1992-93<\/p>\n\n\n\n
Tj\u00fagu \u00e1r eftir FM-sigurin \u00ed 1973 var Kollafjar\u00f0ar Talvfelag aftur \u00e1 tindinum.<\/p>\n\n\n\n
Ta\u00f0 gj\u00f8rdist ein j\u00f8vn og spennandi kapping millum Kollafj\u00f8r\u00f0, Havnina og Klaksv\u00edk. Bara h\u00e1lvtanna\u00f0 stig skilti tey tr\u00fd li\u00f0ini fyri seinasta umfar.<\/p>\n\n\n\n
F\u00f8royameistarnir dumpa\u00f0u. H\u00f8gt at sveima, dj\u00fapt at falla. John R\u00f8dgaard var ovurst\u00f3rur missur. Hann var farin \u00ed starv sum talvl\u00e6rari \u00ed Danmark \u00e1 Tjele Eftirsk\u00fala, og f\u00fdra \u00e1r gingu til hann flutti aftur til F\u00f8royar. Vestmenningar enda\u00f0u aftast, og fluttu t\u00ed sum meistarali\u00f0 \u00far deildini.<\/p>\n\n\n\n
Streymur str\u00edddist eisini vi\u00f0 fr\u00e1flyting. Finnbj\u00f8rn Zachariassen var \u00ed lestri uttanlands, og Hanus Brekk\u00e1 var fluttur til Danmarkar longu \u00ed 1987. <\/p>\n\n\n\n
Havnar Telvingarfelag misti eisini g\u00f3\u00f0an ungd\u00f3m. J\u00f3an Hendrik Andreasen, sum hev\u00f0i veri\u00f0 ein av toppskj\u00fattunum s\u00ed\u00f0an hann kom \u00e1 1. li\u00f0 longu bla\u00f0ungur, flutti ni\u00f0ur at lesa eftir \u00f3lavs\u00f8ku 1992. Sama veg f\u00f3r 18 \u00e1ra gamli skopuningurin John Arni Nilssen, sum hev\u00f0i veri\u00f0 \u00e1 1. li\u00f0i hj\u00e1 Havnini \u00e1ri\u00f0 fyri. Hetta var r\u00edmiligt st\u00f3rur smeitur. Men felagi\u00f0 hev\u00f0i g\u00f3\u00f0ar, ungar telvarar \u00e1 br\u00e1\u00f0pannuni. Ein var 19 \u00e1ra gamli R\u00f3gvi W. Rasmussen, sum fekk eina fl\u00fagvandi byrjan \u00e1 1. li\u00f0i vi\u00f0 h\u00e1lvum sjeynda stigi \u00ed sjey dystum. Hetta bo\u00f0a\u00f0i fr\u00e1 g\u00f3\u00f0um. Javnaldurin Herluf Hansen fekk eisini s\u00edn d\u00f3p \u00e1 besta li\u00f0num. Annar, sum var\u00f0 gr\u00fdttur fyri leyvurnar, var hin einans fimtan \u00e1ra gamli Fl\u00f3vin T\u00f3r N\u00e6s. Hartil komu b\u00e6\u00f0i Luitjen Apol, S\u00fani Ziska og Andrias Ziska aftur\u00edaftur.<\/p>\n\n\n\n
Hj\u00e1 klaksv\u00edkingum l\u00e1 n\u00f3gv \u00e1 f\u00f8royameistaranum Heina Olsen. Br\u00f3\u00f0irin Wille taldist n\u00fa millum teir, sum v\u00f3ru farnir burtur at \u00fatb\u00fagva seg, so hj\u00e1 teimum r\u00e1ddi eisini um at f\u00e1a ungar telvarar undan. Ein, i\u00f0 fekk s\u00ednar fyrstu dystir \u00e1 besta li\u00f0num var hin bla\u00f0ungi \u00d3lavur Simonsen. \u00datisetarnir v\u00f3ru vi\u00f0, t\u00e1 i\u00f0 teir v\u00f3ru staddir \u00ed F\u00f8royum, og ta\u00f0 hendi vi\u00f0hv\u00f8rt.<\/p>\n\n\n\n
Men kollfir\u00f0ingar vunnu. Fasta manningin v\u00f3ru br\u00f8\u00f0urnir Torbj\u00f8rn og Bernhard Thomsen, Hans Jacob Petersen og Heri Verner Thomsen, sum hev\u00f0i veri\u00f0 unglingaf\u00f8royameistari t\u00f3lv \u00e1r framman undan. Bernhard, Hans Jacob og Heri h\u00f8vdu allir dygga \u00fart\u00f8ku, sum muna\u00f0i v\u00e6l.<\/p>\n\n\n\n
\u00cd seinasta umfari, sum var felagsumfar \u00ed \u00d3sask\u00falanum \u00ed Klaksv\u00edk, kom r\u00e6ttiligur spenningur \u00ed, t\u00ed kollfir\u00f0ingar m\u00e1ttu s\u00e6ttast vi\u00f0 tepran sigur \u00e1 grannunum \u00far Sundalagnum. Eina l\u00f8tu sp\u00f8kti ein 4-0 sigur til Havnina m\u00f3ti Klaksv\u00edk. Ta\u00f0 hev\u00f0i sl\u00f8kt FM-dreymin hj\u00e1 kollfir\u00f0ingum, men klaksv\u00edkingurin S\u00edmun Petur Anthoniussen kom sperdu kollfir\u00f0ingunum til hj\u00e1lpar vi\u00f0 at vinna \u00e1 S\u00fana Ziska. S\u00fana n\u00fdttist kortini ikki at kenna seg sum syndabukk, t\u00ed \u00e1 sama li\u00f0i mundu a\u00f0rir eisini i\u00f0ra seg um heldur laka \u00fart\u00f8ku hendan veturin.<\/p>\n\n\n\n
Ta\u00f0 seg\u00f0ist, at p\u00e1pi S\u00edmun Petur Anthoniussen var \u00f3gvuliga errin av soninum henda dagin, ikki t\u00ed at klaksv\u00edkingar endiliga gj\u00f8rdu hol \u00ed sj\u00f3gvin, men stigi\u00f0, i\u00f0 sonurin fekk, bar \u00ed s\u00e6r, at havnarmenn ikki vunnu – og ta\u00f0 var gott!<\/p>\n\n\n\n
Havnin vann \u00ed \u00f8llum hinum deildunum, men \u00ed 1. deild resta\u00f0i eitt stig \u00ed.<\/p>\n\n\n\n