Heim / Tíðindi / Seinastu Tíðindini (síða 22)

Seinastu Tíðindini

Vónbrot í Chennai

9. august 2022

Føroyar og Uganda í seinasta umfari í dag. Fremst John Rødgaard, Rógvi Egilstoft, Høgni Egilstoft Nielsen og Helgi Dam Ziska.

Føroyar taptu 3-1 fyri Uganda í ellinta og seinasta umfari á talvolympiaduni í India í dag.

Føroysku telvararnir høvdu hægri styrkital á øllum fýra borðum móti Uganda, men ongum eydnaðist at vinna.

Helgi Dam Ziska og Høgni Egilstoft Nielsen telvaðu javnt á ovaru borðunum, men á niðaru borðunum taptu Rógvi Egilstoft og John Rødgaard.

Ósigurin ber í sær, at Føroyar enda nummar 108 av teimum 188 liðunum í almennu kappingini. Vit vóru styrkismettir nummar 60.

Føroyar vunnu fýra dystir, taptu fimm og spældu tveir javnar. Vit fingu tíggju dystarstig í alt.

Vit møttu bara trimum liðum, sum vóru styrkismett ovari enn vit. Fýra ferðir møttu vit liðum, styrkismett niðari enn vit, uttan at vinna.

Allir á føroyska liðnum ganga aftur í rating. Luitjen Akselsson Apol missir 110 stig, John Rødgaard 43, Høgni Egilstoft Nielsen 20, Rógvi Egilstoft 10 og Helgi Dam Ziska missir 6 ratingstig.

Einstøku úrslitini hjá føroysku telvarunum vóru hesi:

1. Helgi Dam Ziska 7/10

2. Høgni Egilstoft Nielsen 4½/10

3. Rógvi Egilstoft 5½/9

4. John Rødgaard 3½/9

5. Luitjen Akselsson Apol 1/6

Bo.

Faroe Islands (FAI)

Rtg

–

Uganda (UGA)

Rtg

1 : 3

41.1

Ziska, Helgi Dam

2549

–

Wanyama, Harold

2242

½ – ½

41.2

Nielsen, Hogni Egilstoft

2414

–

Kawuma, Patrick

2270

½ – ½

41.3

Egilstoft, Rogvi

2284

–

Okas, Walter

2191

0 – 1

41.4

Rodgaard, John

2324

–

Nsubuga, Haruna

2160

0 – 1

Usbekistan vann

Tað er einki minni enn ein sensasjón, at Usbekistan hevur vunnið talvolympiaduna.

Teir vóru styrkismettir nummar 14, men hava tikið øll á bóli. Teir eru ósigraðir í kappingini. Móti báðum indisku liðunum og USA var javnleikur 2-2, hinar dystirnar vunnu teir allar – m.a. 4-0 á Føroyum í øðrum umfari.

Venjari og úttøkumaður hjá usbekiska landsliðnum er Ivan Sokolov, sum fleiri ferðir var í Føroyum í 90-árunum.

Møguleikin fyri einum nýggjum OL-gullvinnara var til staðar, nú tveir av størstu favorittunum, Russland og Kina, ikki vóru við í India. Altjóða talvsambandið FIDE hevur boykottað Russland vegna kríggið í Ukraina, Kina, sum vann OL seinast, tykist hava givið avboð í samhuga við Russlandi.

Ein onnur sólskinsøga er framúrskarandi úrslitið hjá Moldova, sum endaði nummar seks. Teir vóru styrkismettir numar 48. Bara ein stórmeistari er á liðnum – Vladimir Hamitevici, sum hevur telvað á 1. borði hjá Klaksvíkar Talvfelag í føroysku landskappingini. Hann var sigursharri í flotta sigrinum á Onglandi í dag, tá hann feldi Luke McShane á 2. borði.

Vánaliga úrslitið hjá Norra man koma mongum dátt við. Teir vóru styrkismettir nummar trý, høvdu heimsmeistaran Magnus Carlsen á 1. borði, men endaðu nummar 59. Carlsen var ikki við í síðsta dystinum í dag.

Vinstrumegin: Ivan Sokolov, ið sæst standandi á gólvinum, leiddi Usbekistan til mest óvæntaða OL-sigurin í talvi nakrantíð. Sokolov virkaði eitt skifti í 90-unum sum venjari hjá Havnar Telvingarfelag.

Úrslit og endaliga støðan:

Usbekistan-Holland 2½-1½

India-USA 2-2

Armenia-Spania 2½-1½

India B.-Týskland 3-1

Ongland-Moldova 1½-2½

1. Usbekistan 19 (gull)

2. Armenia 19 (silvur)

3. India 2 18 (bronsa)

4. India A 17

5. USA 17

6. Moldova 17

37. Svøríki

40. Ísland

45. Danmark

59. Norra

61. Finnland

108. Føroyar

188 lið í alt.

Ukraina vann kappingina hjá kvinnunum.

Talvolympiada verður aftur um tvey ár. Ungarn skipar fyri, og Budapest verður vertsbýur í september 2024.

Uganda í morgin

9. august 2022

Føroyska talvlandsliðið fyrireikar seg í Chennai. Í morgin telva teir seinasta dystin á olympiaduni. F.v. Luitjen Akselsson Apol, Høgni Egilstoft Nielsen, John Rødgaard, Helgi Dam Ziska og Rógvi Egilstoft.

Talvolympiadan í India endar í morgin. Seinasta umfar er altíð serliga spennandi. Úrslitið í síðsta dystinum er avgerandi fyri endaliga úrslitið.

Føroyar møta Uganda í ellinta og seinasta umfari í morgin. Bæði liðini hava 10 stig eftir tíggju umfør. Føroyar eru styrkismettar ovari; vit nummar 60 og Uganda nummar 90. Men samsvar hevur ikki altíð verið millum styrkismeting og úrslit í OL-kappingini í Chennai.

Føroyar vunnu í dag 3½-½ á Malta, og hava otað seg av 105. plássi fram á 94. pláss í røðini av teimum 188 liðunum í kappingini. Vit hava vunnið fýra dystir, tapt fýra, og spælt tveir javnar.

Enn vita vit ikki, hvussu Føroyar manna seg í seinastu umfari, men alt talar fyri, at teir sum telvaðu í dag, fáa afturval í morgin. Okkara telvarar verða væntandi ratingfavorittar á øllum borðum. Men tað vóru teir eisini móti Libanon, Zimbabwe og Oman, og vunnu ikki kortini. Nú er at vóna, at góði dysturin í dag hevur givið okkara monnum flog og stimbur til at vinna aftur í morgin. Vinna vit, fara vit at fáa eitt hampuligt úrslit samanumtikið.

Men umráðandi er, at mótstøðuliðið ikki verður undirmett. Uppgávan má takast í fullum álvara. Uganda hevur vunnið á Oman, sum Føroyar telvaðu javnt ímóti í gjár. Uganda hevur eisini fingið hálvtannað stig móti Bulgaria. Tað man vera lutfalsliga besta avrik teirra á hesi olympiaduni. Í dag taptu teir 3-1 fyri Finnlandi. Vit fara ivaleyst at fáa harðari mótstøðu enn í dag, tá ið vit vunnu 3½-½ á Malta.

Hava havt munin

Dysturin í morgin verður tann sætti landanna millum. Søguliga eru vit ruddiliga við yvirlutan. Eftir fimm dystir er 4-1 til Føroyar.

Søgan byrjar í 1980. Tá er Uganda á fyrsta sinni á talvolympiadu. Ræðslustýrið hjá bølmenninum Idi Amin endaði árið fyri, og nú sluppu teir út at kappast saman við øðrum. Vit vinna 3-1 suðuri á Malta, sum hýsti olympiaduni ta ferðina. Luitjen Apol og Helgi Joensen, sáli, á Toftum vunnu, Súni Ziska og Jóan P. Midjord telvaðu javnt.

Vit møta teimum aftur í Luzern í 1982, og vinna á øðrum sinni 3-1. Nú vinna Luitjen Apol og Torkil Nielsen, Súni Ziska og Jóan P. Midjord telva remis. Vit síggja, at eftirkomarar og skyldmenn hjá hesum telvarum manna føroyska landsliðið í dag; Nielsen, Apol og Ziska.

Einasta tapið fáa vit í Jerevan 1996. John Rødgaard vann og Heini Olsen telvaði remis, men Eyðun Nolsøe og Rógvi W. Rasmussen taptu. Fjórði dysturin er á fjarleiðum eysturi í Sibira í 2010. Vit vinna aftur 3-1. Olaf Berg og Jóan Hendrik Andreasen vinna, John Rødgaard og Carl Eli Samuelsen telva remis.

Og fimti dysturin var í Tromsø í Norra í 2014. Vit vinna aftur 3-1. Tríggir av okkara monnum í Chennai tryggja okkum sigurin; Helgi Dam Ziska, John Rødgaard og Høgni Egilstoft Nielsen vunnu, bara John Arni Nilssen tapti.

Men tað er ikki óhugsandi, at framburður hevur verið innan telvingina í Uganda seinnu árini. Úrvalið er stórt at finna nýggjar og góðar telvarar, tí tað búgva ikki færri enn 45 milliónir fólk í afrikanska landinum.

1980 Føroyar-Uganda 3-1

1982 Føroyar-Uganda 3-1

1996 Føroyar-Uganda 1½-2½

2010 Føroyar-Uganda 3-1

2014 Føroyar-Uganda 3-1

Usbekistan á odda

Usbekistan, sum Føroyar møttu í øðrum umfari, hava tikið øll á bóli, og eru á odda fyri seinasta umfar í morgin.

Stórur spenningur valdar í toppstríðnum fyri seinasta umfar í morgin. Ein sensasjón lúrir. Usbekistan, styrkismett nummar fjúrtan, og ongantíð vunnið heiðursmerki á einari talvolympiadu, er fremst av øllum liðunum. Usbekistan og Armenia hava 17 stig, men Usbekistan hevur kortini munin við flestum borðstigum.

Onnur lond eru tó beint í hølunum á oddaliðunum, og fleiri innanhýsis dystir eru í seinasta umfari týsmorgunin, so alt kann framvegis henda.

Ivan Sokolov stjórnar usbekiska landsliðnum sum venjari. Usbekistan telvar í seinasta umfari í morgin móti Hollandi, sum Ivan sjálvur hevur umboðað í fleiri ár. Ivan hevur búð í Hollandi síðan hann í 1992 fór úr heimlandinum Jugoslavia/Bosnia-Herzegovina undir borgarakrígnum á sumri 1992. Fyrstu mánaðirnar sum flóttamaður helt hann til í Føroyum og virkaði sum venjari hjá Havnar Telvingarfelag tað summarið.

Í øðrum umfari legði Ivan usbekisku telvarunum lag á at vinna dystin móti Føroyum, og nú móti Hollandi átti hann at verið teimum hentur, tí hollendsku telvararnar kennir hann væl og virðiliga.

India hevur tvey lið á triðja plássi við 16 stgium. Ein av dyggastu stuðlunum á A-liðnum hjá India er Srinath Narayanan, sum hevur telvað í Føroyum, og vann altjóða kappingina Faroes Open í 2018. Stjørnuskotið Gukesh, sum bara er 16 ár, hevur 8½ stig av tíggju á 1. borði á B-liðnum hjá India.

Eitt av óvæntaðu úrslitunum í dag var, at Moldova vann á Noregi. Stórmeistarin Vladimir Hamitevici, sum hevur telvað á 1. borði hjá Klaksvík í føroysku liðkappingini, var sigursharri í dystinum við at vinna á Johan-Sebastian Christiansen. Á 1. borði mátti Magnus Carlsen sættast við remis.

Ein annar fyrrverandi telvari í føroysku landskappingini, sviin Tiger Hillarp Persson, sum telvaði við kollfirðingum árini fyri aldamótið, vann í dag fyri Svøríki móti Póllandi, tó at sviar taptu dystin.

Á topp 10-borðunum í dag vóru úrslitini hesi:

1. India (B). – Usbekistan 2-2

2. Aserbadsjan – Armenia 1-3

3. USA – Turkaland 3-1

4. Iran – India 1½-2½

5. Serbia – Holland 2-2

6. Spania – Kekkia 2½-1½

7. Ungarn – Ukraina 2-2

8. Týskland – Ísrael 3-1

9. Ongland – Italia 3-1

10. Frakland – Litava 2-2

Og hjá norðurlondum skarst soleiðis í dag:

Norra – Moldova 1½-2½

Pólland – Svøríki 2½-1½

Ísland – Grikkaland 1½-2½

Kolumbia – Danmark ½-3½

Finnland – Uganda 3-1

Føroyar – Malta 3½-½

Oddastøðan:

1. Usbekistan 17 stig

2. Armenia 17

3. India B. 16

4. India 16

5. USA 16

6. Holland 15

7. Spania 15

8. Ongland 15

9. Týskland 15

10. Serbia 15

26. Danmark 13

41. Norra 12

49. Finnland 12

51. Svøríki 12

54. Ísland 12

94. Føroyar 10

118 lið í alt.

Toppdystirnir í morgin:

Usbekistan – Holland

India B. – Týskland

Armenia – Spania

India – USA

Ongland – Moldova

Morguntelving

Tað verður snimma á morgni í morginári, ella rættari sagt í nátt, at fyrstu leikirnir verða fluttir í øllum dystum í seinasta umfari í Chennai.

Byrjað verður klokkan 10.00 indiska tíð – tað er klokkan hálvgum seks í nátt føroyska tíð. So er bara at tørna tíðliga út, tendra telduna og fara á netið at vita, hvussu leikur fer hjá okkara monnum móti Uganda.

Leinki til dystirnar sæst á heimasíðu Talvsambandsins: faroechess.com.

Uppreisn og stórsigur

8. august 2022

Hesir vunnu stórsigur á Malta í dag. F.v. Helgi Dam Ziska, Høgni Egilstoft Nielsen, Rógvi Egilstoft og John Rødgaard.

So bragdaði aftur hjá føroyska talvlandsliðnum á olympiaduni í India.

Í tíggjunda og næstsíðsta umfari í dag vunnu Føroyar heili 3½-½ á Malta. Sigurin var ógvuliga kærkomin eftir heldur slakan byr í seinastu dystunum.

Helgi Dam Ziska, Høgni Egilstoft Nielsen og Rógvi Egilstoft vunnu allir, og á fjórða borði telvaði John Rødgaard remis.

Føroyar eru styrkismettar væl fremri enn Malta, men seinastu dagarnar hava vit javnan sæð, at favorittleikluturin kann vera svikaligur. Vit plaga annars at vinna á Malta, bæði í OL og í kappingini fyri smátjóðir í Evropa.

Hvussu langt fram í røðina Føroyar vinna seg við hesum sigri fæst at síggja seinni í dag, tá ið allir dystir eru lidnir, og støðan verður gjørd upp. Tá fæst eisini at vita, hvørjum landi telvast skal ímóti í seinasta umfari í morgin.

Bo.

116

Malta (MLT)

Rtg

–

Faroe Islands (FAI)

Rtg

½ – 3½

52.1

Darmanin, Jake

2101

–

Ziska, Helgi Dam

2549

0-1

52.2

Cilia Vincenti, David

1904

–

Nielsen, Hogni Egilstoft

2414

0-1

52.3

Pace, Colin

2159

–

Egilstoft, Rogvi

2284

0-1

52.4

Vella, Duncan

1985

–

Rodgaard, John

2324

0,5-0,5

Naggatódn í India

7. august 2022

Føroyska telvararnir í Chennai í dag: Helgi Dam Ziska, Rógvi Egilstoft, John Rødgaard og Luitjen Akselsson Apol.

Vit hava í løtuni mótrák á talvolympiaduni í Chennai. Dysturin móti Oman í níggjunda umfari í dag endaði javnur 2-2.

Men henda dystin áttu Føroyar at vunnið.

Tá teir høvdu telvað í hálvan fjórða tíma, legði Rógvi Egilstoft Føroyar á odda 1½-½. John Rødgaard hevði frammanundan telvað javnt. Á hinum borðunum stóð væl til hjá okkara monnum. Helgi Dam Ziska hevði at kalla vunna støðu á 1. borði, og Luitjen hevði greiðan fyrimun á 4. borði.

Helgi, sum hevur verið okkara tryggi skansi, er nú óansin, og brádliga er greitt, at hann fær ikki annað enn remis og eitt hálvt stig í talvinum. Luitjen missir í góðari støðu mann uttan nakað endurgjald, og so er alt farið, tó at hann roynir at spjálka sum frægast.

Føroyska liðið stríðist at fáa naggatódnina úr aftur, tí í seinastu dystunum hevur tað ikki gingist eftir vild.

Føroyar eru nú nummar 105 í røðini av teimum 188 liðunum í kappingini. Vit eru styrkismettir nummar 60.

Tvey umfør eru nú eftir. Skal tað eyndast at fáa eitt úrslit, sum er nøkulunda í samsvar við okkara styrkismeting, ræður um at vinna báðar dystirnar, sum eftir eru.

Seinastu dystirnir vera í morgin og týsdagin.

Oman til Oman

7. august 2022

Føroyska liðið fyri dystin móti Oman í dag. F.v: Helgi Dam Ziska, Luitjen A. Apol, Rógvi Egilstoft og John Rødgaard.

Soleiðis kallaði Sonne Smith eina útvarpssending, tá ið hann einaferð hevði vitjað og hildið jól hjá einum beiggja sínum, ið starvaðist í sultánveldinum við Persaflógvan.

Vit kunnu siga, at føroyska talvlandsliðið er farið longu leiðina oman til India at telva móti Oman. Vit hava ongantíð telvað móti Oman fyrr. Teir mundu hava sín olympiska talvdóp norðuri í Tromsø í 2014, og hava tí ikki stórar altjóða royndir í talvi.

Men sum skilst er sultanurin, sum einsamallur ræður fyri borgum í islamska landinum við Arabiska Nesið, farin undir at nútímansgera samfelagið, tó ikki á demokratiskum stigi. Skúlaskapur hevur fingið hægstu raðfesting. Tá ið sultanurin tók við eftir pápa sín fyri hálvthundrað árum síðani, vóru einans tríggir fólkaskúlar í landinum, nú eru teir útivið 700.

Eftir øllum at døma, er talv vorðið vanligt millum Oman-búgvar síðan aldamótið. Tað búgva umleið fimm milliónir fólk í Oman.

Vend má koma í

Á pappírinum eru Føroyar stórfavorittur í dag. Vit eru styrkismettir nummar 60, teir nummar 146. Teir hava kortini havt hendinga góð úrslit í India. Teir vunnu 3-1 á Jordan, sum hevur tveir altjóða meistarar, og 2½-1½ á Ný Zelandi.

Lágu styrkitølini hjá omansku telvarunum kunnu tí vera fals undir fríðum skinni. Kortini eiga vit at kunna krevja av okkara monnum, at teir vinna í dag. Vit mugu fáa nøkur stig nú, tí umráðandi er, at vit taka okkum longur fram í røðina, so at vit fáa eitt endaligt úrslit, sum er í toluligum samsvari við okkara styrkismeting.

Føroyar taptu heldur óvæntað í gjár fyri Zimbabwe, sum er styrkismett væl lægri enn Føroyar. Føroyar eru nú dragnaðar aftur til nummar 113 í røðini av teimum 188 londunum í kappingini. Vit eru styrkismettir til nummar 60.

Høgni Egilstoft Nielsen hevur frí í dag. Í staðin telva Helgi Dam Ziska, Rógvi Egilstoft, John Rødgaard og Luitjen Akselsson Apol.

Dystirnir í dag byrjaðu klokkan 10:30 okkara tíð. Til ber at fylgja við leik fyri leik á netinum. Leinki sæst á heimasíðu Talvsambandsins: faroechess.com.

Telvað verður aftur í morgin og týsdagin, tá seinasta umfar er í Chennai.

146

Oman (OMA)

Rtg

–

Faroe Islands (FAI)

Rtg

Al Maashani, Amer

1947

–

Ziska, Helgi Dam

2549

Salim Mohammed, Salim Al Amri

1917

–

Egilstoft, Rogvi

2284

Salim Issa, Ali Shamas

1851

–

Rodgaard, John

2324

Al Busaidi, Hamood

1743

–

Apol, Luitjen Akselsson

2289

Føroyar dragna

6. august 2022

Føroyska liðið í dag – f.v.: Rógvi Egilstoft, Luitjen A. Apol, Høgni Egilstoft Nielsen og John Rødgaard.

Stígur er komin í hjá føroyska talvlandsliðnum á olympiaduni í India. Føroyar taptu í áttanda umfari í dag 2½-1½ fyri Zimbabwe.

Føroyar eru styrkismettar nummar 60 og Zimbabwe nummar 94. Føroysku telvararnir høvdu væl hægri rating á øllum borðum í dag, kortini eydnaðist ongum at vinna.

Helgi Dam Ziska var ikki við í dag. Høgni Egilstoft Nielsen, Rógvi Egilstoft og John Rødgaard telvaðu allir remis, og á fjórða borði tapti Luitjen Akselsson Apol.

Føroyar eru nú dragnaðar aftur á 113. pláss í røðini.

Misjavnt

Ólíka betur gongur hjá einum javnlíka hjá føroyska landsliðnum – Andorra – sum vit plaga at dystast við í kappingini fyri smátjóðir í Evropa. Andorra vann í gjár púra óvæntað á Sveis, sum er styrkismett nummar 36, og telvaði í dag 2-2 móti Kuba, sum er styrkismett nummar 32, og hevði fýra stórmeistarar á liðnum. Andorra er í løtuni nummar 33 í røðini, men er styrkismett ájavnt við Føroyar.

Her skal kortini nevnast, at Andorra innflytir uttan himpr góðar spanskar telvarar á sítt landslið. Sum nú er, er minsti parturin av liðnum upprunaliga úr Andorra. Tveir stórmeistarar eru á liðnum, báðir eru at kalla javnsterkir við Helga Dam Ziska. De La Riva hevur m.a. verið spanskur meistari. Kortini eru seinastu úrslitini hjá Andorra merkisverd.

Hjá øðrum gongur minni væl. Norra hevur verið eitt stórt vónbrot. Teir eru styrksimettir nummar trý, men eru í løtuni nummar 40. Magnus Carlsen hevur kortini gjørt sítt, tí hann hevur seks stig av sjey møguligum á 1. borði – tvey eru endað jøvn.

Uppaftur verri stendur helst til hjá stóra OL-favorittinum USA. Í gjár høvdu teir sigurin í hendi móti Armenia, men so snávaði Sam Shankland á fjórða borði í javnari støðu og tapti, so at dysturin endaði 2-2. Men í dag tapti USA heili 3-1 fyri B-liðnum hjá India, og nú er mestsum vónleyst hjá amerikanska liðnum at koma afturíaftur.

Armenia og India

Í India er rættur talvfepur. Tað gongur strúkandi hjá indisku liðunum í kappingini. Telvarin, sum øll tosa um í India, er tann einans 16 ára gamli Gukesh, sum situr á 1. borði á B-liðnum hjá India, sum er nummar tvey í kappingini.

Hesin Gukesh hevur tikið talvheimin á bóli. Púra óhoyrt hevur hann vunnið øll átta talvini higartil á 1. borði móti heilt sterkum mótstøðumonnum. Hesin unglingin nýtist ongan frídag, hann er við í hvørjum dysti, og hann leggur allar mótstøðumenn niður eftir tørni.

Í dag var hildið, at søgan fekk ein enda, nú hann møtti nummar eitt hjá USA, Fabio Caruana, men nei – Caruana fekk eisini sama túrin sum allir aðrir. Prestasjónsavrikið hjá honum umroknað í rating er ørandi høgt, eingin hevur sæð nakað líknandi fyrr. Kanska situr Magnus Carlsen og hugsar sítt.

16 ára gamli indarin Gukesh, sum bara vinnur og vinnur í Chennai.

Eitt annað lið, sum eisini strýkur avstað, og sum er einsamalt á odda, er Armenia. Teir komu til India uttan stóru stjørnuna, Levon Aronian, sum hevur givið seg yvir til amerikanskan mammon, men hinir spenna seg út og standa seg betur, enn nakar hevði hugsað, tí Armenia er styrkismettir sum nummar 12.

Samanberingin millum Armenia og USA er áhugaverd. Avrikið hjá armensku telvarunum er kanska fyrst og fremst grundað á samanhald og eyðmýkt og góðan liðanda. Amerikanska liðið hevur helst ikki sama festi. Alt ber á brá at vera eitt stórt prestisjuprojekt hjá billiarderinum Rex Sinquefield, sum er múgvandi vinnulívsmaður og filantropur, og rótfestur amerikanskur patriotur av tí gamla kristinkonservativa slagnum. Hann hevur fíggjað ein stóran amerikanskan talvmiðdepil í Saint Louis.

Fleiri av fremstu telvarum í heiminum eru knýttir at hesum depli. Hesir geva seg allir undir amerikanskan talvtjóðskap, soleiðis at teir kunnu umboða USA á olympiadunum. Nevnast kunnu Aronian (Armenia), Wesley So (Filipsoyggjar), Dominguez Perez (Kuba) og Fabiano Caruana (Italia). Caruana er gaman í føddur og uppvaksin í USA, men er av italskari rót, og fór sum ungur til Evropa at menna seg sum telvari. Hann gav seg tá undir italska talvsambandið, og umboðaði Italia á nøkrum talvolympiadum, men nú er hann aftur í USA – í Saint Louis – og umboðar USA. Hesir fýra manna amerikanska landsliðið í India saman við Sam Shankland.

Men higartil hava stórfavorittarnir svikið. Kann tað hugsast, at her eru ov nógvir kongar á sama liði, sum ikki hava sama hjartalag og eyðmýkd fyri uppgávuni, sum hinir?

Quo Vadis, Føroyar?

Nú eru trý umfør eftir í talvolympiaduni í India. Tey vera avgerandi fyri endaliga úrslitið. Enn ber til at vinna seg væl longur fram í røðina.

Endaliga plaseringin í kapping sum hesari kann ofta vera rættiliga misvísandi, tí sveiggini eru so stór fyri hvørt umfar. Hetta gjørdi seg serliga galdandi fyrr, tá bara borðstigini taldu. Nú eru tað dystarstigini, sum telja fyrst. Men eftir at hava tapt tveir dystir á rað, hava vit ikki flutt okkum nakað fram, men eru bara dragnaðir.

Júst hvar vit lenda í longu røðini við teimum 188 liðunum skal tí ikki einsamalt vera avgerandi fyri eina heildarmeting av føroyska avrikinum, annað er eisini, sum hevur týdning. Men tað er einki dulsmál, at fleiri av føroysku telvarunum eru ikki av álvara komnir á lagið. Okkum nýtist bara at hyggja at einstøku avrikunum hjá okkara telvarum fyri at staðfesta, at allir uttan Helgi ganga aftur í rating, sum nú er. Tí er at vóna, at føroysku telvararnir geva okkum ein góðan spurt.

Helgi Dam Ziska var ikki við í dag – spurningurin er, um vit yvirhøvur hava ráð til slíkt luksus, tá hinir ikki fáa tað at ganga eftir vild.

Oman í morgin

Í morgin telva vit móti Oman. Teir eru styrkismettir nummar 146. Eingin hevur omanfyri 2000 í rating. Eftir tí, átti tað at verið ein avgreiðsluspurningur hjá Føroyum at vunnið, men frægast man vera einki at fyrigykla sær, tí vit hava so mong dømini um, at telvarar við lágum ratingtølum saktans kunnu bíta frá sær.

OL í India er gott dømi um øktu talvglobaliseringina umvegis internetið, sum ber í sær, at lond við ongari ella veikari talvvsiðvenju brádliga gera ein vørr, tí unglingar telva sum brent á netinum samdøgrið á tamb. Tí kunnu eisini telvarar úr landi sum Oman vera úlvar í seyðaskinni.

Dystirnir í níggjunda og triðsíðsta umfari byrja sunnumorgunin klokkan 10.30 okkara tíð. Fylgjast kann við leik fyri leik – leinki sæst á heimasíðu Talvsambandsins: faroechess.com.

Helgi og Høgni remis

5. august 2022

Føroysku telvararnir móti Argentina í dag. F.v.: Luitjen Akselsson Apol, John Rødgaard, Høgni Egilstoft Nielsen og John Rødgaard.

Føroyar fingu eitt stig móti Argentina á talvolympiaduni í India í dag.

Bæði Helgi Dam Ziska og Høgni Egilstoft Nielsen fingu javnt á ovaru borðunum móti sterkastu telvarunum hjá Argentina.

Á niðaru borðunum noyddust okkara menn til endans at leggja kongin. Leingi var líkt til, at John Rødgaard eisini fór at fáa sítt talv javnt, men í endatalvinum misti hann tráðin. Minni spenningur var um talvið á fjórða borði, har 16 ára gamli Luitjen Akselsson Apol kýtti seg til fánýtis móti sterkum stórmeistara.

Dysturin millum Føroyar og Argentina endaði tí 3-1 til Argentina, sum er styrkismett nummar tretivu í kappingini.

Góða gongdin hjá Helga Dam Ziska stendur við. Hann hevur nú fimm stig í sjey dystum á 1. borði. Í dag var serliga hugaligt at síggja, at føroyameistarin Høgni Egilstoft Nielsen á 2. borði var mentur at halda tørn við svarta fólkinum móti stórmeistara, ið hevði útivið hálvtannaðhundrað ratingstig fleiri.

Eftir dystin í dag eru Føroyar nummar 96 av teimum 188 liðunum í kappingini.

Áttanda umfar er í morgin. seinni í kvøld fæst at vita hvørjum Føroyar telva ímóti.

Ellivu umfør eru í alt. Olympiadan endar týsdagin.

Føroyar møta Argentina

5. august 2022

Føroyska landsliðið á sightseing á fornum tempulleiðum í Chennai á einasta frídegnum á talvolympiaduni í gjár. F.v.: Helgi Dam Ziska, Luitjen Akselsson Apol, Ingolf Gaard, liðleiðari, John Rødgaard, Høgni Egilstoft Nielsen og Rógvi Egilstoft.

Tað verður aftur sera sterk mótstøða á talvolympiaduni í India í dag. Vit møta Argentina, sum er styrkismett nummar 30 av teimum 188 liðunum.

Argentina er søguliga sterk talvtjóð. Í nógv ár lógu teir framvið at vinna heiðursmerki á OL, og nakrar ferðir í 50-unum endaði Argentina nummar trý á talv-OL. Tá ráddu menn sum Najdorf, Panno, Bolbochan o.a. fyri talvborgum í Argentina.

Argentina hevur tvær ferðir hýst talvolympiaduni. Fyrru ferð í 1939. Liðini í Evropa høvdu tá einar tvær vikur um longu ferðina við skipi vestur um hav. Mitt undir kappingini brast seinni heimsbardagi á. Fleiri telvarar vóru verandi í Argentina til kríggið var av. Aðrir løgdu á vandasjógv fyri at sleppa heim. Ein, sum var eftir, var jødiski póllendingurin Najdorf. Tá kríggið var av, frætti hann, at konan, dóttirin og bæði foreldrini vórðu myrd. Najdorf gjørdist nú argentinskur ríkisborgari, og landsins fremsti telvari í ein mansaldur.

Í 1978 hýsti Argentina talvolympiaduni á øðrum sinni. Telvað var á Estadio Monumental í Buenos Aires, har Argentina stutt frammanundan hevði vunnið heimsmeistaraheitið í fótbólti á fyrsta sinni. Illa lýdda hernaðarstýrið ráddi tá fyri borgum í Argentina, og í bygninginum beint yvir av leikstaðnum vórðu fleiri av politisku andstøðingunum settir fastir. Millum leikirnar á Estadio Monumental hoyrdust viðhvørt í kvirruni skotríðir frá hermonnum, sum høvdu skotvenjingar yvirav.

Argentina hevur fimm stórmeistarar á liðnum í Chennai. Miðalstyrkitalið er 2558. Argentina hevur vunnið tríggjar dystir – allar 4-0 – móti grannalandinum Kolumbia var javnt 2-2, og dystirnir, sum teir hava tapt, hava verið móti Aserbadsjan, ið er styrkismett nummar seks í kappingini, og Ukraina, sum fyrr hevur vunnið talv-OL, og sum er við, tó at Russland hevur gjørt innrás í landinum.

Mundu fingið Carlsen

Tað var annars um hár gjørt, at Føroyar møttu Norra heldur enn Argentina í dag. Norra fekk í staðin Norðurmakedonia, sum er beint undir liðini á okkum eftir sætta umfar. Tað hevði annars verið stuttligt at sæð okkara stórmeistara roynt seg móti heimsmeistaranum Magnusi Carlsen.

Føroyingar fingu annars høvi at heilsa uppá Magnus Carlsen fyrrakvøldið, tá veitsla var fyri telvarunum í Chennai. Høgni Egilstoft Nielsen var komin í prát við norska heimsmeistaran, og tað vísti seg, at Magnus visti heilt fitt um føroyskar telvarar. Og tað kemur kanska ikki av ongum. Tí ein føroyskur telvari hevur tvær ferðir vunnið á Carlsen.

John Arni Nilssen telvaði í 2011 tvær ferðir móti tá einans 10 ára gamla Magnusi, fyrst í Gausdal í januar 2011, og so aftur í norðurlandameistarakappingini í august sama ár, og báðar ferðir vann John Arni. Hóast Magnus var eitt av talvsins undurbørnum, var hann sum tíggju ára gamal tó ikki mentur at standa einum altjóða meistara kurl.

Alt suðuramerika

Talið á dystum og røðin av londum, sum Føroyar hava møtt í landsdystum á talvolympiadum síðani 1970, smæðist ikki burtur.

Og nú vit í dag á fyrsta sinni møta Argentina, kann staðfestast, at Føroyar hava telvað móti øllum tólv londunum í Suðuramerika á talvolympiadum.

Tey bæði størstu og sterkastu londini hava verið eftir í nøkur ár, men á seinastu OL-leikunum á Georgia í 2018 møttu vit Brasil.

Vit taptu 3-1 móti sterka liðnum úr fólkaríka landinum, men á 1. borði gjørdi Helgi Dam Ziska tað bragd at vinna á GM Rafael Leitao (2620) í stórum stíli – uttan iva eitt av bestu talvunum hjá okkara stórmeistara á OL.

Summum suðuramerikanskum londum hava vit møtt fleiri ferðir, øðrum bara eina ferð. Her er yvirlitið:

Kolumbia

1992 Føroyar-Kolumbia 1-3

2002 Føroyar-Kolumbia ½-3½

2004 Føroyar-Kolumbia 1-3

2006 Føroyar-Kolumbia ½-3½

2008 Føroyar-Kolumbia ½-3½

Ekvador

1982 Føroyar-Ekvador 3½-½

1994 Føroyar-Ekvador 2-2

2010 Føroyar-Ekvador 2½-1½

Paraguay

1980 Føroyar-Paraguay ½-3½

1984 Føroyar-Paraguay 2-2

1996 Føroyar-Paraguay 2-2

2006 Føroyar-Paraguay 2-2

Uruguay

1974 Føroyar-Uruguay 2-2

1978 Føroyar-Uruguay 2-2

2006 Føroyar-Uruguay 2½-1½

Bolivia

2006 Føroyar-Bolivia 3-1

2008 Føroyar-Bolivia 2½-1½

2016 Føroyar-Bolivia 1½-2½

Chile

1992 Føroyar-Chile 1½-2½

1998 Føroyar-Chile ½-3½

Peru

1970 Føroyar-Peru 0-4

1978 Føroyar-Peru ½-3½

Guyana

1978 Føroyar-Guyana 3½-½

Surinam

1982 Føroyar-Surinam 2-2

Venesuela

1994 Føroyar-Venesuela 2-2

Brasil

2018 Føroyar-Brasil 1-3

Dystirnir í dag byrjaðu klokkan hálvgum ellivu fyrrapartin.

Toppdysturin stendur millum Armenia og USA. Sum væntandi var, er armenin Levon Aronian ikki við á amerikanska liðnum í dag. Hann hevur nýliga skift sín armenska talvtjóðskap um við tann amerikanska. Nýggja stjórnin í Armenia hevur sum skilst tikið nakrar av sømdunum, sum telvarar hava átt, frá teimum, og tað fekk hann at rýma.

Amerikanska talvsambandið og hin talvfúsi billiarderurin Rex Sinquefield lokkaðu Aronian í sín part. Aronian hevur verið stóra talvhetjan í Armenia, sum hevur vunnið talv-OL fleiri ferðir seinnu árini við Aronian sum oddamanni.

Leinki til dystirnar í dag sæst á heimasíðu Talvsambandsins: faroechess.com.

Vunnu á Wales

4. august 2022

Hesir tryggjaðu okkum sigurin á Wales í dag. F.v.: Helgi Dam Ziska, Høgni Egilstoft Nielsen, Rógvi Egilstoft og John Rødgaard.

Føroyar vunnu í dag 3-1 á Wales á talvolympiaduni í India.

Helgi Dam Ziska, Rógvi Egilstoft og John Rødgaard vunnu síni talv, men Høgni Egilstoft Nielsen tapti.

Helgi, Rógvi og John telvaðu allir væl og vunnu sannførandi, men Høgni var tikin á bóli av sera ágangandi mótstøðumanni, og fekk ikki vart seg fyri hættisliga álopinum, ið walisin setti í verk.

Stórmeistarin Helgi Dam Ziska er toppskjútti á føroyska landsliðnum. Hann hevur higartil fingið 4½ stig á 1. borði í seks dystum.

3-1 sigurin í dag ber í sær, at Føroyar taka seg fram sum nummar 72 í røðini av teimum 188 liðunum í kappingini. Fyri dystin í dag var føroyska liðið á 97. plássi. Føroyar hava nú 7 dystarstig og 12½ í borðstigum. Vit hava vunnið tríggjar dystir, tapt tveir og spælt ein javnan.

Hetta var triði dysturin móti Wales á einari talvolympiadu, og annar dysturin, sum Føroyar vinna.

Í morgin er frídagur í Chennai.

Enn er ikki greitt, hvørjum Føroyar telva ímóti í sjeynda umfari fríggjadagin.

Armenia á odda

Armenia vann í dag toppdystin á B-liðnum hjá India 2½-1½, og er nú einasta lið við fullum stigatali – 12 dystarstig eftir seks umfør.

Favorittliðið USA hevur nú otað seg fram á annaðplássið eftir tepran sigur á Iran í dag. Caruana tryggjaði USA sigurin á 1. borði, hinir telvaðu allir javnt. USA er einasta lið, sum hevur 11 stig. Í hølunum á USA er ein riðil av londum, sum hava 10 stig – m.a. øll trý liðini, sum vertslandið India hevur í almennu kappingini.

Fríggjadagin verður uttan iva toppdystur millum Armenia og USA. Tá verður spennandi at síggja, um stórtelvarin Levon Aronian, ið júst hevur skift sín armenska tjóðskap um við tann amerikanska, verður við – ella hann ber seg undan júst hesum dysti.

Ellivu umfør eru í alt, kappingin endar týsdagin.

Føroyar móti Wales

3. august 2022

Føroyar telva móti Wales í sætta umfari á talvolympiaduni í India í dag.

Føroyar eru styrkismettar nummar 60, Wales nummar 97. Føroysku telvararnir hava hægri styrkitøl á øllum fýra borðum. Vit sleppa tí ikki undan favorittleiklutinum, men royndirnar vísa, at so einfalt er tað kortini ikki.

Les meira »

Síða 22 av 110« Fyrsta...10 «20 212223 24 » 30 40 50...Síðsta »