 umfør eru telvað í FM í talvi fyri eintaklingar 2010, sum í hesum døgum verður telvað á Giljanesi, hevur Terji Petersen, úr Klaksvík, lagt seg á odda við heili 1½ stigi í landsliðsbólkinum. Hóast styrkimettur sum nr. 6 í kappingini, hilnast sera væl higartil við 4 sigrum og einum javnleiki. Harvið verður hildið fast um sera góða gongd í inniverandi kappingarári, har talan gjørdist um 8 sigrar av 9 møguligum í júst endaðu liðkappingini fyri FM-vinnararnar úr Klaksvíkini. 

  FM í talvi 2010 fyri einstaklingar, sum verður telvað á Giljanesi frá leygardegnum 27. mars – 3. apríl, verður nakað heilt serligt. Ikki er tað hent áður, at heili tríggir tannáringar fáa møguleikan, at bjóða seg fram í Landsliðsbólkinum – bólkinum, har tað eftir 9 umfør verður staðfest, hvør er Føroya besti telvari. Skipanin er soleiðis, at 10 teir tilmeldaðu, við hægstu styrkitølunum kappast um heitið. Eitt hitt størsta talvtalentið vit hava átt nakrantíð, Olaf Berg, úr Tórshavn, sum í dag er 22 ára gamalur, má metast vera favorittur at vinna FM-heitið. Seinnu tíðina eru ábendingarnar sera sannførandi. Viljin og hugflogið er komið afturíaftur av álvara.   Yngsti luttakarin, 12 ára gamli, Høgni Egilstoft Nielsen, úr Sandavági, stendur av álvara mát við favorittin, við atliti at aldursmuninum.  Í fyrsta lagi er Høgni yngsti luttakarin í landsliðsbólkinum yvirhøvur. Í øðrum lagi er unglingin uml. 100-200 ratingstig hægri enn Olaf og Helgi D. Ziska vóru á sama aldri. Javnaldarnir, Rógvi E. Nielsen og Hjalti T. Jógvansson – 17 ára gamlir – eru …

1. umfar byrjar 27. mars kl. 18.00 vegna FM finalurnar í flogbólti, ið eisini verða á Giljanesi.

Tann føroyski ratinglistin fyri í ár er nú endaligur dagførdur (tann fyrri ið lá her í gjár var ikki fullfíggjaður), sí meira niðanfyri.
ELO ratinglistin er eisini dagførdir, eftir lokna liðkapping. Sí leinkjur á vinstra bredda.

Heini Olsen, Finnbjørn Vang, Eÿdun Nolsøe, Terji Petersen, Silas Esben Lund 

Lagt varð upp til heilt stóra FM-brakið, leygardag seinnapart, tá endaorrustan í liðkappingini varð telvað í Pálsstovu. Vit hava sæð tað so oftani áður. Hart spentir kenslubogar - togan, umdystir. Feløg sum hava ligið væl fyri undan finaluna, hava mist alt á stokkinum. Tí onki er avgjørt fyrr enn tikið verður í hondina á mótstøðumanninum eftir lokið talv. 

Í 2010 kom vend í !

Sandavágs Talvfelag hevur stinnastu unglingarnar í talvi 2010. Hetta var staðfest fríggjakvøldið, tá endaumfarið í liðkappingini hjá unglingum varð telvað í hølum Havnar Telvingarfelags.

FM-heitið kom til høldar við sannførandi sigri uppá 3½-½ á unglingum úr Klaksvíkar Talvfelag, sum hava verið Føroyameistarar undanfarnu 3 árini.