Heim / Tíðindi (síða 10)

Tíðindi

Ólavsøkutelving á Finsen

Frá ólavsøkudystinum 2021. Martin Poulsen og Ólavur Simonsen á 1. borði. 
 
Aftur í ár fara havnarmenn og klaksvíkingar at kappast á tíggju talvborðum ólavsøkuaftan. Byrjað verður eftir kappróðurin klokkan 18. Telvað verður í hølum Havnar Telvingarfelags ovast í Finsen. Telvararnir fáa fimtan minuttir í part til talvið umframt tíggju sekund fyri hvønn leikin.
 
Hetta er triðja árið, at telvað verður ólavsøkuaftan, eftir at siðvenjan varð uppafturtikin eftir íhald í nøkur ár. Havnarmenn vunnu fyrraárið og klaksvíkingar í fjør.
 
Roknast kann við jøvnum og spennandi dysti. Havnarmenn hava ikki fremstu fýra telvararnar við – Helgi Dam Ziska, Martin Poulsen, Olaf Berg og Carl Eli Samuelsen eru ikki tøkir í ár. Hjá klaksvíkingum mangla báðir Ranarnir – Nolsøe og Baldursson – umframt Terji Petersen og Finnbjørn Vang.
 
Men havnarmenn hava leitað fram aftur tveir av sínum gomlu føroyameistarum og OL-telvarum – útisetarnar Flóvin Tór Næs (FM 2000) og Rógva Winthereig Rasmussen (FM 1996), sum manna bæði fremstu borðini.
 
Liðini verða soleiðis mannað:
 
HT
1. Flóvin Tór Næs
2. Rógvi W. Rasmussen
3. Luitjen A. Apol
4. Sjúrður Thorsteinsson
5. Hjalti Toftum Jógvansson
6. Herluf Hansen
7. Rógvi Mortensen
8. Margar Berg
9. Óli Joensen
10. Jógvan Joensen
 
KTF
1. Ólavur Simonsen
2. Eyðun Nolsøe
3. Steintór Rasmussen
4. Haldur Suni Johansen
5. Wille Olsen
6. Ingolf Gaard
7. Heðin Gregersen
8. Janus Skaale
9. Tummas Martin Anthoniussen
10 Bogi Hansen Eliasen
 
15 minuttir umframt tíggju sekund fyri leikin. Klokkan 18 í Finsen.
 
 
Afturstig hjá vágamonnum
 
Tað gekst ikki eftir vild hjá teimum trimum á FM-liðnum hjá Sandavágs Talvfelag, sum nú í juli hava telvað í altjóða kapping í Slovakia – Slovakia Chess Open.
 
Brøðurnir Rógvi og Høgni Egilstoft Nielsen høvdu ikki eydnuna við sær, og mistu í meira lagi av sínum styrkitali. Afturímóti stóð Jón í Horni Nielsen seg væl og gekk fram í rating.
 
Íalt 74 telvarar vóru við í A-bólkinum. Høgni var styrkismettur nummar 14, men endaði nummar 43. Hann fekk 4½ stig av níggju møguligum. Høgni missir 28 ratingstig, og dettur niðurum aftur 2400-markið. Verri gekst Rógva. Hann fekk trý stig, og missir heili 66 ratingstig. Jón fekk fýra stig í kappingini og gongur 29 ratingstig fram.
 
Annars frættist lítið um føroyskar telvarar í kappingum uttanlands í summar. 
 
 
Helgi sterkari enn norðurlendsku meistararnir
 
Øll norðurlond hava nú havt sína árligu landsmeistarakapping í talvi fyri einstaklingar. Stuttligt er at síggja, at føroyameistarin er hin næstfremsti av norðurlendsku meistarunum í ár.
 
Yvirlitið eftir styrki er hetta:
 
Norra: GM Simen Agdestein (2584)
Føroyar: GM Helgi Dam Ziska (2549)
Finnland: IM Toivu Keinanen (2504)
Danmark: GM Boris Chatalbashev (2493)
Ísland: IM Vignir Vatnar Stefansson (2487)
Svøríki: GM Vitaly Sivuk (2432)
 
Her kann nevnast, at tilflytarar hava vunnið ávikavist danska og svenska meistaraheitið í ár. Danskur meistari er Boris Chatalbashev. Í DM á páskum koppaði hann sterkasta telvara í Danmark, Jonas Buhl Bjerre. Boris er upprunaliga úr Bulgaria, hevur fýra ferðir vunnið bulgarska meistaraheitið og umboðað Bulgaria í OL. Síðani 2018 hevur hann umboðað Danmark. 
 
Vitaly Sivuk er ukraini, men flutti til Svøríkis í fjør.
 
Leggjast kann aftrat, at 56 ára gamli Simen Agdestein er í 2023 aftur norskur meistari – 41 ár eftir, at hann sum bara 15 ára gamal vann norska meistaraheitið á fyrsta sinni í 1982.  Simen Agdestein hevur nú verið norskur meistari níggju ferðir. 
 
Og sum eina sloyfu kunnu vit til endans fortelja, at í 1983 sat Simen Agdestein sum 16 ára gamal á 1. borði á norska talvlandsliðnum í víðkaðari norðurlandameistarakapping í Oslo. Í seinasta umfari hendi púra óvæntað tað, at norska stjørnuskotið tapti í dystinum móti Føroyum. Mótstøðumaður hansara á 1. borði var Súni Ziska – pápabeiggi føroyska stórmeistaran Helga Dam Ziska – sum í stórum stíli vann eitt minniligt talv. Súni andaðist fyrr í vár, nakrar dagar fyri, at Havnar Telvingarfelag fylti 100.

Føroyski toppurin dagførdur

Úrslitini í FM-kappingini í talvi um páskirnar síggjast aftur í spildurnýggja styrkilistanum, sum altjóða talvsamgongan FIDE hevur kunngjørt um mánaðarskiftið.
 
Onkur gongur fram, annar aftur. Vit síggja, at Høgni Egilstoft Nielsen hevur aftur togað seg uppum 2400-markið, bróðirin Rógvi er komin fyri seg aftur eftir laka úrslitið í FM-einstaklingakappingini í fjør, vánaliga FM-úrslitið hjá Olaf Berg á páskum verður kontant avroknað í nýggja mai-yvirlitinum, góða FM-úrslitið hjá Carl Eli Samuelsen sæst aftur, o.s.fr.

Les meira »

NM fyri gentur 2023 – endaspurturin

Sunnudagin vóru 2 tey seinastu umførini av NM fyri gentur telvað á hesum sinni. Føroysku genturnar hava telvað væl, og lært so nógv við at hava verið við í sterku kappingini. 2 stig komu til høldar til Føroyar, og má sigast at vera eitt flott avrik frá tveimum teimum yngstu luttakarunum í U13 bólkinum. Bæði stigini vann Lisa J. Xin okkum í gjár. Les meira »

Steypakappingin 2023

Steypakappingin varð hildin leygardagin 22/4 á Eiði. Talvfelagið Rókur hevur veruliga roynt seg sum fyriskipara seinasta árið við FM fyri einstaklingar í 2022, síðani FM í kvik- og snartalvi og nú steypakappingina. Stórt rós til felagið og fólkini rundan um. Les meira »

Dagur 2: NM fyri gentur í svøríki

Í dag vóru 2. og 3. umfar telvað í NM fyri gentur 2023. Í 2. umfari møtti Natasja Mørkøre finsku Mehr Bhaumik (1208 í ratingstigum). Natasja kom væl frá byrjanini, og telvaði trygt og væl líka inntil 18. leik. Tá yvirsá hon hvussu Les meira »

NM fyri gentur er í Svøríki



Føroyar eru fyri fyrstu ferð í mong ár umboðaðar til Norðurlandameistaraskapið fyri gentur í talvi, sum hesar dagarnar verður telvað í Helsingborg í Svøríki. Føroysku luttakararnir eru Natasja Mørkøre og Lisa J. Xin. Tær telva við í yngsta bólkinum (C), sum er U13. Les meira »

Havnar Telvingarfelag 100

Myndatekstur (HT45)Elitan í Havnar Telvingarfelag undir krígnum. Standandi f.v.: Magnus Skæling, Christoffer Lútzen, Valdemar Poulsen, Palli Henriksen, Jens Mørkøre, Grækaris Gregoriussen, Valdemar Andreasen og Margeir Sigurjónsson. Fremst f.v.: Tóarinn Evensen, John E. Joensen, F.P. Goldney og Olav Andreasen.
 
Myndatekstur (PalliogMargeir): Toppdystur í 30-unum. Við borðið síggjast Palli Henriksen og Margeir Sigurjónsson í harðari orrustu.
 
Havnar Telvingarfelag fyllir í dag 100 ár. Tað var stovnað 18. apríl 1923, og var í nógv ár einasta virkna talvfelag í landinum. Tað vóru frægir menn, sum settu skorður undir felagið í síni tíð. Av teimum fimm, sum kallaðu saman til stovnandi aðalfund og mannaðu fyrstu nevndina, eru tríggir, sum hava virkað sum borgarstjórar í Havn: Jóhs. O. Joensen, M.A. Jacobsen og J.P. Henriksen.
 
Nevndin útvegaði felagnum eina stovu í Avhaldshúsinum við Áarvegin til leigu, og her – í hjartanum í býnum – kom felagið at húsast tey fyrstu árini. Undirtøkan var góð frá fyrsta degi, og nógvir havnarmenn fóru at telva regluliga. Felagið hevði eina ágrýtna og visjónera leiðslu. Longu árið eftir í 1924 læt felagið prentað bókina “Leiðbeining og reglur í telving”. Felagið Varðin bar sín part av kostnaðinum. Felagið fekk í lag livandi talv á ólavsøku í 1927, 1931 og 1932. Skótar vóru ílætnir sum talvfólk.
 
 
Aljechin og Janus skald
 
Skipað varð í 30-árunum fyri telefontelving millum Havnar Telvingarfelag og fremstu feløgini í Noregi, Danmark og Íslandi, og í 1931 lá heimsmeistarin Alexander Aljechin við bryggju í Havn. Hann hevði verið í Íslandi, men steðgurin í Føroyum var ov stuttur til at hann fekst í land at telva. Í staðin eydnaðist felagsins oddamanni, Palla Henriksen, at fáa heimsmeistaran at skriva sær dagfestan autograf upp í eina av talvbókum sínum.
 
Hesi árini var eisini farið undir almennar føroyameistarakappingar fyri einstaklingar. Byrjað var í 1937. Limir í Havnar Telvingarfelag vóru at kalla einsamallir í hesum kappingum fyrstu árini. Nevnast kann, at skaldið Janus Djurhuus var ein av góðu telvarunum felagsins, og var hin einasti, sum í 1948 vann á føroyameistaranum Palla Henriksen – sama ár, sum skaldið doyði.
 
Í 1946 flutti felagið í nýggj høli Yviri við Strond áraka Skansan. Goldney, oberstur, sum gjørdist felagnum ein hollur stuðul undir krígnum, útvegaði felagnum húsini, sum bretar høvdu bygt undir seinna heimsbardaga. Húsið, sum var o.u. 10 x 20 alin, fekk hann felagnum fyri 3000 krónur. Sama ár kom ein av fremstu telvarum í Bretlandi, B.H. Wood, til Føroyar sum gestur hjá Havnar Telvingarfelag. Á hesari ferðini læt hann hitt tiltikna Wood-borðið til føroysk talvfeløg at kappast um. Hetta gjørdi sítt til, at talvfeløg sprettu víða hvar um landið komandi árini.
 
Havnar Telvingarfelag gekk framvegis nýggjar leiðir, og skipaði í 60-árunum fyri tveimum altjóða kappingum í býnum millum bæði føroyskar og góðar útlendskar telvarar. Felagið flutti fyrst í 50-árunum heim í býin aftur, í húsini í Dr. Jakobsensgøtu, sum skraddar Debes hevði havt sum arbeiðshøli. Her varð húsast til 1970, tá Føroya Keypssamtøka keypti húsini frá felagnum til at taka niður og byggja upp nýggjan stásiligan handil á sama staði.
 
 
Árini við Gripsvegin
 
Felagið fekk væl fyri húsini, og fór nú at hugsa um at byggja sítt egna. Ein av trúgvu felagslimunum, Henry Olsen, læt felagnum eitt stykki av síni ogn við Gripsvegin fyri sera lagaligar treytir. Nógvir felagslimir arbeiddu so væl sjálvbodnir í felagsins tænastu, at tað eydnaðist Havnar Telvingarfelag at byggja egin hús uttan almennan studning. Felagið helt til í Losjuni til nýggju húsini vórðu tikin í brúk í 1971. Felagið leigaði út ovaru hæddina, og hevur soleiðis øll árini fíggjað sítt virksemi við fastari leiguinntøku. Okkum vitandi eru ógvuliga fá talvfeløg í londunum uttan um okkum, sum hava verið so væl fyri, at tey hava havt egin hús.
 
Í felagnum hava sitið ung sum gomul og telva. Skipaðar barnatelvingar hava verið umframt annað regluligt innanfelagsvirksemi. Húsið plagdi at standa opið nærum hvørt kvøld, og tað var lagamanni hjá felagslimum at detta inn á gólvið at taka eitt talv í hesum sentrala og høgliga umhvørvi. Áhugin fyri talvi vaks í stórum eftir at Bobby Fischer og Boris Spasski høvdu telvað minniliga HM-finaludystin í Reykjavík á sumri 1972. Hesin vaksandi áhugi merktist væl í Havnar Telvingarfelag sum aðrastaðni. Limatalið reyk upp, tí nú vildu øll telva.
 
Virksemið dovnaði eitt sindur, sum árini gingu, men tá ið felagið seint í 70-árunum fór undir skipaðar talvvenjingar fyri børn, kom gongd á aftur. Virksemið var javnt høgt í felagnum øll 80-ini og 90-ini. Eitt skifti í 90-unum hevði felagið bosniska stórtelvaran Ivan Sokolov sum venjara.
 
 
Nýggj felagshøli
 
Í eini 45 ár húsaðist Havnar Telvingarfelag í R.C. Effersøesgøtu. Til endans vóru húsini í so ringum standi, at stórar og dýrar ábøtur máttu gerast, skuldi fólk fáast í tey aftur. Soppur stygdi limirnar burtur, so at felagið í nøkur ár mátti bjarga sær sum frægast í ymsum skúlum í býnum.
 
Í 2017 fór nýggj nevnd í felagnum til verka. Fremsta málið var at loysa áleikandi hølistrupulleikarnar. Í góðum samskifti við Tórshavnar Býráð eydnaðist loksins at loysa málið í 2020. Tá vórðu húsini í R.C. Effersøesgøtu seld, og fimm ára leiguavtala gjørd við Býráðið um at fáa gomlu sangstovu Kommunuskúlans ovast í Finsen til nýggj felagshøli. Gongst sum ætlað, verður henda leiguavtala væntandi longd í 2025.
 
Í Finsen hevur felagið so rúmar ræsur, sum tað ikki hevur havt fyrr.
 
 
Vinnarasiðvenjan
 
Tað er ikki yvir at dylja, at Havnar Telvingarfelag hevur verið tann stolti gangarin í føroyskari telving øll árini. Felagið hevur vunnið mest  í øllum deildum í landskappingini, og tað sama í teimum ymsu bólkunum í FM-einstaklingakappingini. Og landsins einasti stórmeistari hevur slitið sínar barnaskógvar í Havnar Telvingarfelag.
 
Av øllum, sum hava vunnið almenna føroyameistaraheitið í einstaklingstalvi, eru tólv úr Havnar Telvingarfelag.
 
 
Føroyameistarar hjá HT (1938-2023)
 
Palli Henriksen
Olav Andreasen
Tórarinn Evensen
Súni Ziska
Luitjen Apol
Andrias Ziska
Rógvi W. Rasmussen
Flóvin Tór Næs
Martin Poulsen
Carl Eli Samuelsen
Olaf Berg
Helgi Dam Ziska
 
 
 
Kvøða til HT
 
Ein av ídnu telvarum Havnar Telvingarfelags fyrstu árini var rithøvundurin Valdemar Poulsen (1909-1989). Hann ritstjórnaði 25 ára minnisriti felagsins í 1948. Í hesum riti hevur hann ognað felagnum hesa yrking:
 
 
Til Havnar Telvingarfelag
 
Búgvin til hernað á vígvølli standa
fylkini reystu til hildarfund.
Enn valdar kvirran: Caissu anda
mana teir fram á feigdarstund.
Hugsa væl, far hóvliga:
Aldrin kann ein gjørdur leikur broytast.
 
Kemur til sjóndar hin fagra gudinna,
gløggskygni lýsir á enni bjart:
Einans í tøgn eg eri at finna,
verður enn talvið langt og hart.
 
Reglur at halda og mansliga leika
Caissu synum man søma best –
andi mín tá um vøllin man reika –
haldið nú fram og havið treyst.
 
               Valdemar Poulsen
 
 
 
Hesir hava vunnið Havnar Telvingarfelag fleiri FM-sigrar í fremstu deildini í landskappingini seinnu árini. F.v. Carl Eli Samuelsen, Luitjen Akselsson Apol, Helgi Dam Ziska, Olaf Berg, Martin Poulsen og Sjúrður Thorsteinsson. 
 
 
 
Ein av eldsálum Havnar Telvingarfelags í drúgt áramál – Jákup Thomsen (1940-2013)
 
Føroyameistari 2023 – Helgi Dam Ziska úr Havnar Telvingarfelag

Innbjóðing til steypakapping 2023

Steypakappingin verður telvað leygardagin 22. apríl á Eiði.

Umframt kappingina er endamálið at draga samanum farna kappingarárið 2022/23 – og við Gallaveitsluni – ikki minst, at øll sum vara av telvingini fáa eina hugnaliga løtu saman.

Les meira »

Helgi í stórum stíli

Føroyski stórmeistarin, Helgi Dam Ziska, er aftur føroyameistari í talvi. 
 
32 ára gamli havnarmaðurin staðfesti sína støðu sum besti telvari í Føroyum við ógvuliga sannførandi avriki og úrsliti í FM-einstaklingakappingini, sum endaði í Finsen í dag.
 
Helgi var ósigraður í Landsliðsbólkinum og vann øll talvini uttan eitt, sum endaði remis.  
 
At spenningurin kortini helt sær til seinasta umfar, hevur 25 ára gamli Høgni Egilstoft Nielsen úr Sandavági heiðurin fyri. Hann gav stórmeistaranum so skarpan gang, at Helgi mátti kýta seg av øllum alvi fyri at vera eitt hálvt stig fremri, nú teir komu á mál.

Les meira »

Helgi er føroyameistari

Helgi Dam Ziska úr Havnar Telvingarfelag er aftur føroyameistari í talvi fyri einstaklingar.
 
Tað gjørdist greitt fyri løtu síðani, tá ið Helgi vann á Eyðuni Nolsøe úr Klaksvíkar Talvfelag í sjeynda og seinasta umfari í FM-kappingini. Helgi vann hetta seinasta talvið í stórum stíli.

Les meira »