Heim / Tíðindi / Seinastu Tíðindini / Móti Moldova

Móti Moldova

Føroyar telva móti Moldova í sætta umfari í EM í talvi á Kreta í dag. Moldova er styrkismett nummar 24 av teimum 40 liðunum í kappingini. Føroyar eru styrkismettar nummar 35. Moldova mannar seg við tveimum stórmeistarum og tveimum altjóða meistarum móti okkum í dag.

Á fyrsta borði skal Helgi Dam Ziska royna seg móti Viktor Bologan, sum hevur 70 ratingstig fleiri enn okkara stórmeistari. Moldova telvaði í fyrsta umfari 2-2 móti Onglandi, sum er styrkismett hægst av vestanlondum. Bologan vann á Nigel Short, sum í síni tíð telvaði HM-finalu móti Garri Kasparov. Høgni Egilstoft Nielsen, sum telvar fyri triðja IM-norminum, møtir stórmeistara, sum hevur 200 ratingstig fleiri enn hann. Sama ger seg galdandi á triðja borði, har ið Rógvi Egilstfot Nielsen kappast móti Hamitevici, sum var við í Runavík Open í fjør.

John Rødgård loysir av John Arna Nilssen á fjórða borði. John hevur ikki havt eydnuna við sær enn, men fyrr ella seinni man fara at bragda hjá royndasta føroyska telvaranum. Okkara menn hava hvítt á fyrsta og triðja borði, og svart á øðrum og fjórða.

Føroyar eru í løtuni nummar 34 av teimum 40 liðunum í kappingini. Frídagur var á Kreta í gjár, men nú verður telvað til mánadagin, tá ið kappingin endar. Fyrstu leikirnir í dag verða fluttir klokkan 13.00.

 

Faroe Islands Moldova
 GM Ziska, H. D. 2545
 GM Bologan, V. 2615
 FM Nielsen, H. 2352
 GM Svetushkin 2556
 FM Nielsen, R. 2338
 IM Hamitevici 2519
 IM Rodgaard, J. 2332
 IM Morozov, N. 2467

 

Føroyski stórmeistarin Helgi Dam Ziska er framvegis ósigraður í EM. Hann hevur trý stig eftir fimm dystir á fyrsta borði. Í dag fær hann aftur harða mótstøðu.

EM_2017_HDZ

Sí eisini

Avgerandi FM-talv í dag

Oddamenninir í FM-kappingini í talvi bresta saman í dag í sætta og næstsíðsta umfari í føroyameistarakappingini fyri einstaklingar. Tað stendur á jøvnum millum brøðurnar báðar. Teir hava 4½ stig eftir fimm umfør. Alt bendir á, at annar teirra verður føroyameistari í ár.