Heim / Tíðindi (síða 4)

Tíðindi

Endaspurturin byrjar

24. februar 2024

Vágamenn og havnarmenn í avgerandi dysti um FM-heitið í talvi.
 
Í morgin sunnudagin verður farið undir dystirnar í níggjunda og næstsíðsta umfari í landskappingini í talvi fyri feløg.
 
Tvey stig eru á muni millum oddaliðini Havnar Telvingarfelag og Sandavágs Talvfelag, sum hittast í síðsta umfari um tvær vikur.
 
Í morgin fæst so greiði á, hvørjar fyritreytirnar fyri avgerandi innanhýsis dystin í síðsta umfari verða – verður núverandi munurin standandi óbroyttur, økist hann ella styttist hann?
 
Havnarmenn hava ivaleyst heldur torførari dyst enn sandavágsmenn í morgin. Báðir FM-biðlarnir hava klaksvíkingar ímóti sær; Havnin telvar móti 1. liði hjá Klaksvík, Sandavágur hevur dyst móti B-liði felagsins. Tað er tó at siga, at munurin á báðum klaksvíksliðunum í 1. deild er ikki eins stórur og munurin á báðum liðunum, sum Havnin og Sandavágur hvør hava í bestu deildini.
 
Telvað verður soleiðis í 1. deild í morgin:
 
1. deild – 9. umfar (25. februar 2024)
Havnin (1) – Klaksvík (1)
Klaksvík (2)- Sandavágur (1)
Havnin (2) – Sandavágur (2)
 
Støðan í 1. deild:
Havnin 27 stig
Sandavágur 25
Klaksvík 15½
Sandavágur (2) 11
Klaksvík (2) 10
Havnin (2) 7½
 
 
Suveren oddalið
 
Úrslitini tala. Oddaliðini bæði eru í flokki fyri seg. 
 
Havnarmenn hava ásannað, at skulu teir taka meistaraheitið frá vágamonnum, krevst einki minni enn ein óvanliga góð úrtøka á hvørjum borði. 
 
Við undantaki av fyrra innanhýsis dystinum millum Havnina og Sandavág, sum endaði javnur, hevur oddaliðið fingið ikki minni enn 3½ stig í hvørjum av hinum dystunum. Vágamenn hava vunnið sínar dystir 3-1 ella meira.
 
Havnarmenn hava bara tapt eitt av 32 talvum higartil, vágamenn tvey.
 
Innanhýsis úrtøkan hjá oddaliðunum báðum er henda:
 
Havnin
Helgi Dam Ziska 6½/7
Martin Poulsen 2/2
Carl Eli Samuelsen 5/7
Luitjen Akselsson Apol 5½/7
Sjúrður Thorsteinsson 7/8
Suni Merkistein 1/1
 
Sandavágur
Rógvi Egilstoft 6/7
Høgni Egilstoft Nielsen 7/8
Silas Eyðsteinsson 4½/7
Torkil Nielsen 2½/3
Jón í Horni Nielsen 5/7
 
 
Aðruhvørja ferð
 
Ikki síðani 2010 hevur annað felag enn tey í Sandavági og í Havn vunnið FM. Tá vann Klaksvíkar Talvfelag. Síðani hava vágamenn og havnarmenn verið einsamallir um oddastríðið. 
 
Seinastu seks árini hava feløgini vunnið aðruhvørja ferð:
 
FM-vinnarar í talvi 1. deild 2018-2023
2018 HT
2019 ST
2020 HT
2021 ST
2022 HT
2023 ST
 
 
Hinar deildirnar
 
Í 2. deild er Kollafjarðar Talvfelag á odda. Runavíkingar eru teir einastu, sum hótta.
 
Í 3. deild eru toftamenn klárt á odda, og hava at kalla tryggjað sær uppflyting.
 
Í 4. deild hevur Havnar Telvingarfelag verið á odda allan vegin.
 
Mesti spenningurin er í unglingadeildini. Har kann alt henda.
 
 
2. deild (topp-3)
Kollafjørður 20 stig
Kongshavn 16½
Havnin 16
 
3. deild (topp-3)
Toftir 25½ stig
Sandavágur 17
Rókur 15½
 
4. deild (topp-3)
Havnin 24 stig
Klaksvík 20
Klaksvík/Strendur 19½
 
Unglingar
Gøta 16 stig
Sandavágur 15½
Havnin 15½

Innbjóðing til TT-Kvik 2024

22. februar 2024

7. GP-kapping í hesum kappingarári verður telvað í talvhølunum hjá Tofta Talvfelag komandi leygardag, 24. februar. Øll eru vælkomin at luttaka í kappingini.

Les meira »

Innbjóðing: BGP7 í Kollafirði

21. februar 2024

Komandi leygardag, 24. februar, verður kviktalvkapping fyri børn í Kollafjarðar Skúla. Talan er um 7. kapping út av 10, har ið børnini kunnu samla stig saman til eina samlaða Grand Prix kapping. Kappingin í Kollafirði byrjar kl. 10:00. 6 umfør verða í tveimum aldursbólkum (4 fl. og yngri og 5. fl. og eldri) við tíðini á klokkuni á 10min + 5 sek. Les meira »

Luitjen næstbestur í NM

19. februar 2024

18 ára gamli Luitjen Akselsson Apol úr Havnar Telvingarfelag var næstfremstur í sterkasta bólkinum í norðurlandameistarakappingini í talvi fyri unglingar, sum endaði í dag.
 
Hin føroyski telvarin í A-bólkinum, Jón í Horni Nielsen, úr Sandavágs Talvfelag, stóð seg eisini væl, og rakk einum fjórða plássi.

Les meira »

NM dagur 3

18. februar 2024

Í A bólkinum var einki at seta fingurin á í dag. Jón telvaði væl og fekk veruliga gongd á taktisku kombinatiónirnar og vann bæði talvini í dag ímóti sterkari mótstøðu.
Luitjen hevði medalju kjansir tá dagurin byrjaði og hesum fór hann eftir við heilum huga. Luitjen vann bæði talvini í dag og tryggjaði sær annaðplássi. Luitjen endar nr. 2 við 4,5 stigum og Jón nr. 4 við 3,5.

Í B bólkinum fekk Rókur ein sigur uttan talv í morgun og Elias hevði eitt flott talv, men misti tíverri á stokkinum.
Seinnapartin telvaðu teir báðir javnt sínamillum og endaðu á 1,5 í part.

Í C bólkinum tapti Emil tíverri bæði talvini í dag og endar við 0,5 stigum
Petur fekk remis í morgun og stríddist fyri at halda tí seinna javnt, men mátti tíverri lúta. Petur endar á 1,5 stigum.

Í D bólkinum riggaði einki í dag. Bæði Oskar og Andrias telvaðu væl og høvdu fínar støður. Tíverri var mótstøðan ov sterk og taptu báðir bæði talvini. Teir enda á 0,5 stigum í part.

Í E bólkinum var hetta dagurin har flest møguleikar fóru fyri skeyti. Bæði Baldur og Lisa telvaðu neyvt og høvdu løtur við yvirvág í talvunum. Tíverri taptu tey eisini bæði talvini.
Lisa endar á 2 stigum og Baldur 1,5.

Samlaða úrtøkan hjá føroyingum gjørdist 17,5 stig.

Úrslit & myndir: BGP6 í Gøtu

18. februar 2024

6. Barna Grand Prix kapping út av 10 varð telvað í Víkingahúsinum í Gøtu t. 10. februar. Telvað vóru 6 umfør í tveimum aldursbólkum: 4 flokkur og yngri og 5 flokkur og eldri. 10 minuttir + 5 sekund høvdu børnini á klokkuni. Les meira »

NM dagur 2

17. februar 2024

Telvarnir settust væl hýrdir við borðini kl.9 í morgun. Í A bólkinum helt Luitjen fram har hann slepti í gjár, og vann í 3.umfari. Jón pressaði mótstøðumannin, men kongastøðan var í so opin og talvið endaði remis, tí Jón slapp ikki undan skákunum.

Les meira »

NM í Finnlandi

16. februar 2024

Eftir ein langan ferðadag, har vit møttu á flogvøllinum í Vágum kl. 7 um morgunin, komu vit fram til Paivola Institute í Valkeokoski seint á kvøldi hósdagin. Staðsetingin er heldur avsíðis, so her eru góðar umstøður at hugsavna seg um telvingina.
Les meira »

Havnin økir

14. februar 2024

Havnar Telvingarfelag við stórmeistaranum Helga Dam Ziska á odda styrkti oddastøðu sína um vikuskiftið.
 
 
Eitt stig var á muni millum kappingarneytarnar Havnina og Sandavág fyri dystirnar í áttanda umfari sunnudagin – nú eru havnarmenn tvey stig fremri.
 
Tvey umfør eru nú eftir í landskappingini í talvi, og hóast havnarliðið hevur munin, er stríðið um FM-heitið framvegis ógvuliga spennandi. Avgerðin fellur væntandi í innanhýsis dysti á síðsta leikdegi.
 
Oddaliðini telvaðu bæði í Sandavági, har havnarmenn og klaksvíkingar vitjaðu. Havnarmenn gjørdu bart móti øðrum liði hjá vágamonnum og vunnu 4-0. Martin Poulsen sást aftur á havnarliðnum sunnudagin. Hann loysti av Luitjen Akselsson Apol.
 
FM-manningin hjá Sandavágs Talvfelag vann 3-1 á fyrsta liði hjá Klaksvíkar Talvfelag. Ólavur Simonsen og Rani Nolsøe fingu javnt á klaksvíksliðnum á ávikavist 1.- og 4. borði.
 
Í Klaksvík telvaðu B-liðini hjá Klaksvík og Havnini. Klaksvíkingar vunnu 3-1. Ósigurin ber í sær, at B-lið havnarmanna er komið í veruligan niðurflytingarvanda.
 
 
 
1. deild – 8. umfar (11. februar) 
 
Sandavágur (2) – Havnin (1)
Torkil Nielsen – Helgi Dam Ziska 0 – 1
Jón Atlason – Martin Poulsen 0 – 1
Ingi Wiberg – Carl Eli Samuelsen 0 – 1
Johnny Petersen – Sjúrður Thorsteinsson 0 – 1
 
Sandavágur (1) – Klaksvík (1) 3 – 1
Rógvi Egilstoft – Ólavur Simonsen ½ – ½
Høgni Egilstoft Nielsen – Terji Petersen 1 – 0
Silas Eyðsteinsson – Rani Baldursson 1 – 0
Jón í Horni Nielsen – Rani Nolsøe ½ – ½
 
Klaksvík (2) – Havnin (2) 3 – 1
Haldur S. Johansen – Herluf Hansen ½ – ½
Wille Olsen – Suni Merkistein ½ – ½
Heðin Gregersen – Andrias Ziska 1 – 0
Finnbjørn Vang – Jóannes Guttesen 1 – 0
 
Støðan í 1. deild (eftir 8 umfør)
Havnin 27 stig
Sandavágur 25
Klaksvík 15½
Sandavágur (2) 11
Klaksvík (2) 10
Havnin (2) 7½
 
 
Hinar deildirnar
 
Um hinar deildirnar er stutt at siga, at kollfirðingar stevna framvegis móti uppflyting úr 2. deild upp í 1. deild, tó at teir taptu sunnudagin. Styrkismunurin á fremstu og næstfremstu deildini er lutfalsliga stórur. Tí ræður um hjá tí liði, sum flytur upp, at styrkja seg komandi kappingarár, ætla teir at verða hangnandi í bestu deildini.
 
Í 3. deild eru toftamenn í flokki fyri seg og flyta upp. Í hinum endanum liggja vestmenningar í tungum sjógvi, men við einum góðum spurti, kunnu teir bjarga sær undan niðurflyting.
 
Í 4. deild er Havnin fremst, og um unglingadeildina er at siga, at hugaligt er at síggja, hvussu jøvn øll liðini í veruleikanum eru.
 
 
2. deild (8. umfar)
Kollafjørður – Klaksvík (3) 1½ -2½
Kollafjørður (2) – Havnin (3) 1 – 3
Kongshavn – Havnin (4) 2 – 2
 
Støðan (2. deild):
Kollafjørður 20 stig
Kongshavn 16½
Havnin 16
Klaksvík 15½
Havnin 14½
Kollafjørður 13½
 
 
3. deild (8. umfar)
Vestmanna – Sandavágur 2 – 2
Toftir – Rókur 3½ – ½
Sandavágur – Gøta ½ – 3½
 
Støðan (3. deild):
Toftir 25½
Sandavágur 17
Rókur 15½
Gøta 14½
Sandavágur 12½
Vestmanna 11
 
 
4. deild (støðan)
Havnin 24 stig
Klaksvík 20
Klaksvík 19½
Strendur 19½
Sandavágur 12
Suðuroy 10
Toftir 10
Rókur 9½
Gøta 5½
Kongshavn 2
 
 
Unglingar (støðan)
Gøta 12 stig
Havnin 11½
Havnin 11
Klaksvík 10½
Sandavágur 10
Strendur 9½
Rókur 8½
Gøta 8
Toftir 7
 
 
Tvey umfør eru nú eftir í landskappingini. Telvað verður aftur um tvær vikur, og so endar kappingin tvær vikur eftir tað.
 
Í 1. deild er skráin fyri tað, sum eftir er av kappingini henda:
 
9. umfar (25. februar)
Havnin (1) – Klaksvík (1)
Klaksvík (2) – Sandavágur (1)
Havnin (2) – Sandavágur (2)
 
10. umfar (9. mars)
Sandavágur (1) – Havnin (1)
Klaksvík (1) – Havnin (2)
Sandavágur (2) – Klaksvík (2)
webmaster@faroechess.com
Talvsamband Føroya 2024